མཐོ་སྔོ་བསངས་བུ་མོའི་མཐོངས་བྱེད་དབུས་ན།།
དཀར་གསལ་ལེར་ལྡིང་བའི་ཆུ་འཛིན་གྱི་ཕུང་བོ།།
ཆར་ཟིལ་མའི་སྦྲང་་ཆར་ང་རང་ལ་གཏོར་དང༌།།
མཚར་སྡུག་གི་མེ་ཏོག་ཁྱེད་རང་ལ་འབུལ་ལོ།།

ནགས་ཚང་ཚིང་འཁྲིགས་པའི་དྲ་བ་ཡི་ཁྲོད་ན།།
རྩལ་ཡ་མེདརྫོགས་པའི་རྒྱ་སྟག་གི་གཞོན་ནུ།།
ལུས་རྩལ་དྲུག་རྫོགས་པའི་མཆོང་རྩལ་དེ་སྟོན་དང༌།།
ངའི་སེམས་པའི་གཏད་སོ་ཁྱེད་ཉིད་ལས་མི་འདུག།

མདོག་མཐོན་མཐིང་སྣུམ་པའི་གཡུ་ལོ་ཡི་གསེབ་ན།།
ལུས་སྤུ་སྡུག་མཚར་བའི་གཞན་གསོས་ཀྱི་བུ་མོ།།
ངག་ལྷང་ལྷང་སྙན་པའི་གྲེ་འགྱུར་དེ་གནོངས་དང༌།།
དབྱར་སྒེག་མོའི་འཛུམ་ཞལ་ཁྱེད་རང་ལ་འབུལ་འདོད།།

རྫ་སྔོན་མོ་མཛེས་པའི་རྡོ་གླེགས་ཀྱི་གསེབ་ན།།
དྭངས་གཙང་ངེར་བརྡོལ་བའི་བསིལ་སྦྱིན་གྱི་ལྷ་ཆབ།།
རླབས་ཕྲ་མོའི་ཟེགས་མ་ང་རང་ལ་གཏོར་དང༌།།
མཛེས་མེ་ཏོག་ལང་ཚོ་ཁྱེད་ཉིད་ལ་འཛུམ་འདོད།།

དཔྱིད་དཔལ་མོ་རྒྱས་པའི་དགའ་ཚལ་གྱི་དབུས་ན།།
ལུས་འཕུར་ལྡིང་རྩེན་པའི་གཡུ་སྦྲང་གི་གཞོན་ནུ།།
ངག་སྙན་མོའི་སྙིང་གཏམ་ང་རང་ལ་གནོངས་དང༌།།
རོ་ཞིམ་མངར་སྦྲང་རྩི་ཁྱེད་རང་ལ་འབུལ་འདོད།།

སྤྲིན་བང་རིམ་བརྩེགས་པའི་ལྡིང་ཁང་གི་དབུས་ན།།
ལུས་འཁྱུག་འགྲོས་ངོམ་པའི་གཡུ་འབྲུག་གི་གཞོན་ནུ།།
ངག་བརྗིད་པོའི་སྒྲ་དབྱངས་ང་རང་ལ་གནོངས་དང༌།།
སེམས་སྤྲོ་བའི་སྒྲོ་གུར་ཁྱེད་ཉིད་ལ་འབུབས་འདོད།།

དགུང་ཨ་སྔོན་མཛེས་པའི་སྔོ་བསངས་ཀྱི་ཀློང་ན།།
དྲོད་འཛུམ་རླབས་འགྱེད་པའི་འོད་སྟོང་གི་བདག་པོ།།
ཡིད་གཅུགས་པའི་ཟེར་ཕྲེང་ང་རང་ལ་གནོངས་དང༌།།
འདབ་སྟོང་གི་འཕྱོར་སྒེག་ཁྱེད་ཉིད་ལ་གྲོལ་འདོད།།

གངས་དཀར་པོ་མཛེས་པའི་བསིལ་ལྡན་གྱི་ལྗོངས་ན།།
སེམས་འདོད་དགུ་སྐོང་བའི་སྦྲང་ཆར་གྱི་དགའ་མ།།
ཡིད་དུངས་པའི་སྙན་ཚིག་ང་རང་ལ་གནོངས་དང༌།།
རྩོམ་གསར་བའི་ཕྱག་སོར་ཁྱེད་རང་ལ་འཁྱུག་འདོད།།

རྩོམ་ཁུངས། ཚེ་སྲོག་ལ་འཁྱིལ་བའི་ཟུངས་ཁྲག