དཔལ་གསང་གསུམ་འདུས་པའི་ཟློས་གར་མཁན།།
གོས་ངུར་སྨྲིག་རྩེན་པའི་བརྟུལ་ཞུགས་ཅན།།
དུས་སྙིགས་མའི་མགོན་པོ་འཇམ་དཔལ་དབྱངས།།
ཕ་སུདྷིའི་མཚན་ཅན་ཞབས་ལ་འདུད།།

ལྷ་འཇམ་མགོན་བླ་མའི་གདུང་ཚབ་ལ།།
དེང་བཤད་སྒྲུབ་བསྟན་པའི་བདག་པོ་ཞིག།
གནས་གསེར་མོ་ལྗོངས་ན་བཞུགས་སོ་སྐད།།
མཚན་སྙན་པའི་གྲགས་པ་ཀུན་ན་ལྡིར།།

བདག་རྣམ་དཔྱོད་མེ་ཏོག་ཕྲ་ན་ཡང༌།།
སྔོན་ལས་འབྲེལ་ཉི་ཟེར་དང་འགྲོགས་ཏེ།།
ཆོས་ཟབ་མོ་བཤད་སྒྲུབ་སྦྲང་རྩིའི་རོ།།
རྗེ་ཁྱེད་དྲུང་མྱངས་པའི་སྐལ་བཟང་ཐོབ།།

ཁྱིམ་མེ་མུར་འདྲ་བའི་འོབས་དོང་ནས།།
ཐུགས་བརྩེ་བ་ཆེན་པོས་མ་བཟོད་དེ།།
གོས་ངུར་སྨྲིག་རྒྱལ་མཚན་བདག་ལ་གསོལ།།
དེ་དྲན་པའི་མོད་ལ་མཆི་མ་འཁྲུགས།།

སེམས་དམུ་རྒོད་འདུལ་ལ་ཐབས་འཕྲུལ་མཁན།།
ཆོས་བྱང་ཆུབ་ལམ་གྱི་རིམ་པའི་གཞུང༌།།
ཞལ་དགྱེས་བཞིན་བསྩལ་བའི་བཀའ་དྲིན་མཆོག།
དེ་དྲན་པའི་མོད་ལ་མཆི་ལ་འཁྲུགས།།

མཚན་བསྐལ་བའི་མཐར་ཡང་ཐོས་དཀའ་བ།།
རྒྱུད་སྨིན་བྱེད་དབང་བཞི་ཡོངས་བསྩལ་ཏེ།།
དུས་ནམ་ཞིག་ཟུང་འཇུག་ས་བོན་བསྐྲུན།།
དེ་དྲན་པའི་མོད་ལ་མཆི་མ་འཁྲུགས།།

ཁྲིད་མན་ངག་ཟབ་མོ་གང་གཱའི་རྒྱུན།།
རྗེ་འཇམ་མགོན་བླ་མའི་ཐུགས་བཅུད་ལྟར།།
སེམས་གྱོང་བོ་འདུལ་བའི་ཐབས་ལ་གཙིགས།།
དེ་དྲན་པའི་མོད་ལ་མཆི་མ་འཁྲུགས།།

མགོན་ཁྱོད་ཀྱིས་འདི་ཕྱིའི་སློབ་སྟོན་གྱིས།།
མ་མཛངས་མས་བུས་པ་བྱི་བཞིན་བསྐྱངས་པས།།
དུས་དེང་སང་བོར་བུ་མི་གྲལ་ཆུད།།
དེ་དྲན་པའི་མོད་ལ་མཆི་མ་འཁྲུགས།།

དུས་སྙིགས་མར་སེར་སྐྱར་ཕོ་མོ་ཀུན།།
ཚེ་འདི་སྣང་བསླུ་བྲིད་བགྱིད་པའི་ཚེ།
ཕ་ཁྱོད་ཀྱིས་ཆོས་བརྒྱད་དུག་ལྟར་འཛེམ།།
དེ་དྲན་པའི་མོད་ལ་མཆི་མ་འཁྲུགས།།

དུས་རྟག་ཏུ་སྤྱོད་ལམ་རྣམ་པ་བཞིར།།
ངའི་བཀའ་དྲིན་གསུམ་ལྡན་བླ་མ་དེ།།
སྙིང་རུས་པའི་གཏིང་ནས་དྲན་ཆེ་བས།།
སྐད་དྲག་པོས་འབོད་པ་ཅི་ཡང་གཏོང༌།།

རྗེ་ཟླ་མེད་བླ་མའི་གདན་ས་ན།།
ཕས་ཤུལ་དུ་བོར་བའི་དྭ་ཕྲུག་ཅིག།
ངག་ལྷང་ལྷང་སྨྲེ་སྔགས་འདོན་བཞིན་དུ།།
མིག་མཆི་མ་འཁྲུགས་པ་དགོངས་ལགས་སམ།།

དུས་དང་བོའི་སངས་རྒྱས་ཁྱེད་ཉིད་ཀྱིས།།
ཞལ་ཉི་མའི་འཛུམ་པ་སླར་བསྟན་ནས།།
གསུང་ལེགས་བཤད་ཟེར་ཕྲེང་མངོན་སྤྲས་ཏེ།།
འབངས་འགྲོ་བ་སྐྱོང་བ་བསྙེལ་མི་འཚལ།།

རྩོམ་ཁུངས། ཚེ་སྲོག་ལ་འཁྱིལ་བའི་ཟུངས་ཁྲག