ཟླ་བ་གཞོན་ནུའི་འཛུམ་བག་ལ།།
ཟུར་མིག་འཁྱུད་པའི་ལང་ཚོ་ཅན།།
ཀུ་མུ་ཏ་ཡི་སྐྲ་ཚོགས་ཀྱིས།།
ས་ལ་འཇའ་ཚོན་འཐག་པའི་གཞིར།།
སྤང་ལ་བཏབ་པའི་མུ་ཏིག་མང༌།།
ལྟེམས་ཀྱིས་འཕྱོ་བའི་གཡང་དཀར་ཁྱུ།།
བསེར་མ་རླུང་གི་སྒྱུ་འཕྲུལ་གྱིས།།
དུང་སྤྲིན་ཚོམ་བུར་ཆད་པ་བཞིན།།
ནེའུ་གསིང་མེ་ལོང་སྟོང་ཕྲག་གི།།
མཚར་སྡུག་ངོགས་སུ་བཞད་པའི་དབྱིག།
གནག་ཕྱུགས་རྨིག་པའི་རྗེས་དག་ལ།།
ལོ་རྒྱུས་ཆུ་མིག་རེ་རེ་འཁྱིལ།།
མྱུར་འཁྱུག་གློག་གི་འགྱུ་བ་ལ།།
སྨོད་པའི་གྱི་ལིང་རྒྱ་མཚོའི་རྡུལ།།
དགྱེས་པའི་འཚེར་སྐད་རིང་པོ་ཡིས།།
གནམ་སའི་ཧྲག་བར་ཅིག་ཅར་ཕྱེ།།
དབྱར་ཟླའི་ན་ཆུང་ལྡེམ་སྐྱོད་ཀྱིས།།
ཡིད་ཀྱི་ལྕུག་ཕྲན་ཀུན་ནས་འདར།།
སྦྲ་དང་གུར་གྱི་དཀྱིལ་འཁོར་དུ།།
དྲི་དང་རོ་ཡི་ཞིམ་མངར་འཁྱིལ།།
མཁའ་མཐའི་ཉི་ཟེར་འཇམ་པོ་དང༌།།
མཚམས་སྤྲིན་དམའ་མོའི་འོག་རོལ་ཏུ།།
ཨ་མའི་ཡིག་དྲུག་རྒྱུད་མངས་དང༌།།
ཨ་ཕའི་བསང་གི་དུང་སྒྲ་སྙན།།
སྤྲིན་དཀར་བཞད་པའི་མྱོས་བུམ་ལས།།
འོ་མའི་གྲུ་ཆར་དལ་གྱིས་ཟགས།།
སྤང་ལྗོངས་སྔོན་མོའི་ཕྲག་གོང་དུ།།
སྙིང་སྡུག་བུ་མོའི་འཛུམ་བག་བསུས།།
སྙན་ལ་སིང་བའི་མཛའ་གཞས་ཀྱིས།།
དཀར་ལ་དམར་བའི་གཟི་བྱིན་བསྐྱེད།།
བརྩེ་ལ་འཛུམ་པའི་མིག་ཞགས་ཀྱིས།།
དམར་ལ་ཆུང་བའི་སེམས་པ་བསྡམས།།
བརྒྱ་བྱིན་ལག་ཏུ་ཁེངས་པའི་གཞུ།།
རི་མོར་བཤམས་པའི་གུར་ཁྱིམ་དུ།།
སྤྲོ་སྐྱིད་འོ་མའི་ཟིལ་དངར་ལ།།
ལོངས་སུ་བྱེད་པའི་སྐལ་བ་སྦོམ།།
ལྡོང་བཙན་སྣང་ངུ་གྲགས་པའི་དཔལ།།
རིག་བྱེད་རྩེད་མོ་འདི་ལ་དགྱེས།།
ལྗགས་རྩེ་འཕྲུལ་གྱི་ཆ་རེར་ཡང༌།།
དག་གི་འགྱུར་ཁུགས་འདི་ལྟར་གཡོ།།
                           ༡༩༩༤ . ༥. ༡༧ལ་ཕ་ཡུལ་དུ།

རྩོམ་ཁུངས། ཀུ་ཤུ་དམར་པོ།