ཨ་ཁུ་བླ་རྒན་ཐབ་ཀའི་འགྲམ་དུ་ཙོག།
ཧ་ཡང་སྡེར་མར་གོ་སྐམ་ཏོག་ཙམ་འདུག།
ས་གསུམ་སྐྱབས་མགོན་ཟེར་བཞིན་ཐལ་མོ་སྦྱོར།།
ཤ་རུས་ཉེ་འབྲེལ་ཟེར་དུས་མིག་ཆུ་ལྷུང༌།།
ལ་ཐོད་དམར་པོའི་ཞྭ་དེ་མགོ་ལ་གྱོན།།
ར་སློག་རྙིང་བའི་སྨད་གཡོགས་ཤིག་ཀྱང་མནབས།།
ཡ་སོ་འཐོར་བའི་ཤུལ་ན་གཉིས་ཙམ་ལྷག།
འ་འུར་ལ་དགའ་དགེ་ཕྲུག་སྲང་བར་འཁྱམས།།
ཟ་འཐུང་ཞིམ་པོ་གཡོ་བའི་ཐབས་ཀྱིས་དབེན།།
ཞ་འཐེང་བཞིན་དུ་གོམ་གསུམ་སྤོ་མི་ནུས།།
ཝ་མོ་བརྒྱལ་བའི་སྡུག་བསྔལ་གང་མང་མྱོང༌།།
ཛ་ཡ་རྒྱལ་བའི་སྐུ་ལ་ཡུད་ཙམ་བལྟས།།
ཚ་རུ་ལྟ་བུའི་མགོ་ལ་ལན་རེར་འཕྲུག།
ཙར་གྱིས་འཛགས་པའི་ཁ་ཆུས་གཟན་ཤམ་བརླན།།
མ་དང་སྲིང་མོ་ཡིད་ལ་ཐེངས་གཅིག་ཤར།།
བན་དེ་བྱས་ནས་ལོ་ངོ་བརྒྱད་ཅུ་ལོན།།
ཕ་ཡུལ་མ་མཐོང་ལོ་ངོ་འདི་ཙམ་སོང༌།།
པ་ཕས་བོར་བའི་ལོ་ཟླ་འདི་ཙམ་བསྐྱལ།།
ན་རྒས་ལུས་སེམས་གདུང་ལ་ཞེ་རེ་སྐྱོ།།
ད་ལྟ་ཤི་ན་སྙམ་བཞིན་དབུགས་རིང་ཤོར།།
ཐ་ཆད་དགེ་ཕྲུག་མ་ཡོང་ཉིན་གསུམ་འགོར།།
ཏ་ཀུར་བརྟེན་ཀྱང་ཐང་ལ་གཅོམ་གྱིས་འགྱེལ།།
ཉ་མོ་ལྕགས་ཀྱུས་དྲངས་བཞིན་ཟུག་རྔུ་བསྐྱེད།།
ཇ་གསར་ཕོར་བ་གང་ཙམ་བསྐོལ་མ་ཐུབ།།
ཆ་ལུགས་ཙོག་པོའི་མལ་དུ་གོག་ནུར་བྱས།།
ཅ་རིལ་བཞིན་དུ་གུམ་པོར་བྱས་ཏེ་ཉལ།།
ང་ཡི་ལས་འདི་ཟེར་བཞིན་མིག་ཆུ་ལྷུང༌།།
ག་ཤེད་ཅིག་ནས་དགེ་ཕྲུག་ནང་དུ་སླེབས།།
ཁ་གདངས་མིག་ཟུང་ཅེར་ཏེ་ཨ་ཁུར་བལྟས།།
ཀྭ་ཡེ་ཨ་ཁུ་ལྔ་པའི་ལམ་དུ་གཤེགས།།
                       ༡༩༩༥.༡.༢༠རོང་བོ།

རྩོམ་ཁུངས། ཀུ་ཤུ་དམར་པོ།