དེ་ཉིད་མཐོང་བ་ཡི་བློ་དང་རྣམ་དཔྱོད།།
ཐུགས་རྗེས་སྩོལ་མཛད་ཀྱི་དྲིན་ཅན་བླ་མ།།
བཀའ་དྲིན་འཁོར་མེད་དེ་སྙིང་དབུས་བཞུགས་ཤིག།
གང་ཤར་མགུར་མ་ཡི་བརྡ་གླུ་ལེན་ནོ།།
 
ཤེས་རིག་སྒྲོན་མེ་དེ་ཡུན་རིང་སྟོར་བའི།།
དམུས་ལོང་འཁྱམ་པོ་ང་ཇི་ཞིག་ལྟར་ཏེ།།
རིག་པའི་ཉི་འོད་དེ་ནང་དུ་ཡོད་པ།།
ངོ་མ་ཤེས་པ་དེ་ཤེས་ལ་ཁད་དོ།།
 
ཇོ་ཇོ་བརྩོན་འགྲུས་དེས་ལྐོག་ཏུ་བསྙད་པས།།
ངོ་མཚར་ལྟད་མོ་ཞིག་མཐོང་ལ་ཁད་པ།།
བརྟན་གཡོའི་དངོས་པོ་དེ་སྣང་བའི་བརྫུ་བག།
ཆགས་སྡང་རྣམ་རྟོག་ཀྱང་འཁྲུལ་བའི་རི་མོ།།
 
ཡུལ་གྱི་བརྙན་རིས་དེ་མཛེས་མཛེས་འདྲ་བས།།
ཡུལ་ཅན་བུ་ཆུང་ཁོ་བསླུས་ནས་འདུག་པ།།
ཨ་ཇོ་རྟེན་འབྱུང་དེར་སྐྱོབ་པར་རེ་ན།།
རྟོག་མེད་ཤེས་པ་དེས་རང་ངོ་སྟོན་དང་།།
 
རྣམ་པ་གཅིག་ཏུ་ན་འཁོར་བའི་ཆོས་ཀུན།།
འཁྲུལ་པའི་རང་གཟུགས་ཀྱི་ངོ་བོར་ཤར་བས།།
ཟག་ཟད་ཆོས་སྐུ་ཡི་ཞིང་ཁམས་དེ་རུ།།
བདེན་གྲུབ་ངོ་བོ་ཡིས་སྟོང་པར་སྣང་ངོ་།།
 
རྟོག་འགྱུ་སྣ་ཚོགས་འདི་བྱིས་པའི་འཁྲུལ་སྣང་།།
བྱེད་སྩོལ་འདི་དག་ཀྱང་བྱེ་མའི་མཁར་ལས།།
སྒྱུ་མའི་རོལ་གར་གྱི་ཡོ་ལང་འདི་ཡིས།།
མ་དག་འགྲོ་བ་ཀུན་བསླུས་ནས་འདུག་གོ།
 
ཡོད་ཡོད་འདྲ་བ་ཡི་བདེ་དང་སྡུག་བསྔལ།།
ལྟོས་མེད་ཚུགས་ཐུབ་ཏུ་གྲུབ་པ་མེད་ན།།
འཁྲུལ་བའི་རྣམ་རྟོག་གི་ན་བུན་ཡལ་དུས།།
ཚོར་བ་བདེ་སྡུག་གི་རྒྱ་ལས་གྲོལ་ལོ།།
 
བརྟན་གཡོའི་དངོས་པོ་ཡི་གྲུབ་ཚུལ་ཀུན་ཀྱང་།།
བག་ཆགས་མཁན་པོ་ཡི་རོལ་གར་ལགས་ན།།
རྟེན་འབྱུང་ཆོས་ཉིད་ཀྱི་ངོ་བོའི་གཤིས་ཀ།
ལན་གཅིག་མཇལ་བ་ཡི་སྐལ་བཟང་འཚོལ་འགྲོ།
 
དོན་ཀུན་གྲུབ་པ་ཡི་ཞལ་ཆེམས་ཟབ་མོ།།
འཕགས་བོད་མཁས་པ་ཡིས་བྱ་ཞིག་བཏང་བས།།
བརྒྱུད་ལྡན་བླ་མ་ཡི་ཕ་ཕོག་ནང་ནོམ།།
ངོམ་མེད་སྤྱོད་པ་ཡི་སྤོབས་སེམས་སྐྱེད་དང་།།
 
ད་ལྟ་རང་རེ་ཡི་བློ་གསར་འགའ་ཞིག།
སྣང་བ་ལིང་ལིང་ལ་ཞེན་ཆགས་ཆེ་བས།།
རྟོག་འགྱུའི་རི་མོ་ལ་མཁས་ཚོད་སྣང་ཡང་།།
ཆོས་བརྒྱད་འཇའ་ཚོན་གྱིས་བྲིད་ཉེན་ཆེ་འོ།།
 
གནད་འགག་མ་ཕིགས་པའི་ཁ་ཕོ་ཅན་འགས།།
ས་རྒྱ་རི་སྐོར་གྱི་གཞུང་བཤད་མང་ཡང་།།
ཇོ་ཇོ་རྟེན་འབྱུང་དང་འབྲེལ་འདྲིས་མེད་ན།།
རིག་པའི་ཉི་འོད་དང་རྒྱང་ཐག་རིང་འགྲོ།
 
ཚན་འཕྲུལ་ཐ་སྙད་ཀྱི་མཁས་སྟངས་དེ་ཡིས།།
ཤེས་བྱའི་དེ་ཉིད་ལ་མཇལ་བ་མིན་པས།།
རྟེན་འབྱུང་རིག་པ་ཡི་གྲོལ་ལུགས་ཕྲ་མོར།།
གཤའ་མའི་བདེན་དོན་གྱི་གནས་སྟངས་དྲིས་དང་།།
 
རྒྱུ་འབྲས་གནས་སྟངས་ལ་སྒྲོ་སྐུར་མེད་པས།།
རིག་གསར་མཁས་དབང་རྣམས་དགྱེས་དགྱེས་མཛོད་ཅིག།
ཕྱི་ནང་རྟེན་འབྲེལ་གྱི་ཆོས་ཉིད་བསྟན་པས།།
གྲུབ་མཐའི་མཁན་པོ་ཀུན་བློ་འཚུབ་མི་དགོས།།
 
འོན་ཀྱང་གཞུང་ལུགས་ལ་སྦྱངས་པ་ཆུང་རྣམས།།
གང་དྲན་ཤོད་པ་ལ་དགྱེས་དགྱེས་འདྲ་ཡང་།།
དོན་གྱི་གནས་སྟངས་དང་འགལ་བར་མཐོང་ནས།།
ཚིག་ཉུང་དོན་ཟབ་ཀྱི་ཚུལ་དུ་བྲིས་ཡོད།།
 
ཁོ་བོ་ཁྱེད་ཅག་ལ་མི་གུས་མ་ལགས།།
ཕོག་ཐུག་བྱུང་ན་ནི་བཟོད་པར་མཛོད་ཅིག།
ཁོ་བོ་ཀུན་མཁྱེན་གྱི་ཤར་པོ་མིན་ཡང་།།
ཕ་མེས་གཞུང་ལུགས་ལ་སྦྱངས་པའི་སྟོབས་རེད།།
 
སྟོང་ཉིད་མ་རྟོགས་ཀྱང་ལྟ་བ་གླེང་བ།།
རྟེན་འབྲེལ་གཞུང་ལུགས་ལ་གོམས་པའི་མཐུ་འདྲ།།
ཉོན་མོངས་མ་གྲོལ་ཡང་གྲོལ་ལུགས་ཤེས་པ།།
དྲིན་ཅན་བླ་མ་ཡི་བཀའ་དྲིན་ལོས་ཡིན།།
 
དོན་ཀུན་གྲུབ་པ་ཁོང་བཀའ་དྲིན་ཆེ་འོ།།
བརྒྱུད་ལྡན་བླ་མ་རྣམས་བཀའ་དྲིན་ཆེ་འོ།།
ཇོ་ཇོ་རྟེན་འབྱུང་ཡང་བཀའ་དྲིན་ཆེ་འོ།།
དད་བརྩོན་ཤེས་རབ་ཀྱང་བཀའ་དྲིན་ཆེ་འོ།།
         སྤྱི་ལོ་༢༠༡༡ལོའི་ཟླ་༡༡ཚེས་༡༣ཉིན།
 
 

རྩོམ་ཁུངས། ངེད་དྲ་བ།