ནམ་མཁའི་མཐོངས་ཀྱི་ཚེས་རིས་འཁྱག་པོ།།
མེ་ལོང་ནང་ལ་ཤར་ཙམ་བགྱིས་ཏེ།།
སྤྲིན་དང་རི་བོའི་མགུལ་དུ་དཔྱངས་པས།།
མུན་པ་ལྗན་ལྗིན་ས་རུ་གཏོར་སོང་།།
 
སེམས་ཚོར་བྱེའུ་ཆུང་འཕུར་འཕུར་བྱས་ཏེ།།
ཨ་སྔོན་དགུང་ལ་རྨ་ཁ་དོད་པས།།
ཚངས་མགུར་ནང་གི་ཡི་གེ་སྐྱུར་བོ།།
ལན་རེར་མི་བཀླག་ཐུ་མེད་ཡིན་འདུག།།
 
འཕྱོངས་རྒྱས་ཟླ་བ་སྒྲོལ་མ་དྲན་འདྲའི།།
ཡིག་ཆུང་བྱུ་རུའི་སྐེ་རྒྱན་འདྲ་བོ།།
འཇོལ་མོ་ཞིག་གི་ངག་ལ་འཁྱིལ་བས།།
འོད་སྣང་ཕྲན་བུ་རྐང་ལ་ཟུག་འོང་།།
 
གནས་མོ་ཞིག་གི་མིག་མདངས་ལྟ་བུའི།།
ཚངས་དབྱངས་པ་ཡི་སྐྱོ་མགུར་ཐོར་བུ།།
མཚོ་དང་ངང་བས་སྐེ་ལ་བཏགས་ནས།།
ཉི་མ་ལྷ་སའི་ཕྱོགས་སུ་འཕུར་ཐལ།།
 
གཤོག་སྒྲ་ལྟ་བུའི་ཡིག་འབྲུ་འདི་ཚོ།།
སུ་ཡི་མིག་ཆུའི་ཐིགས་པ་ཡིན་པས།།
ཟླ་བ་ལེབ་མོའི་འོག་ནས་མ་སྐྱུར།།
གསེར་ཏོག་ཅིག་གི་རྩེ་ལ་གཏོར་རོགས།།
 
གསེར་གྱི་རྒྱུད་མངས་སེར་བོའི་ནང་ན།།
ཨེ་མ་བདེ་སྟོང་དབྱེར་མེད་གདའ་བས།།
བུ་སྤུ་རྣོན་པོའི་རྩེ་མོ་རེ་ལ།།
ཟག་མེད་དབྱངས་ཀྱི་ཐིགས་པ་འབབ་སྲིད།།
 
ཁ་བ་ནག་པོས་འབབ་པ་མ་གནང་།།
སྤྲིན་པ་སེར་བོས་འཁོར་འཁོར་མ་བྱེད།།
ཚོར་བ་དར་གྱི་ལུང་བུ་ཅན་ཞིག།།
རུས་པའི་གསེང་ནས་རྒྱང་དུ་བྱེར་སོང་།།
                 ༢༠༡༡ ༡༡ ༢༠ཟི་ལིང་དུ་བྲིས།

རྩོམ་ཁུངས། ངེད་དྲ་བ།