ལྷུན་སྟུག་གངས་ཀྱི་མེ་ཏོག་གིས།།
ཁོར་ཡུག་ཀུན་ནས་ལྷམ་པའི་ལྗོངས།།
བསིལ་ལྡན་ས་ལའི་ཞིང་ཁམས་ཀྱི།།
སྙན་པ་སྲིད་ཞིའི་རྒྱན་དུ་འབྱམས།།
མཐའ་བྲལ་ཆུ་གཏེར་སྔོན་པོའི་གོས།།
ནོར་འཛིན་མཁུར་དུ་བཟུང་བ་ཡིས།།
སྔོ་བསངས་ས་ལ་ལྷུང་ངམ་ཞེས།།
དཔྱང་ཐག་དྲ་བས་སུ་མ་བཅིངས།།
གངས་ཆབ་ཞུན་མའི་རྡུལ་ཚོགས་ཀྱིས།།
སྣོད་བཅུད་བུ་མོའི་བཞིན་རས་ལ།།
བསིལ་བའི་རེག་བྱ་འབུམ་གཏོར་མཁན།།
རྨ་ཀླུང་ལྷ་ཆབ་དལ་གྱིས་འབབ།།
ཡུལ་ལྗོངས་གསར་བའི་ཚོན་རིས་ཀྱིས།།
རབ་བྱུགས་མང་རའི་གསེར་ལྡན་མ།།
མིག་གི་ལང་ཚོར་ཐོབ་པའི་ཚེ།།
སུམ་རྩེན་གྲོང་ལ་སྲེད་པ་ལྷོད།།
བརྗིད་ཆགས་ས་འཛིན་སྟུག་པོའི་རི།།
ཨ་སྔོན་མཐོངས་སུ་བསྙེགས་པ་ཡིས།།
གཤོག་རྩལ་དར་བའི་མཁའ་ལྡིང་ཁྱུ།།
མཆིལ་བའི་གོ་འཕང་ལས་ཀྱང་དམན།།
སྤུ་སྡུག་རྨ་བྱའི་མཐོན་མཐིང་མགྲིན།།
མོག་པོར་བགྱིད་པའི་ནེའུ་གསིང་ལ།།
དཀར་དམར་ཚོན་གྱི་འཛུམ་ལྕི་བའི།།
མེ་ཏོག་སྣ་མང་ལྷག་ལྷག་དགོད།།
ཨནྡ་སྙིལ་ལྟར་རབ་སྔོ་བའི།།
མཚོ་དང་མཚེའུའི་ལྟེང་ཀ་འབུམ།།
ཁོ་ར་ཁོར་ཡུག་མཛེས་པའི་གཞིར།།
ཐོལ་གྱིས་འཁྱིལ་བའི་དཔལ་ཡང་རྨད།།
མྱུ་གུ་གསར་བའི་གཙུག་ཏོར་གྱིས།།
རོ་ལྡན་འབྲས་བུའི་ནུ་ཁུར་འབུམ།།
མ་ཐེག་ས་ལ་དུད་པ་ཡི།།
ཁོད་སྙོམས་ཞིང་སའི་མཐའ་མི་དཔོག།།
རྫ་ཆབ་དར་དཀར་ལང་ཚོའི་རྒྱུན།།
རི་བོའི་ཟོམ་དུ་འབབ་པ་ཡི།།
ལྷུང་ལྷུང་དབྱངས་ཀྱི་བུང་བའི་ཚོགས།།
རྣ་དབང་ཨུཏྤལ་ཚལ་དུ་འགྱུ།།
གཡུ་མདོག་མ་རྙིངས་ནགས་ཀྱི་ཚལ།།
དཔག་ཚད་ཁྱོན་དུ་འཁྲིགས་པ་ཡི།།
བསིལ་འཇམ་གོས་ཀྱི་འདབ་མ་ནི།།
ཞག་ལྡན་བུ་མོའི་གདོང་ལ་འཕྱང་།།
ཟ་བྱེད་གཤིན་རྗེ་དོང་ནང་ལ།།
བྱུ་རུའི་ཁྲག་དྲོན་འཁྱིལ་བ་ཡི།།
གཅན་གཟན་སྲིན་པོའི་མཆེ་བ་ཅན།།
དམར་ཆུང་སྲོག་གི་ཆོམ་པོར་རྒྱུ།།
ཁུ་བྱུག་འཇོལ་མོའི་ངག་སྒོ་ལས།།
དྲི་ཟའི་རྒྱུད་མངས་སྦྲེངས་འདྲའི་གླུ།།
རྒྱུན་པར་ཟེགས་པའི་འགྱུར་ཁུགས་ཀྱིས།།
ཚངས་སྲས་མགྲིན་པར་ངལ་གསོ་བྱིན།།
ཤིང་འབྲས་བིམྤའི་མཁུར་མདངས་ཅན།།
གཡུར་དུ་ཟ་བའི་དོ་ཤལ་གྱིས།།
ལྗོན་པའི་མགོ་ལྕོག་ས་ཡི་གཞིར།།
ངལ་བའི་ཟོལ་གྱིས་དུད་པ་འཛིན།།
ལེགས་བྱས་ཟླ་གཞོན་གསར་བའི་དཔལ།།
མ་ཉམས་བཞད་པའི་འོད་སྣང་གིས།།
ཆོས་སྡེ་གསེར་གྱི་ཀུ་མུད་ཚོགས།།
ཕྱོགས་དང་ཕྱོགས་ན་དཔྱིད་དུ་ལྷམ།།
ལུང་དང་རིགས་པའི་སྒྲ་དབྱངས་ནི།།
དབྱར་སྐྱེས་རྔ་ཡིས་མི་མཚོན་པས།།
ཡིད་སྲུབས་བདག་པོའི་སྙིང་གི་རྩེར།།
མྱ་ངན་ལག་པ་གར་དུ་རྩེན།།
དམར་སེར་གོས་ཀྱི་ཁ་དོག་གིས།།
ལུས་ལ་འཁྱུད་པའི་ཚུལ་གནས་པས།།
སྔོ་བསངས་བུ་མོའི་རྒྱུ་སྐར་གྱི།།
ཚར་དུ་དངར་བའི་གྲངས་ལ་འཕྱ།།
རྣམ་དཀར་བྱ་བའི་དཀྱིལ་འཁོར་ཅན།།
དུད་ཁྱིམ་འབྲས་དཀར་སྤུངས་འདྲའི་ཚོགས།།
སྟོབས་འབྱོར་དཔལ་གྱིས་འཁྱུད་པ་ལ།།
འགྲམ་ཆུ་མི་དཀུ་རང་དབང་ཅི།།
བཙན་པོའི་རུས་བཅུད་གཙང་མའི་རྒྱུན།།
མ་ཉམས་སྨུག་པོ་གདུང་གི་རྒྱུད།།
ཐང་སྨུག་སྦྲ་ཡི་ཚོམ་བུ་ཅན།།
འབྲོག་པའི་སྡེ་འདི་སུ་ཡིས་བསྐྲུན།།
དེ་ན་རྟ་ནོར་ཕོན་པོའི་ཁྱུ།།
ཐང་མར་བརྡལ་བའི་ངང་ཚུལ་གྱིས།།
བྱིན་ཆགས་དབྱིག་གི་བློ་གྲོས་མ།།
ཆུ་མཚོའི་ཁྲོད་དུ་ནུབ་ལ་དོགས།།
ལུས་བོངས་ཁོ་ལག་བརྗིད་པའི་བུ།།
གནོད་སྦྱིན་ཁྲོས་འདྲའི་སྟག་ཤར་ནི།།
རང་སྡེ་འོ་མའི་མཚོ་ཆུང་གི།།
དགྲ་བོ་ཆམ་དུ་ཕབ་པའི་གཉེན།།
ཟླ་གདོང་ཨུཏྤལ་འཛུམ་པའི་མིག།།
ནུ་འབུར་རྒྱས་པའི་དོག་པ་ཅན།།
གཤིས་འཇམ་ན་ཆུང་བུ་མོའི་ཚོགས།།
སྙིང་གི་དཔྱིད་དུ་ཅི་ཡང་ཐོགས།།
ཡུལ་འདིའི་དཔལ་དང་འབྱོར་བའི་ཁུར།།
རྒྱ་མཚོ་བཞི་ཡི་སྐ་རགས་ཅན།།
གསེར་ལྡན་རལ་བས་མ་ཐེག་པས།།
ཕག་རྒོད་མཆེ་བས་ངལ་བ་བརྟེན།།
མཁུར་མདངས་དམར་ཞིང་མཆུ་སྒྲོས་སྣུམ།།
ནུ་འབུར་རྒྱས་ཤིང་གོམས་འགྲོས་གཉོམ།།
ཟུར་མིག་བུང་བའི་ཟློས་གར་གྱིས།།
སྲེད་ལྡན་མིག་གི་དབང་བོ་འཆིང་།།
བཞིན་རས་ཟླ་བའི་མདངས་ལ་འཁུ།།
བློ་མཛངས་ཨ་ནུའི་དཔལ་ལ་བསྡེབས།།
བོད་ཀྱི་རུས་སུ་སྐྱེས་པའི་བུ།།
ལེགས་བྲིས་བུ་རུ་འཕྱོང་མོ་ཉུག།།
དེ་འདྲའི་ན་ཆུང་ཕོ་མོ་ཟུང་།།
ཕན་ཚུན་རིང་ནས་མཛའ་བའི་སེམས།།
རྰ་མ་ན་དང་སྰི་ཏ་ཡི།།
གཏམ་གྱིས་ཕྲེང་བས་མཚོན་ནུས་མིན།།
སྐད་ཅིག་བྲལ་བའི་གདུང་བ་ཡང།།
སྙིང་ཆུང་སྲེག་པའི་མེར་འགྱུར་ན།།
ཡུན་རིང་གྱེས་པའི་མྱ་ངན་གྱིས།།
ལུས་སེམས་སོ་སོར་བཞུད་ལ་དོགས།།
གསང་གཏམ་མུ་ཏིག་སིལ་མའི་ཕྲེང་།།
རྣ་བའི་དཔྱིད་དུ་རབ་སྨིན་ཅིང་།།
དམ་བཅའ་མི་ཤིགས་གཡུང་དྲུང་རིས།།
སེམས་ཀྱི་རྡོ་རུ་ལྷུན་གྱིས་གྲུབ།།
བརྩེ་སེམས་འོ་མའི་ཆུ་མཚོ་ཡི།།
རླབས་ཕྲེང་གཡོ་བའི་གཏམ་གྱིི་རྒྱུད།།
མི་རྣམས་བཟློས་བརྗོད་ལས་ཀྱིས་ནི།།
རོ་འཛིན་བུ་མོ་ཤིན་ཏུ་ངལ།།
ནམ་ཞིག་ལས་བཤོལ་དབེན་པ་ཡི།།
རླབས་ཆེན་དོན་གྱི་ཁུར་མང་པོ།།
བཟློག་པ་མེད་པར་གཞོན་ནུ་དེའི།།
ཕྲག་གོང་ལྕི་བའི་དགའ་མར་བབས།།
སྙིང་སྡུག་སྙིང་གི་མཛའ་ན་མོར།།
འབྲལ་བའི་ལས་དེ་སྐན་ན་ཡང་།།
དགོས་དོན་དྲི་བཞོན་ལག་པ་ཡིས།།
སེམས་ཀྱི་འཁྲི་ཤིང་ཅི་ཡང་བསྐུལ།།
མཆི་མའི་དོག་པ་འབུམ་ཕྲག་གིས།།
མཁུར་ཚོས་ཡོངས་སུ་བརླན་པའི་ཚེ།།
སེམས་མེད་རི་དང་མཚོ་ལ་ཡང་།།
དུ་ཁའི་ཚོར་བ་ཆར་དུ་བསྙིལ།།
མི་འདོད་གཏམ་གྱི་ཚེར་མ་ཡིས།།
དགའ་མའི་སྒྲ་འཛིན་གཙེས་པ་ན།།
འདྲེན་བྱེད་གཡོ་བའི་བུང་བ་ལས།།
མིག་ཆུའི་ཕྲེང་བ་ཕྱོགས་སུ་འཕུར།།
ད་ནི་ལག་སོར་མེ་ཏོག་ནི།།
བྲང་གི་མཚོ་ལ་མངོན་འཛུམ་ནས།།
རོ་འཛིན་བུ་མོའི་ཟློས་གར་གྱིས།།
སྨོན་ཚིག་མཐའ་དག་དབྱངས་སུ་སྨྲས།།
མཛའ་གཅུགས་གསེར་གྱི་འཁྲི་ཤིང་ནི།།
དུས་ཀྱི་རླུང་གིས་འཇིག་མིན་པར།།
དམ་བཅའི་རི་མོ་རྡོ་ཡི་མདངས།།
སུ་ཞིག་འཕྲལ་དུ་གསུབ་པར་ནུས།།
འཕྲུལ་ཆས་མགྱོགས་མོའི་འགྲོས་གཅིག་གིས།།
བས་མཐའི་གྲོང་དུ་སྤྱུགས་པ་ཡིས།།
གཞོན་ནུ་དེ་ཡི་ཀུན་རྟོག་སེམས།།
སོམ་ཉིའི་དྲ་ལ་འཁྱོག་པོར་འཕྱང་།།
སྐབས་གསུམ་ལྟེ་བའི་གཞལ་མེད་ཁང་།།
ས་ལ་འཕོས་འདྲའི་ཁང་བརྩེགས་དག།།
མཐོན་མཐིང་མཁའ་ལ་བསྙེགས་པ་ཡིས།།
ཉི་ཟླའི་ཟུར་ཕུད་རྒྱན་དུ་འཛིན།།
ནུབ་གླིང་མཁས་པའི་བློ་རིག་གིས།།
བསྐྱེད་པའི་ཚོང་ཟོང་དངོས་པོའི་ཚོགས།།
ཐང་མར་བརྡལ་བ་སྒྱུ་མའི་གཟུགས།།
མིག་དབང་འཆིང་བའི་དཔྱིད་དུ་སྨིན།།
ངག་ཚིག་རི་མོ་མི་གཅིག་པའི།།
ཐ་དད་མི་རྣམས་འགྲོ་འོང་གིས།།
རང་རང་ཐུན་མིན་ཆ་ལུགས་ཀྱི།།
འབུར་དོད་ཁྱད་ཆོས་ངོམ་ལ་བྲེལ།།
ནུ་རྒྱས་ཆུ་ཤེལ་ཕོན་པོ་ཟུང་།།
བྲང་གི་དཔལ་དུ་རྒྱས་པ་ཡི།།
ན་ཆུང་རི་དྭགས་མིག་ཅན་ཚོགས།།
མིག་གིས་གཏོང་ལ་འདུན་པས་དབེན།།
ཕྱོགས་ཀྱི་དོན་མཐུན་རྐང་གཉིས་འགྲོ།།
མ་ལུས་གཅིག་ཏུ་འདྲེས་པའི་ཚེ།།
སོ་སོར་འབྱེད་པའི་བློ་གྲོས་ནི།།
འོད་གསལ་ལྷ་ཡི་ཚོགས་ལ་ལྡོང་།།
རྡོ་བས་གཅལ་བཀྲམ་ཁྲོམ་སྲང་ན།།
བྱ་ལྟར་རྒྱུ་བའི་འཕྲུལ་ཆས་ཚོགས།།
གྲོག་མའི་ཚང་མལ་བརྡོལ་འདྲ་བ།།
བགྲང་ལ་སོར་མོའི་འདུ་བྱེད་ངལ།།
སྣ་ཚོགས་སྒྱུ་མའི་འཛུམ་བག་གིས།།
བྲིས་པའི་གྲོང་ཁྱེར་མངོན་དགའ་བ།།
འདྲེན་བྱེད་མེ་ལོང་ལ་ཐོབ་ཀྱང་།།
དགའ་མ་དྲན་པའི་ཚོར་བས་གདུངས།།
ལོ་དང་ཟླ་བའི་འཁོར་ལོ་ནི།།
མགྱོགས་པའི་འགྲོས་ཀྱིས་རྩེན་པ་ཡིས།།
སེམས་ཀྱི་རི་ལ་མྱ་ངན་གྱི།།
གོས་དཀར་སྨུག་སྤྲིན་དལ་གྱིས་འཛིན།།
མཁའ་རུ་དལ་གྱིས་བགྲོད་པའི་སྤྲིན།།
བསིལ་བའི་རླུང་གིས་བསྐྱོད་པ་ལ།།
དྲན་གདུང་ཡུས་ཀྱིས་བརྣངས་པའི་ཚིག།།
འཕྲིན་དུ་སྤྲེངས་པའི་གྲངས་མ་དམིགས།།
རྩྭ་ལྗང་བེེེཻདྰུརྱ་ཡི་གོས།།
གོས་སུ་ཀླུབ་པའི་གསེར་ལྡན་མ།།
སྡུ་གུར་བཀྲ་བའི་ཕང་བ་ན།།
རོལ་རྙེད་མ་ཡང་སྐྱོ་ཞིང་མཆིས།།
བྱུ་རུའི་དམར་མདངས་ཉེར་འཕྲོག་པའི།།
མཁུར་ཚོས་དམར་པོའི་ངོས་ཡངས་སུ།།
བརླན་གཤེར་མཆི་མའི་དོག་པ་ནི།།
མུ་ཏིག་ཚོམ་བུ་འཐོར་བ་བཞིན།།
ཀུན་རྟོག་ཡིད་ཀྱི་ནམ་མཁའ་རུ།།
སྙིང་སྡུག་དགའ་མའི་མཛེས་པའི་བཞིན།།
དྲན་པའི་པིར་གྱིས་བྲིས་པ་ན།།
སེམས་ཀྱི་ལང་ཚོ་རལ་ལ་ཉེ།།
ངང་ངུར་བུང་བ་ཁུ་བྱུག་གིས།།
གཞས་དབྱངས་སྙན་མོར་སྒྲོག་པའི་གླུས།།
མཛའ་བོའི་སྙིང་གཏམ་མགུར་མའི་དབྱངས།།
དྲན་པར་བྱེད་ལ་བསྐུལ་བ་འདྲ།།
ནེའུ་གསིང་གཡུ་ཡི་གུར་ལྡིང་དུ།།
མགོ་ལྕོག་འགྱུ་བའི་ཆུ་སྐྱེས་དང་།།
བུང་བའི་རྩེད་འཇོ་མཐོང་བ་ན།།
གདུང་བའི་མེ་ལྕེ་དྲག་ཏུ་འཕྱོ།།
དྲན་པའི་ཆུ་རྒྱུན་རིང་མོ་ཡིས།།
ལུས་སེམས་ལྷན་དུ་དེད་པ་ཡིས།།
ནམ་ཞིག་ཕུང་བོའི་རྩེ་མོ་ནས།།
རྣམ་ཤེས་བུང་བ་རྒྱང་དུ་འཕུར།།
སྤུ་སྡུག་གཉིས་སྐྱེས་བྱ་ཡི་ཁྱུ།།
ངང་ཚུལ་དེ་ཡིས་རབ་གདུང་སྟེ།།
དབྱངས་བདུན་ག་བུར་བསིལ་བའི་གླུ།།
མགྲིན་པའི་ལམ་ནས་ཁེགས་པ་འཛིན།།
ཁ་དོག་སྣ་ལྔའི་བཞིན་རས་ཅན།།
ཚར་དུ་དངར་བའི་ཆུ་སྐྱེས་ཚོགས།།
མྱ་ངན་ཚོར་བ་ཁུར་ལྕི་སྟེ།།
བཀྲག་མདངས་ཉམས་པའི་ཟོལ་གྱིས་དུད།།
ཏིང་འཛིན་གཉིད་དུ་ཡུར་བ་ཡི།།
དྲང་སྲོང་རྒན་པོས་བསམ་གཏན་གྱི།།
བདེ་བ་དོར་ནས་སྡུག་བསྔལ་ལ།།
ལག་ལྡན་པད་མཚོར་བཞིན་དུ་འཇུག།
ཕྲ་རགས་སྣོད་བཅུད་རི་མོའི་གཟུགས།།
སྙིམ་པའི་མཐིལ་དུ་བླངས་འདྲ་བའི།།
ལྷུན་ཆགས་རི་ཡི་མུ་ཁྱུད་ཀྱིས།།
སྐྱོ་བའི་རྣམ་འགྱུར་བཞིན་ལ་འཛིན།
ཡིད་ལ་བརྣག་དཀའི་མཚོན་གདེངས་པའི།།
ཕོ་གཞོན་དེ་ནི་དྲན་གདུང་གིས།།
ལུས་ཀྱི་ཤ་རྣམས་ཡོངས་བྲི་སྟེ།།
ཀེང་རུས་ཁོ་ནའི་གཟུགས་ཀྱིས་འཚོ།།
སྙིང་སྡུག་དགའ་མའི་དྲན་པའི་ཁུར།།
སེམས་ཀྱི་རྩེ་ལ་རབ་ལྕི་བས།།
བྱང་ཕྱོགས་གངས་ཅན་རི་བོ་ལ།།
གོམས་ཁ་དཀྱུ་བའི་ཉེར་བསྡོགས་བརྩམས།།
དེ་ཚེ་རླུང་གི་འགྲོས་ལྡན་པའི།།
མཁའ་ཡི་གྲུ་ལ་ཉེར་བརྟེན་ནས།།
གངས་ལྗོངས་ནོར་འཛིན་བུ་མོའི་ལྟོར།།
རིང་བོར་མ་ཐོགས་བདེ་བར་སོན།།
ཉི་ཟླའི་རྣ་ཆ་དཔྱངས་པ་ཡི་།།
གངས་ཀྱི་ས་འཛིན་ལྷུན་ཆགས་པ།།
མཐོང་བའི་མོད་ལ་ཡིད་ཀྱི་རྩེར།།
དགའ་བདེ་འབུམ་གྱིས་རབ་ཏུ་འཁྱུད།།
དཀར་སེར་སྔོན་པོའི་འཛུམ་རིས་ཀྱིས།།
མཁུར་དུ་ལང་ཚོའི་མདངས་བྱིན་པའི།།
ཚར་དུ་དངར་བའི་ཆུ་སྐྱེས་ཀྱིས།།
མིག་ལ་མཛེས་པའི་དཔལ་ཡོན་སྦྱིན།།
རྫ་ཆབ་ག་བུར་བསིལ་མོ་ཡི།།
ལྷུང་ལྷུང་དབྱངས་ཀྱི་རྒྱུད་མང་གིས།།
གསེར་ལྡན་བཞིན་རས་འཁྲུད་པ་ལ།།
ཟུར་མིག་བུང་བའི་གཤོག་སྒྲ་འགྱུ།།
འབྲོང་གཡག་རྒོད་པོའི་རྭ་རྩེ་ནི།།
ཨ་སྔོན་མཐོངས་སུ་གདེངས་པ་ཡིས།།
རྒྱུ་སྐར་ལྷན་དུ་འཁོད་པའི་ཕྲེང་།།
ཅང་མེད་སྟོང་བའི་དབྱིངས་སུ་བྲོས།།
སྤྲིན་གྱི་ཚོམ་བུ་ས་ཡི་གཞིར།།
ཕོན་པོར་བརྡལ་འདྲའི་བལ་ལྡན་ཁྱུ།།
མིག་གིས་འཚོ་བའི་ན་ཆུང་མའི།།
རྫི་གཞས་དྭངས་མོ་རྣ་ལ་ཞིམ།།
ཕ་ས་གངས་དཀར་རི་བོའི་ལྗོངས།།
འདྲེན་བྱེད་དཔལ་དུ་ཉེར་ཐོབ་པས།།
ཀུན་རྟོག་སེམས་ཀྱི་ནམ་མཁའ་རུ།།
སྐྱོ་སྣང་སྤྲིན་གྱི་རེག་བྱས་སྟོང་།།
འོན་ཀྱང་དགའ་གྲོགས་འདས་པའི་གཏམ།།
དགའ་སྣང་འཕྲོག་པའི་ཆོམ་པོ་བཞིན།།
ཐོས་འཛིན་རྩེ་རུ་སོན་པ་ན།།
སྙིང་ཁོང་སྡུག་གི་ཕྲེང་བས་མནན།།
རྣ་ལ་གཟན་པ་ངུད་མོའི་སྐད།།
མགྲིན་པའི་རྒྱུད་ལས་ཤོར་བ་ན།།
རི་དང་ཆུ་བོའི་ཚོགས་དག་གིས།།
དུ་ཁའི་ཕོན་པོ་སྙིང་ལ་འཛིན།།
མྱ་ངན་དུག་གི་བཤུལ་ལམ་ལ།།
ཉིན་མཚན་ཕྲེང་བར་བརྒལ་བ་ཡིས།།
ཡིད་འོང་ལང་ཚོའི་རང་མདངས་ནི།།
མི་སྡུག་རྒ་བའི་ཁུར་གྱིས་འཁྱུད།།
ནམ་ཞིག་སྲིད་པའི་སྙིང་བོ་ནི།།
རླུང་ཁར་འཕྱན་པའི་སྒྲོན་མེ་དང་།།
ཤིང་བལ་བཞིན་དུ་ཉེར་མཐོང་ནས།།
ངེས་འབྱུང་སྣང་བ་ཅི་ཡང་འཁྲུག།།
ད་ནི་ངུར་སྨུག་བླ་གོས་ཀྱིས།།
ལུས་ཀྱི་འཁྲི་ཤིང་རབ་བརྒྱན་ཏེ།།
ཚངས་སྤྱོད་ཁྲིམས་ཀྱི་ཞགས་པ་ཡིས།།
སྒོ་གསུམ་བུ་མོ་དམ་དུ་བཅིངས།།
ལེགས་བཤད་སྨྲ་བའི་རོ་འཛིན་ཅན།།
གཤེས་གཉེན་ལྷ་ཡི་དབང་བོ་དག།།
བསམ་སྦྱོར་དག་པའི་བསྙེན་བཀུར་གྱིས།།
སྤྱི་གཙུག་རལ་བའི་རྩེ་ལ་མཆོད།།
བཅུ་ཕྲག་རིག་པའི་ཐང་ཆེན་དུ།།
གུས་རྟག་ཅང་ཤེས་བཟང་བོ་ཡི།།
རྩེད་འཇོའི་བང་ཁ་མ་ལྷོད་པར།།
ཤེས་བྱའི་མེ་ཏོག་ཅི་ཡང་བཏུས།།
ལུང་རིགས་སྨྲ་བའི་གྲྭར་ཞུགས་ཏེ།།
རྩོད་པའི་ལྕེ་ཞགས་འཁྱུག་པ་ན།།
རྒོལ་ངན་དྲེགས་པའི་རི་མོ་ནི།།
མཁའ་ཡི་རེག་བྱའི་ཚུལ་ལ་རྟོག།།
གཙུག་ལག་ནོར་གྱི་བློ་གྲོས་མ།།
རྣམ་དཔྱོད་གོམ་པ་གཅིག་གིས་ཀྱང་།།
གཞལ་བར་ནུས་པས་དཔལ་བདག་གི།།
འཇུག་པ་ལྔ་བའི་ཁེངས་པ་འཕྲོགས།།
གཡས་འཁྱིལ་མགྲིན་པའི་ཆ་རེར་ཡང་།།
ལེགས་བཤད་དོག་པ་འབུམ་ཆགས་པས།།
སྐལ་བཟང་བུང་བའི་ཁྱུ་ཚོགས་ཀྱིས།།
སྲེད་པའི་གདུང་བ་སྙིང་ལ་འཛིན།།
མང་ཐོས་ནམ་མཁའི་ཐུ་གཤམ་དུ།།
མ་ཆུད་མཁས་བྱའི་དངོས་པོ་དེ།།
འཇིག་རྟེན་མེས་པོའི་སྤྱན་མང་གིས།།
ཕྱོགས་མཐར་བཙལ་ཡང་དམིགས་སུ་མེད།།
འཆད་རྩོད་རྩོམ་པའི་འོད་སྣང་གིས།།
བློ་གསལ་མྱུ་གུ་བསྐྱེད་བསྲིངས་པའི།།
གྲགས་སྙན་གསེར་གྱི་ངང་མོ་ནི།།
ཕྱོགས་བྲལ་མཚོ་ཡི་ངོགས་ན་རྒྱུ།།
མཁྱེན་རབ་གསེར་གྱི་དབྱིག་འཛིན་ལ།།
ལུང་རྟོགས་ཡོན་ཏན་ཁུར་ལྕི་བས།།
མཁས་མང་རལ་བའི་མེ་ཏོག་གིས།།
ཞབས་རྡུལ་སྤྱི་བོར་ལེན་ལ་བྲེལ།།
མཁས་བཙུན་བཟང་བོའི་ཟློས་གར་ལ།།
བསྔགས་པའི་དབྱངས་ཀྱི་ཕྲེང་བ་ཡིས།།
རྐང་གཉིས་དག་གི་སྨྲ་ལྕེ་ནི།།
ནམ་ཞིག་ཡོངས་སུ་བྱེར་ལ་དོགས།།
ལེགས་གསུང་སྦྲང་ཆར་བསིལ་མོའི་རྒྱུན།།
གདུལ་བྱའི་འཛིན་མར་སིམ་པ་ཡིས།།
མགྲིན་བཅུ་གདུང་བའི་མྱ་ངན་གྱིས།།
དབུགས་དབྱུང་བྲལ་བའི་ངང་ཚུལ་བརྟེན།།
དེ་ལྟར་བརྗོད་བྱའི་ཉལ་འགྲོ་ལ།།
རྗོད་བྱེད་རླབས་ཕྲེང་འབུམ་གཡོ་བའི།།
ངག་རིག་དབྱངས་ཅན་རིག་པའི་ཆབ།།
བདག་བློ་གངས་ཀྱི་ཁྲོད་ལས་ཐོན།།
འདིར་འབད་དགེ་བས་རིག་བྱེད་ཀྱི།།
ཟླ་བའི་དཀྱིལ་འཁོར་མ་འཐོར་བར།།
ཚིག་རྒྱན་གསར་བའི་འོད་སྣང་གིས།།
མཐའ་དག་འཇིག་རྟེན་གསལ་གྱུར་ཅིག།།
 

རྩོམ་ཁུངས། ངེད་དྲ་བ།