ཐུབ་བསྟན་ཡིད་འཕྲོག་ཟླ་བའི་བཞིན་ལ་རྩོད་ལྡན་མུན་པའི་གོས་འཆང་ཞིང་།།
བསྟན་འཛིན་རྒྱུ་སྐར་ཕྲེང་བའི་ཁྱུ་ཚོགས་མྱང་འདས་ཆུ་ལྷའི་པང་དུ་བཞུད།།
བདག་བསྟོད་གཞན་ལ་སྨོད་པའི་གཏམ་གྱིས་ཆོས་སྨྲའི་ཁུར་འཛིན་ཅོལ་ཆུང་དག།
བརྩི་བར་མ་ནུས་མོལ་འགལ་བུ་ཡིས་མཐོ་རིས་གནས་སུ་ངལ་གསོ་བརྟེན།།
ཐུབ་གསུང་ཉིན་བྱེད་གསར་བའི་དཔལ་ལ་བློ་གྲོས་མིག་ལྡོང་འབྱུང་བྱའི་ཁྱུ།།
བསླབ་གསུམ་ཆུ་སྐྱེས་མགུལ་རྒྱན་དང་བྲལ་ཁྲིམས་འཆལ་ཤིང་སྐམ་རེངས་པའི་རྩེར།།
ཉེས་བཤད་ཐན་སྐད་ཅི་ཡང་བསྒྲགས་པས་བླུན་རྨོངས་རིག་པའི་ཁྱེའུ་ནི།།
རྒྱུ་དང་འབྲས་བུ་ལྡོག་པར་སྨྲ་བའི་ལྟ་ངན་མུན་པའི་ཁྲོད་དུ་འཕྱན།།
ངུར་སྨྲིག་བླ་གོས་ཕྲག་ཏུ་འཆང་བཞིན་མི་སྡུག་དཀོར་གྱི་ཕུང་བོ་ལ།།
འདོད་སྲེད་ལྕེ་བརྒྱ་ཤུགས་ཀྱིས་རྐྱོང་བའི་ཚུལ་གནས་བཙུན་གཟུགས་མགོ་རིལ་ཚོགས།།
སྡིག་ལྟུང་ཁྲག་གི་མཚོ་ལ་འཇུག་གིན་ཁེ་ཚོང་གཡོ་སྒྱུའི་གར་སྟབས་ཀྱིས།།
ཉིན་མཚན་བག་མེད་འདའ་བ་མཐོང་ཚེ་ཡིད་ལ་བརྣག་དཀའི་ཚོར་བ་ལྡང་།།
མི་ཚེ་ཧྲིལ་བོར་ལྟོ་སྐྱ་གོས་ཀྱིས་གཞུང་ལུགས་རབ་འབྱམས་སྨྲ་བའི་ཁུར།།
མི་ལྡོག་བརྩོན་པའི་དཔུང་གིས་འདེགས་ཀྱིན་ཞི་དལ་བག་ཡོད་སྤྱོད་པ་དག།
གྱ་ནོམ་ལོངས་སྤྱོད་ནོར་གྱིས་དབུལ་ཞེས་མི་སྙན་ཁྲེལ་དགོད་སྒྲོག་པའི་གླུས།།
གྲགས་ལྡན་དབྱར་སྐྱེས་རྫ་རྔའི་དཔལ་བཞིན་གནམ་སའི་དཀྱིལ་འཁོར་རལ་བར་བྱེད།།
སེམས་རྒྱུད་གྱོང་བོ་ཆོས་དང་མ་འདྲེས་འབབ་ཆུའི་ཁྲོད་ཀྱི་རྡོ་བ་བཞིན།།
སེར་སྣའི་སྤར་ཁ་གླང་ཆེན་སྟོང་གི་རྩལ་དང་ཤུགས་ཀྱིས་འབྱེད་པར་དཀའ།།
གཞུང་མང་སྦྱངས་པའི་ཁུར་དང་བྲལ་ཡང་དམ་ཆོས་སྨྲ་བའི་བརྟུལ་ཞུགས་ཅན།།
སྐྱེ་སྤྲུལ་མིང་སྐམ་ལྷུར་ལེན་དག་གིས་ནོར་འཛིན་བཞིན་རས་དོག་པོར་བགྱིད།།
ཁྲིམས་གཙང་དངུལ་དཀར་མེ་ལོང་ངོས་སུ་རྣམ་གསུམ་གོས་ཀྱི་བྱི་དོར་དབེན།།
ཇི་ལྟ་ཇི་སྙེད་ཤེས་བྱའི་མཁའ་ལ་རྒྱ་ཆེན་ཐོས་པའི་སྒྲོན་མེ་དཀོན།།
དགེ་འདུན་ཕན་ཚུན་ཐུགས་ཀྱི་མཚོ་ལ་མཐུན་སྒྲིལ་ངང་མོའི་གཡོ་བ་སྤངས།།
འདུས་སྡེ་སྐྱེད་ཚལ་ཡངས་པའི་ལྟོ་བར་འདུ་འཛིའི་བུང་བ་གར་དུ་འགྱུ།།
རྙེད་བཀུར་འཕྱོན་མའི་འགྲམ་ཆང་ལ་ཆགས་རྐང་གཉིས་བ་ཀུ་ལ་ཡི་ཚོགས།།
ལེགས་བཤད་ཉི་ཟེར་འཇམ་པོའི་རྡུལ་ལ་མགོ་བོ་ཟུམ་པའི་ངན་སྤྱོད་ཀྱིས།།
རྟག་ཏུ་སྡིག་ལྟུང་མུན་པའི་གཅོང་ལ་གོམས་ཁ་འཁྱོག་པོར་དཀྱུ་བའི་འགྲོས།།
མཐོང་བའི་མོད་ལ་སེམས་ཀྱི་རི་དྭགས་ཨ་ཐང་སྣོན་མ་དགུ་རུ་ཆད།།
རྒྱུ་ཟས་ནོར་ཕྱུགས་ཚར་དུ་དངར་ལ་བདག་འཛིན་འཆིང་བ་དམ་པོ་ཡིས།།
བློ་སེམས་སྙོམས་པོ་གཏིང་ནས་དཀྲུགས་པས་བདེ་བའི་རྨི་ལམ་རྙེད་དཀའ་ཞིང་།།
འདོད་ཡོན་དུག་ཆུས་ཤེས་རྒྱུད་སྦགས་པའི་མ་ནུའི་བུང་བ་འབུམ་ཕྲག་ནི།།
རྙེད་དང་བཀུར་སྟིའི་ལྗན་ལྗིན་དྲི་ལ་བག་མེད་རྒྱུ་བའི་ཚུལ་འདི་སྐྱོ།།
མི་གཤིས་རང་བཞིན་འཁྱོག་པོའི་ལྗོན་པར་དུག་གསུམ་སྤྲུལ་ནག་བྲང་འགྲོས་ཀྱིས།།
རྒྱུ་བའི་མི་སྐྱ་ཕོ་མོ་དག་ནི་འདུ་འཛིའི་གཡེང་བ་ལང་ལོང་གིས།།
དོན་ཆེན་ཐར་བའི་སྙིང་བོ་མི་ལེན་ཚེ་འདིའི་དགའ་སྡུག་ཐན་ཐུན་གྱིས།།
ན་ཚོད་དོན་མེད་ངང་ལ་ཡོལ་འདིས་ཤུགས་རིང་མི་འབྱིན་རང་དབང་ཅི།།
ནུ་རྒྱས་ཆུ་ཤེལ་ཕོན་པོའི་ཁུར་གྱིས་གོམས་པའི་འགྲོས་ལ་བག་ཡོད་སྟེར།།
ཆགས་པའི་ཟུར་མིག་གྱ་གྱུར་གཡོ་བས་སྲེད་ལྡན་ཡིད་ཀྱི་བུང་བ་འཆིང་།།
དཀར་དམར་ལང་ཚོའི་རང་མདངས་མ་འདྲེས་བཞིན་རས་འཛུམ་དཀར་ཕྲེང་བ་ཅན།
གཟུགས་བཟང་ན་ཆུང་བུ་མོའི་ཚོགས་ནི་གློ་བུར་རྒས་འཁོགས་ལུས་ཀྱིས་འཚོ།།
དགྲ་ལ་མཚོན་དང་གཉེན་ལ་བྱམས་པ་ཆུ་གཉེར་གཡོ་བའི་གར་ལ་འཁུ།།
འཁོར་དང་ཕུན་ཚོགས་ལྷུར་ལེན་བྱེད་པ་སྨྲིག་སྒྱུའི་མཚོ་ལ་སྙེག་དང་མཚུངས།།
རང་བདེ་ཁོ་ན་དོན་དུ་གཉེར་བ་འཇའ་ཚོན་འཛིན་པའི་རྗེས་སུ་འགྲོ།།
ད་ནི་ངེས་འབྱུང་སྐྱོ་བ་མ་བཟོད་མིག་ཆུའི་ཕྲེང་བ་མཁུར་དུ་ལྷུང་།།
སྙིང་དུ་སྡུག་པའི་གྲོགས་བཤེས་དེ་དག་ངེས་མེད་དྲི་བཞོན་རླུང་གི་སྤུན།།
མཛའ་བརྩེ་གསེར་གྱི་ངང་བའི་ན་ཆུང་འཕེལ་འགྲིབ་རྫིང་བུའི་ཁ་ལ་འཕྱོ།།
ཡོད་ཡོད་འདྲ་ཡང་དོན་གྱིས་སྟོངས་པའི་མི་རྟག་འཁོར་བའི་བྱ་དངོས་དག།
ཀྱེ་མ་ཀྱི་ཧུད་གང་ལ་བསམས་ཀྱང་ཞེ་སེམས་སྐྱོ་བའི་རྒྱུ་རུ་གྲུབ།།
ཟིན་མེད་སྨྲིག་སྒྱུའི་རེག་བྱ་ལ་འཁུ་ཟ་ཟིའི་ལས་ཀྱི་ཡོ་ལང་གིས།།
ལུས་སེམས་དལ་མེད་ཆོས་བརྒྱད་རླུང་བུས་ཤིང་བལ་བཞིན་དུ་བསྐྱོད་པ་ལས།།
ཅི་ཡང་མ་འཐོབ་སྙིམ་པའི་མཐིལ་དག་ཅང་མེད་སྟོང་བར་ལྷག་པའི་ཚུལ།།
བསམ་ཞིང་བསམ་ཞིང་སྣང་བ་ཕྲ་མོ་ངེས་འབྱུང་ལྕགས་ཀྱུ་རྣོན་པོས་ཟིན།།
དེ་ལྟར་སྲིད་པ་འཁོར་བའི་རང་བཞིན་མི་རྟག་རླུང་ཁའི་སྒྲོན་མེ་དང་།།
དཔལ་འབྱོར་ལོངས་སྤྱོད་ཆུ་འཛིན་ལྟ་བུར་མི་བརྟན་གཡོ་བའི་ཆོས་ཉིད་ལ།།
ཡིད་ཀྱི་ན་ཆུང་གཏིང་ནས་སྐྱོ་བའི་ཐོལ་བྱུང་ཚིག་གི་མགུར་ཆུང་འདི།།
བྲག་ཆའི་དབྱངས་དང་གཅམ་བུ་མ་ཡིན་ངེས་འབྱུང་དབྱངས་ཀྱི་ཕྲེང་བས་སྤེལ།
 

རྩོམ་ཁུངས། ངེད་དྲ་བ།