བྱིས་པའི་ངེས་འབྱུང་གི་བསླུ་བྲིད་ཕྲ་མོས།།
ཁེར་རྐྱང་འཚོ་བ་ཡི་ལམ་ཁར་གཏད་པའི།།
ལང་ཚོ་དར་བབས་ཀྱི་གསར་བུ་ཁ་ཤས།།
ཁ་སང་དེ་རིང་གི་སྟོན་པའི་རྗེས་འཇུག།
 
བརྩེ་བ་འདིར་སྣང་གི་ཕྱག་བརྒྱས་བཏབ་ཤིང་།།
རེ་བ་རྒྱང་རིང་གི་ཡུལ་དེར་ཕྱོགས་པའི།།
བློ་ཁ་བྱིས་ཆུང་གི་རྨི་ལམ་ངོགས་ཀྱི།།
སྙིགས་མ་ལྔ་བདོ་ཡི་བྱིས་པའི་མགུར་ཆུང་།།
 
ནུབ་ཁའི་ཉི་འོད་ཀྱི་མདངས་ལ་ཞེན་ཆགས།།
རྒས་པའི་ཕ་མ་ཡི་བརྩེ་བར་སེམས་འཁྲེང་།།
ཆུང་འདྲིས་བྱམས་པ་ཡི་གཤིས་ཀར་དུངས་པས།།
སྣང་བ་ཁེར་རྐྱང་གི་སྙིགས་མའི་བྱིས་མགུར།།
 
འཚོ་བ་རང་བྱུང་གི་ཟས་ལ་བརྟེན་པའི།།
རྣལ་འབྱོར་དབང་ཕྱུག་སྟེ་མི་ལ་རས་པ།།
ཕྱི་ན་ལང་ཚོ་ཡི་མཛེས་པའི་དབུལ་ཡང་།།
ངག་ན་མགུར་ཆུང་གི་དབྱངས་རྟ་སྙན་པ།།
 
ཁ་མཁས་ཡོག་ལུ་ཡི་བྱིས་པ་སྣབ་ལུག།
ཚུལ་འཆོས་རྫུ་བག་གི་ཀློང་ལ་ཟིམ་པའི།།
མ་འོངས་ལོ་ཟླ་ཡི་འཚོ་བའི་ངོས་ལ།།
རྐང་བས་རི་མོ་ཞིག་འབྲི་དགོས་བྱུང་ངོ་།།
 
ནམ་མཁའི་སྤྲིན་དཀར་གྱི་རྒྱུ་བ་ལྷོད་པོས།།
ཨ་ཐང་དགུ་ཆད་ཀྱི་འགྲུལ་བཞུད་ལམ་ཁར།།
ལེ་ལོའི་གཤིས་ཀ་ལ་སྐུལ་བ་འདྲ་བས།།
གོམ་པའི་འདེགས་འཇོག་ཀྱང་ཕྱིར་ལ་ལྷོད་སོང་།།
 
གདོང་གི་བ་སྤུ་ལ་ཕོག་པའི་ཉི་ཟེར།།
དུས་ཀྱི་རླུང་བུ་ཡིས་ཡང་ཡང་བསེད་པའི།།
སེམས་ཀྱི་ཟབ་ས་ལ་སྨིན་པའི་དྲོད་ཐིགས།།
དབྱར་ཁའི་ཉི་འོད་ཀྱི་ཀློང་ནས་འཁྱག་འགྲོ།།
 
ཉི་མ་རི་རྒྱབ་ཀྱི་ཕར་ལ་ཡལ་བས།།
མུན་པ་ཚུར་རོལ་གྱི་གླིང་ཀར་ཕོག་སོང་།།
སྙིགས་མ་ལྔ་བདོ་ཡི་འགྲོ་བ་ཀུན་ལ།།
རེ་ཞིག་དབྱུགས་དབྱུང་གི་ངལ་གསོ་བྱིན་སོང་།།
 
སྙིགས་མས་བྱིས་མགུར་གྱི་དབྱངས་རྟ་ཞིག་གིས།།
འདོད་ཁམས་རྨི་ལམ་གྱི་གཞུང་ནས་དཀྲོགས་ཏེ།།
སེམས་ཀྱིས་རྒྱལ་ཁམས་ལ་རོལ་བས་ལྟས་སུ།།
རང་གི་བརྩེ་བ་ཡི་སྒྲོམ་དུ་བཅུག་སོང་།།
            2011ལོའི་ཟླ་10ཚེས་18ཉིན་རེབ་གོང་ནས།
 

རྩོམ་ཁུངས། ངེད་དྲ་བ།