(གླེང་གཞི)
གསུམ་གསུམ་ཞི་བདེའི་ཉི་ཟླ་སྐར་གསུམ་མཆོག།
གངས་ལྗོངས་གངས་རིའི་རྩེ་ནས་མངོན་དུས་སུ།
ལ་རྒྱའི་ལས་དོན་འཁུར་བའི་སྐར་ཆུང་འདི།
སཱ་ལའི་ལྗོངས་ཀྱི་རྒྱན་དུ་ཆས་ནས་ཡོང་།

 མ་མ་གཉིས་བར་འཁུ་བའི་བཞིན་བཟང་མ།
སྒྲོལ་སྒྲོལ་དུས་རིམ་བཞི་ལས་ཡངས་བོར་སྒྲོལ།
འཛིན་འཛིན་དབྱངས་བདུན་མ་ལུས་ཐོས་བར་འཛིན།
རིག་རིག་འཇིག་རྟེན་མཛེས་སྡུག་མཐའ་དག་རིག།

ཁྱོད་ཀྱི་སྙན་པའི་སྐད་དང་ལང་ཚོའི་དཔལ།
གངས་སྐྱེ་སྨྱོན་པའི་གཟིགས་མོར་གྱུར་བའི་དུས།
མཛེས་སྡུག་ཐམས་ཅད་མཐོང་དང་ཐོས་ཟེར་བ།
སྒྲ་གཟུགས་འཛིན་པ་གཉིས་ཀྱི་ལབ་ཏུ་གྱུར།

（གཞུང་དངོས）
མི་རིགས་སྲོལ་རྒྱུན་གཙུག་ཏུ་བཀུར་ཏེ།
ཁ་སེམས་བོད་མིའི་ལས་ལ་བྲེལ་བཞིན།
ཁ་སང་སྟོང་གི་གཏམ་རྒྱུད་ཁྲོད་ནས།
ཡབ་མེས་དག་གི་དར་ཆ་བསྒྲེངས་སོང་།

འཁྲུངས་སྐར་ཉིན་གྱི་ཤིས་ཚིག་ཁྲོད་ནས།
བྱམས་ལྡན་མ་ལོའི་བརྩེ་བ་རྙེད་དེ།
སྙན་མོ་གླུ་ཡི་མ་སེམས་གསོ་དུས།
གཤིས་བཟང་བུ་མོའི་མཚན་ཉིད་བསྩལ་སོང་།

བོད་རིགས་བུ་མོའི་ལས་དབང་དྲན་ནས།
《འབྲི་མོ་དུང་ཆུང་དཀར་མོ》ར་འགྲོགས་ཏེ།
དགོ་དགོ་ངག་གི་དབྱངས་རྟར་འགུག་དུས།
སྨན་ཆུང་སྟོང་གི་སྐྱོ་གདུང་བསལ་སོང་།

《ཁྲི་ཤོར་རྒྱལ་མོ》འི་རླབས་དང་འགྲོགས་ནས།
ཡངས་བའི་རྩྭ་ཐང་ཆེན་མོའི་མངའ་རུ།
《དཔའ་རིས་བ》་ཡི་བདེན་དོན་བརྗོད་དུས།
བསྟོད་པའི་རླབས་ཚིག་ཁྱེད་ལ་གཏོར་སོང་།

ཉམ་འགྲོ་སྟོང་གི་སྡུག་བསྔལ་བསམ་ནས།
དད་པའི་སོར་མོ་སྙིང་ཁར་སྦྱར་ཏེ།
བདེ་ལྡན་ཞིང་གི་《ལྷ་སར་འགྲོ》་དུས།
ཐམས་ཅད་སེམས་པ་ཁྱེད་ལ་འཁོར་སོང་།

ཁྱེད་ཀྱིས་སྙན་པའི་སྐད་ངག་སྤྲས་ཏེ།
བཀྲ་ཤིས་གཡང་གི་ཕ་ས་འདི་ནས།
《ལྷན་འཛོམས》་སྟོང་གི་ཁ་གཡང་སྒྲོག་དུས།
སྙན་པ་གངས་རིའི་རྩེ་ལ་འཕུར་སོང་།

（མཇུག་གཏམ）
སྙན་འཇེབས་སྟོང་གི་དབྱངས་རྟ་མཁའ་དབྱིངས་ནས།
ཉམ་འགྲོ་ཁྲི་མ་འབུམ་གྱི་རྣ་གྲོགས་ལ།
ཡང་ཡང་ལྷགས་ཚེ་སྒྲ་གཟུགས་འཛིན་པ་འདི།
རྒྱང་རིང་ཁྱེད་ཀྱི་ཕྱོགས་སུ་ཤོར་ནས་ནི།

རབ་སྦྱོར་ཚིག་གི་ཆ་ལ་མི་མཁས་ཀྱང་།
རབ་མཛེས་གངས་དཀར་སྲས་མོའི་ཁྱད་ཡོན་ལ།
རབ་དཀར་སེམས་པའི་རྒྱུད་ནས་བསྟོད་འདོད་དེ།
རབ་དཀར་ཤོག་བུའི་ངོས་ལ་ནག་ཐིག་བཀོད།
                    ༢༠༡༡ལོའི་ཟླ་༡༡ཚེས༡༩ཉིན།

རྩོམ་ཁུངས། ངེད་དྲ་བ།