ས་ལ་དགེ་བཅུ་དགེ་བཅུ་མ་བརྩི།།
ས་གཞི་ཁྲོས་པའི་གཡོ་འགུལ་ཞིག་གིས།།
ས་ཆེན་ཡུལ་ཤུལ་མགོ་རྟིང་སློག་པ།།
ས་སྟེང་འདི་ཡི་ཀུན་ལ་གསལ་ཨང་།།
 
ཆུ་ལ་དངས་མོ་དངས་མོ་མ་ཟེར།།
 ཆུ་ཡིས་བཟོས་པའི་གོད་ཆག་ལྗིད་དེ།།
ཆུ་ཡིས་བསྣུམས་པའི་འབྲུག་ཆུ་གྲོང་ཁྱེར།།
ཆུ་བོའི་རྒྱུན་གྱི་གྲུ་ལ་གྱུར་སོང་།།
 
མེ་ལ་དྲོད་མོ་དྲོད་མོ་མ་ཟེར།།
 མེ་ཟུག་བྱས་ན་ཚ་བ་སྣང་བཞིན།།
མེ་རི་འཕྱུར་ཏེ་རི་ཀླུང་ཐམས་ཅད།།
མེ་ཡིས་བསྲེག་ནས་ཟས་ཏེ་བུད་འགྲོ།།
 
རླུང་ལ་བསིལ་མོ་བསིལ་མོ་མ་ཟེར།།
 རླུང་ལྷ་རྒན་པོ་ཁྲོས་ཐེངས་ཤིག་གིས།།
རླུང་གིས་ཁྲིད་པའི་རྒྱ་མཚོ་ཆེན་པོ།།
 རླུང་ལྟར་འཕུར་ཏེ་ཉི་ཧོང་བཅོམས་སོང་།།
 
ཁ་བ་དཀར་བོ་དཀར་བོ་མ་ཟེར།།
ཁ་བས་ཁངས་འཁྱག་མཐུག་པོ་འཕངས་ཏེ།།
ཁ་བ་ཅན་ལ་གྱོང་གུད་བཏང་བ།།
ཁ་སེམས་གཉིས་ཀྱིས་བརྗེད་ཀྱིན་མི་འདུག།
 
སེམས་ལ་བཟང་བོ་བཟང་བོ་མ་ཟེར།།
 སེམས་ཀྱི་འདོད་ཧམ་ཆེན་པོ་དེའི་ཕྱིར།།
སེམས་ལ་མ་དྲན་སྐྱོན་ཞིག་སྒྲུབ་ཏེ།།
སེམས་པ་ནམ་ཡང་སྡུག་གིས་གཙེས་འགྲོ།།
 
མི་ལ་གཤིས་བཟང་གཤིས་བཟང་མ་ཟེར།།
མི་ཡིས་སྒྲུབ་པའི་བླུན་རྨོངས་སྤྱོད་པས།།
མི་རིགས་ཅེས་ཏེ་ཁུ་ཚུར་འཕྱར་འགྲོ།།
མི་གཅིག་སྲོག་ཆགས་ཁ་ལ་མིད་འགྲོ།།
 
མི་ནི་རིག་བཟང་རིག་བཟང་མ་རེད།།
མི་ཡིས་ཡོད་ཚད་རང་གིས་སྒྲུབ་ཀྱང་།།
མི་ཐབས་བསམ་པ་གཞན་ལ་བཅིངས་ནས།།
མི་ཤེས་ཁུལ་གྱིས་འཁང་ར་བྱས་འགྲོ།།
 
ང་ལ་ཁ་ངན་ཁ་ངན་མ་ཟེར།།
ང་ཡིས་ཁ་མ་མེད་པའི་ཚིག་གཅིག།
ང་རང་ཚོ་ལ་བཤད་ཀྱང་མེད་ལ།།
ང་ལ་ཁོམ་པ་དེ་ཡང་མི་འདུག།
           ༢༠༡༡ ༧ ༢༢  བིས་མདོ་དགོན་པ་ནས་ཤར་མར་སྦྱར།།
 

རྩོམ་ཁུངས། ངེད་དྲ་བ།