ལས་འཕྲོ་ཉིད་ནི་སྤང་གི་འཇའ་ཚོན།།
ཇི་ལྟར་བཅར་ན་དེ་ལྟར་བཀྱེད་འགྲོ།།
འཁྲེན་པའི་སེམས་འདི་དུང་ཟླའི་རླབས་རིས།།
དུངས་པའི་འོད་ཞགས་པདྨར་འཐིམ་སོང་།།
 
མ་མཐོང་གྲོགས་པོ་ལོ་ཟླ་བརྩེགས་མ།།
འཁྲེང་བའི་སེམས་འདི་དེ་ཡི་རྒྱུན་མ།།
གདུང་བའི་སེམས་པ་ཟིན་ཐོར་བཀོད་པ།།
ད་ལྟ་མཐོང་ན་སྐྱོ་བའི་གཞི་མ།།
 
ཁ་པར་ལམ་ནས་ལན་འགར་མཇལ་བའི།།
སྐད་དེ་བསམ་ན་སེམས་ཀྱི་བདེ་བ།།
ཡིད་ཀྱི་འདུན་མ་འཕྲིན་ལ་བྲིས་པའི།།
སྐབས་དེ་དྲན་ན་གློ་བ་རངས་པ།།
 
མ་མཇལ་གྲོགས་དང་བྲལ་བའི་ལོ་ཟླ།།
མཛུབ་མོས་བགྲང་ན་ལོ་གྲངས་འཁྱོལ་འགྲོ།།
སེམས་ཀྱིས་དཔྱད་ན་ཁ་གྲངས་ནོར་འགྲོ།།
བརྒྱ་དང་བཞི་བཞི་ལོ་ངོ་བཅུ་གཉིས།།
 
གྲོགས་ཉིད་དྲན་དུས་སེམས་ཀྱི་སྨྲེང་བ།།
འདི་ཡིན་ཞེས་པའི་གདུང་བ་བཤད་ན།།
མཆི་མའི་རྒྱུན་ཐག་ཆུ་ཤེལ་ཕྲེང་བ།།
ལག་ནས་འཐོར་བའི་སྣང་ཚུལ་དངོས་མ།།
 
བདག་གི་སྣང་ངོར་མཛེས་པའི་མཐར་ཐུག།།
ཡིད་ཀྱི་རི་མོ་མེ་ཏོག་གད་འདྲ།།
སེམས་ཀྱི་འཇུ་ཐག་ཟླ་བ་ཚེས་འདྲ།།
དྲན་པའི་བློ་ན་མཚོ་མོ་གཡོས་འདྲ།།
 
ན་སོའི་སྤང་ལྗོངས་སྟོན་གྱིས་དེད་དེད།།
ལང་ཚོའི་ཟིལ་བ་བ་མོས་སྒུལ་སྒུལ།།
གཟུགས་གཞིའི་བཀོད་པ་རྟོགས་བཟོ་བྱས་ན།།
ཚོར་བའི་ལུས་ལ་ཁབ་ཀྱིས་གཙེས་འདྲ།།
 
ལོ་ཟླས་འགྲུལ་བཞུད་གློག་དམར་འཁྱུག་འཁྱུག།།
གདོང་གི་གཉེར་མ་ཟླ་གམ་བཟོས་འདྲ།།
ལུས་ཀྱི་རྒུད་པ་ཤིང་སྐམ་ལྟ་བུའི།།
ཉམས་འདི་མཐོང་ན་གྲོགས་ཀྱིས་བཟོད་དམ།།
 
ཁྱོད་ཉིད་མཚོན་པའི་འདྲ་པར་གཅིག་པོ།།
ལྷ་སའི་བར་བསྐོར་གླིང་ནས་ལུས་སོང་།།
ཁྱོད་དང་འབྲེལ་བའི་ཨང་གི་བཅུ་བོས།།
ཁྱོད་རང་བོར་ནས་ཡུན་རིང་འགོར་སོང་།།
 
སེམས་ཀྱི་འཛིན་པ་རྡོ་ལ་བརྐོས་འདྲ།།
མཛེས་པའི་མིག་ཟུང་སྦྲང་མས་འགུལ་འཕག།།
དམ་པའི་ཚེམས་ཕྲེང་ངང་མོ་བསྟར་འདྲ།།
འདི་དག་བསམ་ན་ཁ་སང་གྱེས་འདྲ།།
 
མཛེས་པའི་མདང་གི་རྨི་ལམ་ནང་ལ།།
གྲོགས་ལ་དངོས་སུ་མཇལ་བ་རྨིས་བྱུང་།།
ཤིན་ཏུ་ཤིན་ཏུ་མངོན་སུམ་ལྟ་བུས།།
མུ་ནས་མུ་རུ་དྲན་དགོས་བྱུང་སོང་།།
 
མི་ཚེའི་རྨི་ལམ་ཐོག་མ་འཚོལ་དུས།།
འཚོ་བའི་གྱ་གྱུའི་སྐས་རིམ་སྙེགས་དུས།།
ཀ་ཁའི་སྦྱོར་ཀློག་དབྱངས་ལ་འགུགས་དུས།།
གྲལ་མཚེར་གྱུར་བ་ལས་ཀྱི་བཀོད་པ།།
 
དུང་བའི་སེམས་པ་ཁྱེད་ལ་ཤོར་ཞིང་།།
དགའ་བའི་འདུན་པ་འཕྲིན་ལ་བྲིས་ནས།།
འཁྲེང་བའི་སེམས་འདི་དང་དུ་ལོངས་ཞེས།།
སྐྱེངས་པའི་མགོ་བོ་དང་གར་སྨད་བྱུང་།།
འཚོ་བའི་གོ་སྐྱ་མཉམ་དུ་ཟ་ཞོར།།
ཞེན་པའི་དཔུང་བ་ལྷན་དུ་གཤིབ་ནས།།
དཔེ་ཆའི་བར་ནས་ཡང་ཡང་མཇལ་བའི།།
གྲོགས་ཀྱི་དྭངས་མ་ཡིད་ཀྱི་འཆང་ཐག།།
 
གནའ་བའི་འདས་སོང་བཤད་ལ་ང་དགའ།།
མཚར་བའི་སྒྲུང་ལ་ཉན་པར་ཁྱོད་དགའ།།
ཁྱོད་རང་དགའ་ན་ང་ཡང་དེ་དགའ།།
ཁྱོད་རང་བགད་ན་བདག་ལ་དེ་མཛེས།།
 
ལས་ཀྱི་བཀོད་པ་རི་ངོས་རྦབ་རྡོ།།
འདི་ལ་ཟློག་ཐབས་ཁྱོན་ནས་མི་འདུག།།
ཚེ་ཡི་འདུན་མ་ཁྱོད་དང་གཏན་གྲོགས།།
དེའང་རྨང་ནས་འགྲུབ་ཐབས་མེད་ཀི།།
 
འཇིག་རྟེན་ཆེ་ན་ཆེ་ཚད་མི་ཟིན།།
ཁྱོད་རང་འཚོ་སའི་ཁ་ཕྱོགས་མི་རྙེད།།
འཇིག་རྟེན་ཆུང་ན་ཆུང་ཚད་མི་ཟིན།།
མི་འདོད་ལས་ལ་བཤོལ་ཐབས་མི་འདུག།།
 
ཁྱོད་ཀྱི་འཕྲིན་པ་ཕྱོགས་བསྒྲིགས་བྱས་ནས།།
སྒམ་ཆུང་གྲུ་བཞིར་ཉར་ཚགས་བྱས་ཡོད།།
ཁོམ་པའི་དུས་སུ་ལན་རེར་བཀླག་གིན།།
མི་ཁོམ་ནའང་སྐབས་རེར་རག་དགོས།།
 
ཁྱོད་ཀྱི་སྣང་བརྙན་མཐའ་དག་ཤར་བའི།།
ཁྱོད་ཀྱི་སྤྱོད་ཚུལ་ཡོད་ཚད་འཆར་བའི།།
ཡིད་ཀྱི་མེ་ལོང་དྭངས་མོའི་ངོས་ན།།
ཁྱོད་ཀྱི་རྡོག་སྒྲ་ད་དུང་ཐྲིག་ཐྲིག།།
 
ད་ལྟ་ཧམ་སེམས་གཞན་ནི་ཅང་མེད།།
ད་དུང་ལས་འཕྲོ་ཏོག་ཙམ་ཡོད་ན།།
ཡིད་ཙམ་གྲོགས་དང་ཕྲད་པ་བྱུང་ན།།
ཁམས་འདྲིའི་ལག་འཇུ་ཙམ་ལ་འཁྲེང་ཡོད།།
 
                                        ༢༠༡༢  ༤  ༡༡ཉིན།
 
 
 
 

རྩོམ་ཁུངས། ངེད་དྲ་བ།