སྔོན་བསགས་ལས་ཀྱིས་དལ་འབྱོར་ལུས་རྟེན་ཞིག་ཐོབ་སྟེ།།
སྔོན་གོམས་དགེ་བའི་སྟོབས་ཀྱིས་དམ་ཆོས་དང་མཇལ་ཡང་།།
སྔོན་ནས་བརྩོན་པར་བྲལ་བའི་རྣམ་སྨིན་གྱི་ལས་ཀྱིས།།
སྔོན་གྱི་དམ་བཅའ་གཅིག་ཀྱང་མངོན་གསལ་ན་མི་འདུག།
 
བཟུང་ཡང་དབང་ན་མི་འདུག་མི་ཚེ་ཡི་རྟ་མཆོག།
བསུབས་ཀྱང་ཐབས་སུ་མེད་པ་དཔྲལ་བ་ཡི་རི་མོ།།
དོར་ཡང་རྫོགས་མཐའ་བྲལ་བ་ངེས་དོན་གྱི་དུཿཁ།།
འདུ་བྲལ་རེས་སུ་སྤེལ་བ་འཁོར་བ་ཡི་རང་མདངས།།
 
བཙལ་ཡང་རྙེད་པར་དཀའ་བ་འཁོར་བ་ཡི་རྒྱུ་ནོར།།
རྙེད་ཀྱང་ཆོག་ཤེས་བྲལ་བ་རྐང་གཉིས་ཀྱི་འདུ་ཤེས།།
སྐྱེ་འགྲོ་བང་གིས་རྒྱུགས་པ་རྒྱུ་ནོར་གྱི་ཆེད་ཡིན།།
སྐྱེ་བོས་རང་ཚུགས་འཆོར་བའང་རྒྱུ་ནོར་གྱི་དོན་ཡིན།།
 
ལྔ་རིག་ཤེས་བྱ་སློབ་དཔོན་དམ་པ་རུ་སྤྲུལ་ཏེ།།
བུ་ཆུང་གཉིད་ལས་བསླངས་པའི་ཅོང་སྒྲ་ཞིག་བསྒྲགས་ཀྱང་།།
མ་རིག་སྟུག་པོ་ཉོན་མོངས་དྲི་མ་ཡིས་སྦགས་པས།།
ད་དུང་མ་ཤེས་དུད་འགྲོའི་ངང་ཚུལ་འདི་སྐྱོའང་།།
 
གསེར་ལྡན་སྒེག་མོས་གཡི་ཡི་གོས་ལྗང་ཞིག་བཀླུབས་ཏེ།།
འཛམ་གླིང་དཔའ་བོ་མ་ལུས་ལྗོངས་རྒྱུ་རུ་བསུས་ཀྱང་།།
དེ་རུ་གནས་པའི་གདོང་དམར་སྤྲེའུ་ཡི་རྒྱུད་པས།།
རང་རིགས་རང་གིས་བརླགས་པའི་ངང་ཚུལ་འདི་སྐྱོའང།།
 
ཡོད་པར་སྤྲོ་བ་འཇིག་རྟེན་ཆོས་བརྒྱད་ཀྱི་ཟློས་གར།།
མེད་པར་སྐྱོ་བ་འཁོར་བའི་སྐྱེ་བོ་ཡི་ངང་ཚུལ།།
ཡོད་མེད་གཉིས་ནི་སོ་སོའི་ལྟ་བ་འཇོག་ལུགས།།
ཡོད་མེད་གཉིས་ནི་རང་རང་བརྩོན་པ་ཡི་འབྲས་བུ།།
 
སྔ་དྲོའི་དུས་སུ་རྨི་ལམ་དགའ་ཚལ་དུ་རྩེན་པ།།
ཉིན་གུང་དུས་སུ་ཕུགས་འདུན་སྣ་ཚོགས་ལ་བསམ་ཞིང་།།
ཕྱི་དྲོའི་དུས་སུ་རྒྱབ་ལ་ཕྱིར་ལྟ་རེ་བྱེད་བཞིན།།
མི་ཚེ་གཅིག་གི་དགའ་སྐྱོའི་ཟློས་གར་རེ་འཁྲབ་སོང་།།

རྩོམ་ཁུངས། ངེད་དྲ་བ།