དོ་ནུབ་མགོ་བོ་བཏེགས་ནས་གནམ་ལ་བལྟས།།
ཤར་གྱི་སྐར་མདའ་ནུབ་ཏུ་མཆེད་པ་མཐོང་།།
ད་ལོར་འཇིག་རྟེན་འཇིག་པའི་ལུང་བསྟན་འདུག།
སྔས་མགོའི་སྟེང་དུ་མཆོད་མེ་སྒྲོན་པར་བྱ།།
 
བྲོས་པས་མི་ཐར་སྐྲག་པས་མི་ཕན་པས།།
ད་ནི་འཇིགས་པར་བྱ་བ་ཅི་ཞིག་མཆིས།།
གྲེ་བ་གསང་ནས་གླུ་ཞིག་ལེན་པར་བྱ།།
གསོན་པོར་ཡོད་པའི་བདེན་དཔང་འཇོག་པར་བྱ།།
 
ང་ཡི་དཀོན་མཆོག་དག་པའི་ཞིང་དུ་བཞུགས།།
ང་ཡི་མེས་པོ་འགའ་ཡང་དེ་ན་བཞུགས།།
ཕ་ས་འདི་རུ་བསྡོད་ཐབས་མེད་ན་ཡང་།།
གནང་ཚང་དེ་གར་གཡར་ན་ཅིས་མི་ཆོག།
 
རྡོ་ཡི་གླེགས་བུར་བརྐོས་པའི་ལོ་ཐོ་འདིར།།
སྲིད་པའི་ཆགས་འཇིག་མ་ལུས་ཕབས་ཟིན་པས།།
བདེ་སྡུག་ཅི་འབྱུང་ལས་ཀྱི་བསྐོས་ཐང་ངོ་།།
ཁྱོད་དང་ང་ལ་འགྱོད་སེམས་ཅི་ཡང་མེད།།
 
བསླུ་མེད་སྟོན་པ་མཆོག་གི་བཀའ་སློབ་ཏུ།།
སྲིད་པ་འདི་ཉིད་མེ་ཡིས་འཇིག་པར་གསུངས།།
ངེས་དོན་གསང་བའི་སྒྲོམ་རྒྱ་གྲོལ་བ་ན།།
དྲང་དོན་བདེན་པའི་རང་ངོ་འཕྲོད་པར་ངེས།།
 
རི་བོ་ལྕིད་ཀྱིས་མནན་ནས་ཁུན་སྒྲ་འབྱིན།།
ས་ཆེན་རྐང་པས་བརྫིས་ནས་སྨེ་ངག་ཤོར།།
གོ་ལ་འདི་ཡི་ཁུར་བོ་ལྕི་དྲགས་པས།།
ད་ནི་ཁོང་ཁྲོ་སྐྱེས་ཀྱང་ཅིས་མི་ཆོག།
 
ཡ་གིའི་བྲག་ལ་སྤར་གྱིས་འབྲད་པར་བྱ།།
རིན་ཆེན་གཟི་ཡི་གཏེར་ཁ་ཨེ་ལོན་ལྟ།།
དུས་མཐའི་མེ་དཔུང་དྲག་ཏུ་འབར་བའི་ཚེ།།
གཅེས་ནོར་དེ་དང་མཉམ་དུ་འཆི་བར་བྱ།།
 
   ༢༠༡༢ལོའི་སྤྱི་ཟླ༢ཚེས༡༧ཉིན།
 
 

རྩོམ་ཁུངས། ངེད་དྲ་བ།