ཡུན་རིང་སེམས་སུ་བཅགས་པའི་གཤིས་བཟང་དེ།།
     སེམས་ཀྱི་ཟབ་སར་འཛུམ་ལ་འཚོ་ཞིང་གནས།།
     སྐད་ཅིག་ཙམ་གྱི་ཚོར་འདུ་ཕྲ་མོ་ཡིས།།
     ཡིད་ལ་དགའ་བ་སྟོང་དང་སྤྲོ་བ་འབུམ།།
     གཞས་དེར་གཞས་ལན་མེད་ཀྱང་སེམས་སུ་ཉར།།
     གཏམ་དེར་གཏམ་ལན་མེད་ཀྱང་འཛུམ་གྱིས་སྨྲ།།
     འདུ་བྲལ་རེས་སུ་སྤེལ་ཀྱང་སྐྱོ་བའི་དབུལ།།
     དགའ་སྐྱོ་ཆགས་སྡང་མངའ་ཡང་བརྩེ་བས་བཅངས།།
     དུས་གྱི་འགྱུར་བག་མཐོན་པོ་རི་ལ་བཏབ།།
     ལོ་ཟླའི་འཁོར་བསྐྱོད་གདོང་གི་དཔྲལ་བར་བཏབ།།
     བརྩེ་བའི་འདུན་མ་ཁྱོད་ཀྱི་སྙིང་ལ་བཏབ།།
     སེམས་གྱི་ཚོར་འདུ་སོ་སོའི་སེམས་སུ་བཏབ།།
     སེམས་དེ་མི་སྡོད་སྟོང་གསུམ་ཁམས་སུ་མྱུལ།།
     ལུས་དེས་མི་ལྕོག་ཡན་ལག་འདར་ཞིང་གཉོམ།།
     སེམས་གྱི་རྒྱལ་མོ་དེ་ནི་དབང་བཙན ་པས།།
     ཉམ་ཆུང་ལུས་པོས་གཡོག་གི་སྐྱེ་བ་བླངས།།
     རང་གི་ངོ་སོ་བསམ་སྟེ་མགོ་བོ་དགྱེས།།
     ཁྱོད་ཀྱི་སེམས་ཁམས་བསམ་སྟེ་འཛུམ་གྱིས་འཚོ།།
     ངུ་མ་དགོད་ཀྱི་སྣང་ཚུལ་སྣ་ཚོགས་པ།།
     གར་སྟེགས་སྟེང་གི་ཟློས་གར་ཞིག་དང་མཚུངས།
     སྨྲ་མཁས་རྒྱལ་བོའི་སྨྲ་བྱེད་བཅད་པ་ན།།
     སེམས་ཀྱི་བྲེལ་ཤ་ལུས་ཀྱིས་ག་ལ་ཐེག།
     སེམས་ཀྱི་མདུན་མ་སྒོམ་ཡུན་རིང་ཆེ་བས།།
     བརྩེ་བར་སུན་པ་མེད་ཀྱང་ཨ་ཐང་ཆད།།
     སུ་ལ་རང་དབང་མེད་ན་སྡུག་གིས་འགྲོ།
     རང་གིས་ཅི་འདོད་སྒྲུབ་ན་སྡུག་གིས་འགྲོ།
     མི་ཡི་ཁམས་ཀྱི་ལུས་ཀྱི་སྒོ་མོ་འདི།།
     སྡུག་གི་ཕུང་བོ་ཡིན་པ་གོར་མ་ཆག།
     སྐྱིད་ན་སྐྱིད་ཀྱིས་གད་མོ་རྣ་བར་གཟན།།
     སྡུག་ན་སྡུག་གི་མཆི་མ་སྙིང་ལ་གཟན།།
     སྐྱིད་སྡུག་རེས་མོས་ལོ་ཟླ་འདི་དག་ལ།།
     སྐྱིད་སྡུག་རེ་རེའི་ཟིན་ཐོ་སེམས་སུ་བཀོད།།
     འདུས་པའི་དུས་སུ་གཏིང་ནས་སུན་པ་སྐྱེས།།
     བྲལ་བའི་དུས་སུ་དྲན་པའི་གཞས་ཆུང་ཤོར།།
     མི་རྟག་སེམས་ཀྱི་ཁྱེར་སོ་འདི་དག་གིས།།
     ཐོབ་ཤོར་སྣ་ཚོགས་གཅིག་སྟེང་གཅིག་གིས་བརྩེགས།།

རྩོམ་ཁུངས། ངེད་དྲ་བ།