སྐྱ་རེངས་ལྷ་མོའི་ཕྱག་ཟུང་སྒེའུ་ཁུང་ལས་འཕྲོས་ཏེ།།
བདག་གི་རྣམ་ཤེས་ཕྲ་མོ་ཕྱག་མཚན་དུ་བསྣམས་ནས།།
ལྷ་སའི་ཞོགས་པའི་སྲང་ལ་བསྐོར་བ་རུ་ཁྲིད་པས།།
མཐོང་སྣང་བདེན་པའི་ངག་གླུ་སྨྲ་སྒོ་ལས་འཕྱུར་སོང་།།
 
སྙིང་གཏམ་སྦས་མེད་ཟུར་མ་ལ་བཤད་ནས།།
དངུལ་ལོར་ཕངས་མེད་འཕྱོན་མ་ལ་བཏང་ཏེ།།
སེམས་པ་སྟོང་པའི་འགྱོད་པ་འདི་ཁུར་ནས།།
རང་ཁྱིམ་དྲོད་མོའི་སྒོ་ཁ་ལ་སླེབས་འདུག།
 
རྒྱན་འགྱེད་དམག་གི་འདུ་རྒོད་ལ་གཡེང་ནས།།
ཉིན་མཚན་དུས་ཀྱི་འཁོར་སྐྱོད་ལ་རྨོངས་པའི།།
ཁྲེལ་མེད་ཕ་མ་བྲེལ་བྲེལ་གྱི་ངང་ནས།།
རང་ཁྱིམ་བདེ་བའི་མལ་ས་ལ་འབྱོར་འདུག།
 
ཆང་རག་ཚོད་ཀྱི་ཐག་པ་ནས་ཤོར་བའི།།
ན་གཞོན་ཕོ་མོ་ར་བཟི་ཡིས་བཀྱག་ཏེ།།
ངོ་ཚའི་གདོང་ལྤགས་རྩ་བ་ནས་རལ་པས།།
ཞོགས་པའི་སྲང་ལམ་སྐྱུར་བརྩི་ཡིས་གནན་འདུག།
 
བུ་ཆུང་སློབ་གྲྭར་འགྲོ་བའི་སྟ་གོན་ལ་གྲབས་དུས།།
པྰ་ལགས་སྦག་ཁང་ནང་ནས་རང་ཁྱིམ་ལ་མ་སླེབས།།
བུ་མོ་ཞོགས་ཚོགས་གྲོལ་ནས་ཞོགས་ཟས་ལ་སླེབས་ཀྱང་།།
ཨ་མ་ཨར་ཁང་ནང་ནས་གཞིས་ཁྱིམ་ལ་མ་ལོག།
 
ཁྲེལ་མེད་ཕ་མའི་འདོད་པ་བདེ་སྐྱིད་ལ་རོལ་ཡང་།།
ཉེས་མེད་བྱིས་པའི་གསོ་སྐལ་བུ་རྫི་མར་གནང་ནས།།
ཉིན་མཚན་རྒྱན་འགྱེད་དམག་དང་ཆང་རག་ལ་འགྲོགས་སྟེ།།
དོན་མེད་མི་འཚེ་ཟ་བའི་ཀླད་མེད་ཀྱི་ཕ་མ།།
 
འདི་ལྟར་ཞོགས་པའི་དུས་ཐུང་ཆ་ཤས་ཀྱི་བར་ལ།།
ཡིད་སྐྱོའི་གནས་ཚུལ་མང་པོ་དྲན་པ་ལ་བསྐྱལ་བས།།
ཆང་རག་རྒྱན་འགྱེད་ཟེར་བའི་དུག་རྫས་འདི་སིམ་ནས།།
མདུན་སྐྱོད་ལམ་བུ་འགོག་པའི་དན་རྟགས་ཅིག་མཐོང་བྱུང་།།
                           ༢༠༡༡ལོའི་ཟླ་༢་ཚེས་༨ཉིན།   རང་ཤག་ཏུ་བྲིས།

རྩོམ་ཁུངས། ངེད་དྲ་བ།