སྐྱོ་བ་སངས་ཕྱིར་དགའ་བའི་གླུ་ཞིག་བླངས།།
འདུན་པ་མཚོན་ཕྱིར་སྐྱིད་པའི་བྲོ་ཤིག་འཁྲབ།།
མགོ་བོ་དགྱེས་ནས་ཨ་སྔོན་དགོང་ལ་བལྟས།།
ཁྲི་གདུགས་ཉི་མ་ཟེར་བོ་མུན་པས་གཡོགས།།
སྐྱོ་བས་གདུང་སྟེ་ཨ་རག་ཁམ་གང་འཐུང་།།
ཨ་ཐང་ཆད་པའི་དངན་པ་ཡུན་གྱིས་ཤོར།།
གྲགས་པོ་མགོན་པོ་འོངས་ནས་ཆང་འཐུང་ཟེར།།
སྙིང་གྲོགས་སྒྲོལ་མ་འོངས་ནས་གྲོང་སྐོར་ཟེར།།
ན་བུན་མུན་པས་གཡོགས་པའི་འཇིག་རྟེན་ན།།
ང་འཚམས་པའི་གནས་ཤིག་མེད་པས་སྡུག།།
འཁོར་བའི་གྲོང་ན་མེད་མུག་ལུང་བ་གང་།།
གཞུང་དོན་ཁྲོད་ན་འཛད་མེད་ལས་ཚེགས་ཤིག།།
དཔོན་པོའི་གདོང་ན་ཁྲོ་བའི་གདུག་རྩུབ་ཅིག།།
ཉམས་ཆུང་དབེན་པར་རོལ་སའི་གནས་ནི་གང་།།
ཐོབ་ཀྱི་དོན་ལ་བརྩོན་པའི་བླ་ཚོགས་ཤིག།
ཡོན་ཀྱི་དོན་འབད་པའི་བཙུན་ཚོགས་ཤིག།
གོ་ཐོབ་ལས་ཀྱིས་བཞེངས་བའི་འཇིག་རྟེན་ན།།
རེ་བ་ཆུ་ལ་གཏད་པའི་ཉམས་ཆུང་ཞིག།།
མདོ་སྨད་དགེ་ཆོས་དབུས་གཙང་ཞིང་དུ་གཤེགས།།
ངག་དབང་རང་གྲོལ་ཆབ་འགག་གཞུང་དུ་འདས།།
གངས་རི་དཀར་བོའི་གཟི་མདངས་ཉམས་པ་ཡིས།།
གངས་དཀར་ལྷ་མོའི་སྤྱན་ཆབ་ས་ལ་ལྷུང་།།
གདུང་བ་སེལ་ཆེད་ཨ་རག་ཁམ་གསུམ་བཏུང་།།
སྙིང་གྲོགས་གམ་དུ་མེད་པས་ལྷག་དུ་སྡུག།
བསམ་ཀྱིན་བསམ་ཀྱིན་གཏི་མིག་ཞིང་དུ་ཕྱིན།།
རྣམ་ཤེས་འཁྱམ་པོ་རྐུན་པོ་རླུང་གིས་ཁྱེར།།
      
           བར་གཞས་གཉིས་པ།
འཇིག་རྟེན་དཀར་ངོགས་ངོས་ཟིན་ཐོབ་པ་ནས།།
བདེ་སྡུག་སྦྲེལ་བའི་འཁོར་བའི་དབྱིངས་སུ་ལྷུང་།།
རེས་སྐྱིད་རེས་སྡུག་ཆོས་ཉིད་གོ་རིམ་ཁྲོད།།
འཇིག་རྟེན་ཟློས་གར་སྣ་ཚོགས་ཅི་ཡངཔ་མཐོང་།།
ལྷ་ལ་དད་འདུན་ཆེ་བ་མེས་པོའི་སྲོལ།།
འདྲེ་ལ་ངན་གཤིས་གཏོང་བ་དེང་གི་ལུགས།།
ལྷ་འདྲེ་གྲོགས་སུ་སྡེབས་པའི་འཇིག་རྟེན་ན།།
དཀར་ནག་འབྱེད་པའི་མེ་ལོང་མེད་པས་སྡུག།
བོད་མི་ཕལ་ཆེར་ནང་བའི་ཆོས་ལ་དད།།
ཆོས་དཔོན་ཕལ་ཆེར་དཀོན་མོ་རྒྱུ་ལ་དད།།
ཆོས་དང་ཆོས་མིན་འཐབ་པའི་གཡུལ་ས་ནས།།
བསྐལ་བ་སྟོང་གི་སྟོན་པས་མཛད་རྗེས་ཉམས།།
ཨ་ཅེ་སྐལ་བཟང་རྒྱ་ནག་ལུགས་ལ་དད།།
སྲིང་ཆུང་སྒྲོལ་མ་ནུབ་གླིང་སྲོལ་ལ་ཕྱོགས།
དུས་ཀྱི་འགྱུར་བག་རྒོད་པའི་ཆོས་ཉིད་ཁྲོད།།
ཡབ་རྗེ་བཙན་པོ་དག་གི་མཛད་རྗེས་ཉམས།
ཁོ་མོ་ཞལ་ན་བཅོས་མའི་འཛུམ་མདངས་ཤིག།
ང་ཡི་སེམས་ན་དགའ་བའི་རང་མདམས་ཤིག།།
དུང་སེམས་མེ་ཏོག་རྒྱས་པའི་སྐྱེད་ཚལ་ནས།།
སེར་ཆེན་མེ་ཏོག་འདབ་མ་སད་ཀྱིས་ཁྱེར།།
ཁྱེད་དང་ང་ནི་གདུང་རྒྱུད་གཅིག་གི་སྤུན།།
ཡུལ་ཕྱོགས་འདི་ནི་བསིལ་ལྡན་ཁ་བའི་ལྗོངས།།
ན་བུན་གྲོང་གི་སྐྱོ་བའི་གླུ་ཆུང་འདི།།
རྨ་ཀླུང་སྔོན་མོའི་འགྲམ་ནས་ཐོལ་གྱིས་བླངས།།
 

རྩོམ་ཁུངས། ངེད་དྲ་བ།