ས་སྟེང་ཀུན་ལ་གསལ་བསྒྲགས་ཤིག་བྱས་ན།།
ས་བརྐོ་རྡོ་སློག་ཕ་མཐའ་ལ་བསྐྲད་ཅིང་།།
ས་རྩོད་ཆུ་རྩོད་སྔ་མོ་ནས་ཆད་པའི།།
ས་སྟེང་འདི་ཡི་ཡང་རྩེ་ཡི་བོད་ཀྱང་།།
ས་ཡི་གོ་ལའི་མྱི་བུ་ཞིག་ཡིན་ནོ།།
 
ཆུ་འཐུང་ཀུན་ལ་ཡང་གསལ་ཞིག་བྱས་ན།།
ཆུ་མིག་དྭངས་མོར་མཆོད་ཀ་རེ་བྱས་ཤིང་།།
ཆུ་མོ་ཡོད་ཚད་མིག་ལྟར་རེ་གཅེས་པའི།།
ཆུ་སྣ་ཀུན་གྱི་མགོ་ཁུངས་ཀྱི་བོད་ཀྱང་།།
ཆུ་འཐུང་གྲས་ཀྱི་མྱི་བུ་ཞིག་ཡིན་ནོ།།
 
མེ་བསྲོ་ཀུན་ལ་བསྐྱར་གསལ་ཞིག་བྱས་ན།།
མེ་ཕུང་སྐོར་བྲོའི་གླུ་གར་ལ་རོལ་ཞིང་།།
མེ་ཡིས་སྒྲོན་པའི་མཆོད་མེ་དེར་དུངས་པའི།།
མེ་རེ་དབེན་པའི་ཁ་བ་ཡི་བོད་ཀྱང་།།
མེ་བཞིན་འབར་བའི་མྱི་བུ་ཞིག་ཡིན་ནོ།།
 
རླུང་ལྟར་གཡོ་བར་ནན་གསལ་ཞིག་བྱས་ན།།
རླུང་ལྷ་རྒན་པོའི་ཁ་དབྱངས་རེ་འབོད་ཅིང་།།
རླུང་རྟ་དགུང་སྔོན་ཨ་དབྱིངས་སུ་སྤུར་པའི།།
རླུང་གི་ནང་གི་ནར་སོན་གྱི་བོད་ཀྱང་།།
རླུང་ལ་ཞོན་པའི་སྤྲིན་པ་དེ་མིན་ནོ།།
 
འབྱུང་བཞི་ཁམས་ཀྱི་མི་གཞི་ཞིག་གླེང་ན།།
ས་ཡི་གཡོ་བར་རྒོལ་ལམ་རེ་བྱས་ཤིང་།།
ཆུ་ཡིས་འཚེ་བར་ཨ་ལན་རེ་སྤྲོད་པའི།།
རླུང་ལ་མི་འཇིགས་བརྟན་ཚིགས་ཀྱི་བོད་མིའི།།
མེ་ལྟར་འབར་བའི་ཐོབ་ཐང་དེ་འཕྲོག་འདུག།
                   ༢༠༡༡ ༡༢ ༡༩   ནངས་མོར།
 

རྩོམ་ཁུངས། ངེད་དྲ་བ།