རྩྭ་ལོ་རླུང་གིས་ཁུར་བའི་དུས་ཚིགས་ཤིག་ཏུ།།
ཁ་བ་སེམས་ལ་བབས་སོང་བདག་གི་ཆུང་འདྲིས།།
གཟུགས་གཞི་རླུང་གིས་ཁུར་ནས་གང་དུ་ཆས་ཀྱང་།།
ཟླ་འོད་མེད་ས་ཞིག་ནས་ཁྱོད་རང་བསྒུག་ཆོག།
 
དྲན་བ་ཆང་གིས་བཟི་བའི་སྙན་ངག་ཐར་ཐོར།།
མ་བྲིས་ཡིན་རིང་ཆས་པའི་ཉི་མ་དེ་རིང་།།
བདག་མེད་སེམས་ཀྱི་ཡི་གེ་གོས་སུ་གྱོན་དུས།།
རྗེས་མེད་ཁྱོད་ཀྱི་ལུས་པོ་མིག་གིས་མ་མཐོང་།།
 
དོན་མེད་གསེར་གྱི་གདུ་བུ་ལག་ལ་བཞག་ཏེ།།
འབྲས་མེད་བརྩེ་བའི་མེ་ཏོག་བཞད་པར་སྨོན་ཡང་།།
མེ་ལོང་ཆག་པོའི་ནང་གི་ཚེར་མའི་མེ་ཏོག།
མཆོད་རྟེན་ནག་པོ་ཞིག་གི་འོག་ན་ལུས་འདུག།
 
མཆི་མ་འཁྱག་པ་ཞིག་གི་མཛེས་པའི་ཁྲོད་དུ།།
ལས་དབང་བརྩེ་པས་མ་ཟིན་ཕྱི་རུ་ཤོར་སོང་།།
བདེན་པ་རང་ལ་དབང་བའི་རིག་པ་ཞིག་གིས།།
ལས་ཀྱི་རི་མོ་གསལ་བོ་མེད་པ་མཐོང་བྱུང་།།
 
དཔྱིད་ཀའི་མེ་ཏོག་བཞད་པའི་ལྡེབས་རིས་ཤིག་ཏུ།།
ཕྱིར་དྲན་རབ་རིབ་ཅིག་གི་གཙང་བོ་བཞུར་བྱུང་།།
སེམས་པ་གཉིས་སུ་དབྱེ་པའི་བར་སྟོང་འདི་རུ།།
ན་ཟུག་སྣུམ་ཀྱིས་བསྲེགས་ཀྱང་དྲན་བས་མ་ཚོར།།
 
ཤོག་སྐྱ་སྟོང་པ་ཞིག་གི་རྨི་ལམ་ཁྲོད་ན།།
གར་དུ་རོལ་བའི་ཡི་གེ་ག་ཚོད་ཡོད་དམ།།
དུས་ཚོད་བདག་མེད་ཅིག་གི་ཕྱི་མིག་ཁྲོད་དུ།།
ཚོར་བ་སྔོན་པོ་ཞིག་གི་སྒྱུ་སྐུད་ཆད་ཐལ།།
         ༢༠༡༡ལོའི་ཟླ༡༠ཚེས༢༡ཉིན་དབུས་ལྷ་ལྡན་གྲོང་དུ་བྲིས།
 

རྩོམ་ཁུངས། ངེད་དྲ་བ།