དུས་ཚོའི་མདུན་དུ་རྒྱུགས་པའི་ས་འོག་ལམ་ཆེན།།
མུན་པའི་སྐར་མའི་ཚོགས་ཀྱི་མཐའ་ལ་སྐོར་འདུག།
སྡུག་གི་ན་ཟུག་ཡོད་པའི་སེམས་པའི་རྨ་ཁ།།
རི་བོ་ཚེར་མས་གཡོགས་པའི་གཏམ་རྒྱུད་འཁྱིལ་བྱུང་།།
 
དྲན་པའི་མེ་ལོང་ངོགས་སུ་བཞད་པའི་མེ་ཏོག།
ཆུ་ཤེལ་ཟླ་བ་དཀར་པོའི་མིག་གིས་མ་ཟིན།།
སྨན་ཆུ་གྲང་མོའི་ནང་གི་སེམས་པ་ཕྲ་མོ།།
དཀར་ནག་གཉིས་ཀྱི་བར་ནས་སྡོད་དགོས་བྱུང་སོང་།།
 
བྱ་སྤུ་རླུང་གིས་ཁུར་འདྲའི་གྲོགས་པོ་འགའ་ཞིག།
མི་འདོད་དྲན་པའི་ངོགས་སུ་ག་ལེར་འཆར་ཡོང་།།
ཁ་པར་གཉིད་དུ་ཤོར་བའི་མུན་ནག་སྒམ་ཆུང་།།
འདམ་ཆུ་འཁྱག་པས་སྒྲིབ་ཏེ་གྲང་རླུང་ལྡང་གི།
 
རྨི་ལམ་ནང་དུ་འདྲེས་པའི་ཕྱི་མིག་མདའ་མོ།།
ཁ་བའི་མེ་ཏོག་བཞིན་དུ་ཉི་མས་ཟས་སོང་།།
དྲན་སྣང་དགུ་བརྩེགས་བར་གྱི་ཤོག་ལེབ་དཀར་པོ།།
ལྷ་བྱ་དཀར་པོ་ཞིག་གི་མིག་ལས་བབས་བྱུང་།།
 
དྲུལ་བརྡ་སྣ་ཚོགས་ཤིག་གི་ཁུན་སྒྲ་སུན་པོ།།
གསེར་ཏོག་རྫུན་མ་ཞིག་གི་རྣམ་ཤེར་གྱུར་སོང་།།
མི་འདོད་ལས་ཀྱི་བྲིས་པའི་ཐོད་པའི་རི་མོ།།
ཁ་དོག་ཁྲ་ཁྲ་ཤིག་གི་བར་ནས་འབུས་བྱུང་།།
 
ཆར་བ་མེད་ས་ཞིག་ནས་ཆར་བ་དྲན་བ།།
ཁ་བ་བབས་པའི་ལོ་ཟླར་སྐྲག་པས་ཡིན་འདྲ།།
རྐང་རྗེས་ཆེན་པོ་མེད་པའི་ཚེ་སྲོག་ཆུང་ཆུང་།།
རྨ་ཁ་ཆུང་ཆུང་ཞིག་གི་ཁྲིམས་ནས་མ་འཐར།།
 
དུས་ཚོད་ཐུང་ཐུང་ཞིག་གི་འགུལ་སྐྱོད་མེད་པ།།
མི་ཚེ་རིང་པོ་ཞིག་གི་ལམ་ཡིག་ཡིན་འདྲ།།
སྤྲིན་པ་ནག་པོ་འཁོར་བའི་སྲིད་ཀྱི་ནམ་མཁའ།།
མིག་གི་ཞང་སར་བཞད་པའི་ཚེར་མའི་མེ་ཏོག།
 
གང་འདོད་མ་ཡིན་སེམས་ཀྱི་མཆི་མའི་རིལ་བུ།།
དོན་མེད་མ་ཡིན་ལུས་ངག་ཡིད་ཀྱིས་ཤོར་སོང་།།
འཕུར་ལ་ཉེ་པའི་མུན་པའི་འོད་ཀྱི་གཤོག་པ།།
གསང་བ་མེད་པར་ཁྱེད་ཀྱི་ཕྱོགས་སུ་འཐོར་སོང་།།
 
         ༢༠༡༡ལོའི་ཟླ༡༢པའི་ཚེས༢༨ཉིན་དབུས་ལྷ་ལྡན་གྲོང་གི་བོད་ལྗོངས་སྨན་རྩིས་ཁང་དུ་གྲུབ།

རྩོམ་ཁུངས། ངེད་དྲ་བ།