ཀ་མ་ལ་འདྲའི་ལུས་ཟུངས་རབ་བཅོམ་ཁ་ལ་ཐ་མ་མི་མཆོད་ཞུ།།
ཁ་དོག་མཛེས་པའི་པགས་པའི་མདོག་བསྒྱུར་ཁ་ལ་ཐ་མ་མི་མཆོད་ཞུ།།
ག་ས་གང་དུ་དྲི་ངན་རབ་འཐུལ་ཁ་ལ་ཐ་མ་མི་མཆོད་ཞུ།།
ང་དང་ཁྱོད་མེད་བརྟེན་ན་སྲོག་འཕྲོག་ཁ་ལ་ཐ་མ་མི་མཆོད་ཞུ།།

ཅ་དངོས་ཟས་གོས་སེམས་ནས་བརྗེད་འགྲོ་ཁ་ལ་ཐ་མ་མི་མཆོད་ཞུ།།
ཆ་ལུགས་མི་མཉམ་དྲན་པ་རབ་རྡིབ་ཁ་ལ་ཐ་མ་མི་མཆོད་ཞུ།།
ཇ་ཆང་བྲོ་མེད་ཚོར་ཤུགས་རྒུད་བྱེད་ཁ་ལ་ཐ་མ་མི་མཆོད་ཞུ།།
ཉ་རྒྱུས་རྩ་ཕྲན་རྩྭ་སྐྱ་བཞིན་སྐམ་ཁ་ལ་ཐ་མ་མི་མཆོད་ཞུ།།

ཏ་ཧུང་འཚིགས་བཞིན་རང་ལུས་སྲེག་བྱེད་ཁ་ལ་ཐ་མ་མི་མཆོད་ཞུ།།
ཐ་མལ་ལུས་པོ་དུད་ཁུང་བཞིན་ཆགས་ཁ་ལ་ཐ་མ་མི་མཆོད་ཞུ།།
ད་ལྟ་རང་ཚོད་རང་ཚུགས་མ་ཤོར་ཁ་ལ་ཐ་མ་མི་མཆོད་ཞུ།།
ན་ཆུང་གཞོན་པའི་ཚེ་སྲོག་སྐྱོབ་ཕྱིར་ཁ་ལ་ཐ་མ་མི་མཆོད་ཞུ།།

པ་སངས་དམག་བཞིན་ལུས་སྟོབས་རྐུན་པོ་ཁ་ལ་ཐ་མ་མི་མཆོད་ཞུ།།
ཕ་ཁྱིམ་མི་ཟིན་གྲོང་མཐར་ལྷུང་བྱེད་ཁ་ལ་ཐ་མ་མི་མཆོད་ཞུ།།
བ་ཕྱུགས་ཀུན་བཙོང་ཕྱུགས་ཟག་སྟོང་འགྲོ་ཁ་ལ་ཐ་མ་མི་མཆོད་ཞུ།།
མ་རབ་སྣ་དགུ་སྣ་འདྲེན་ཡིན་པས་ཁ་ལ་ཐ་མ་མི་མཆོད་ཞུ།།

ཙ་ཙོར་ནང་ཁྲོལ་ཐལ་སྐྱར་སྲེག་བྱེད་ཁ་ལ་ཐ་མ་མི་མཆོད་ཞུ།།
ཚ་དུག་ཚིལ་ཁུ་གཞོབ་དྲིར་འཚིག་འགྲོ་ཁ་ལ་ཐ་མ་མི་མཆོད་ཞུ།།
ཛ་དྲག་གནས་སྟངས་བྱུང་དུས་འགྱོད་ཡོང་ཁ་ལ་ཐ་མ་མི་མཆོད་ཞུ།།
ཝ་སྤོགས་ནང་བཞིན་རང་སྤོགས་མ་བསྲེགས་ཁ་ལ་ཐ་མ་མི་མཆོད་ཞུ།།

ཞ་ལོང་རྣར་འོན་དབང་པོ་ཉམས་འགྲོ་ཁ་ལ་ཐ་མ་མི་མཆོད་ཞུ།།
ཟ་བཏུང་ལོངས་སྤྱོད་ཡི་གར་ཆད་འགྲོ་ཁ་ལ་ཐ་མ་མི་མཆོད་ཞུ།།
འ་ཅག་སྐྱིད་ན་ཐུགས་སྤྲོ་དེ་མིན་ཁ་ལ་ཐ་མ་མི་མཆོད་ཞུ།།
ཡ་མཚན་ཁ་ནང་མེ་སྤར་མིན་ནོ་ཁ་ལ་ཐ་མ་མི་མཆོད་ཞུ།།

ར་མ་ལུག་འདྲའི་ནང་འཁྱོན་གཏེ་བོ་ཁ་ལ་ཐ་མ་མི་མཆོད་ཞུ།།
ལ་ལུང་ནག་རི་མེ་ལ་བསྲེག་འདྲ་ཁ་ལ་ཐ་མ་མི་མཆོད་ཞུ།།
ཤ་ཚས་གཏམ་ཞིག་སྙིང་ནས་བསྐུལ་ཡིན་ཁ་ལ་ཐ་མ་མི་མཆོད་ཞུ།།
ས་སྟེང་མི་ཀུན་སྐྲག་ས་འདི་ཡིན་ཁ་ལ་ཐ་མ་མི་མཆོད་ཞུ།།

ཧ་ལས་ཧོན་འཐོར་འཆི་བདག་མཐོང་བཞིན་ཁ་ལ་ཐ་མ་མི་མཆོད་ཞུ།།
ཧ་ཅང་རིང་ན་བཅོས་ཐབས་དཀའ་འདུག་ཁ་ལ་ཐ་མ་མི་མཆོད་ཞུ།།
ཨ་ཙི་རང་གིས་རང་ཉིད་མ་བརླགས་ཁ་ལ་ཐ་མ་མི་མཆོད་ཞུ།།
ཨ་རིའི་ཡུལ་ནས་འབོད་བསྐུལ་ཙམ་ཡིན་ཁ་ལ་ཐ་མ་མི་མཆོད་ཞུ།།
        ཅེས་ཟླ་༦ཚེས༦སྤྱི་ལོ༢༠༡༢ གྲོང་ཁྱེར་ཕོ་ལོང་དབྱུག་གསར་ནས་བྲིས་སོ།།

རྩོམ་ཁུངས། ངེད་དྲ་བ།