རྫུན་མ།

གསེར་གྱིས་བྲིས་པའི་ཁ་ཡིག་རྫིག་པོ་ཞིག།
མཐོང་ལམ་ཡོལ་བའི་ངོས་ན་ཐུར་དུ་དཔྱངས།།
དེ་ལ་ཅེར་བའི་མིག་ཟུང་ལོང་བའི་ཚོགས།།
གཡུ་སྦྲང་བཞིན་དུ་དགའ་སྤྲོའི་གར་གྱིས་མྱོས།།

གསེར་གྱིས་བླུགས་པའི་བུམ་པ་ལེགས་པོ་ཞིག།
གསེར་གྱི་སྟེགས་བུར་འོད་ཀྱིས་ལྷམ་ན་ཡང་།།
གསེར་གྱི་བུམ་པའི་ནང་བཅུད་ཐལ་རྡུལ་གྱིས།།
གསེར་གྱི་རང་བཞིན་མངོན་ཐབས་ག་ལ་ཡོད།།

གངས་ཀྱི་དབུ་ན་འགྱིང་བའི་གངས་སེང་དེ།།
གངས་ཀྱི་རྒྱན་དུ་འཁྲུངས་ན་ལོས་བཟང་ཡང་།།
གངས་ལ་སེང་གེའི་གཟུགས་ཙམ་འཛིན་པ་དེས།།
གངས་ཀྱི་གཟི་བརྗིད་ངོ་སོ་གང་དུ་འཕགས།།

ཁྱུ་མཆོག་རླབས་པོ་ཆེ་ཡི་གོམ་སྟབས་ཀྱིས།།
ངེས་དོན་དམིགས་པའི་ས་ཆོད་མི་ཆོད་པས།།
རྩྭ་གཟུགས་འཆང་བའི་ལས་དེར་སྡང་སེམས་ལྕི།།
དོན་གྱི་གནད་དེ་ཐལ་བས་རྡུལ་གྱིས་གོས།།

ཁ་ལ་མར་ཁུ་འཁྱིལ་བའི་གཏམ་གྱིར་གར།།
ཟོལ་མས་བསྒྱུར་བའི་སུན་པའི་རླུང་བུ་དེས།།
ཁམས་ཀྱི་མོས་པ་དཀྲུགས་པའི་ཆགས་སྡང་ལ།།
འཇགས་མེད་རླབས་ཀྱི་གཉེར་མ་དགུ་རུ་བརྩེགས།།

སུས་ཀྱང་སྙིང་གི་དཀྱིལ་ལ་ལེགས་བཞད་པའི།།
ཚིག་གི་ཟེའུ་འབྲུ་སྤུངས་པའི་ངག་སྒོ་ཡངས།།
དོན་དམ་ཉི་མ་སེར་པོའི་འཆར་ལུགས་ལ།།
གྱ་གྱུའི་ཁུག་པ་བཅོ་བརྒྱད་བསྐུངས་ནས་འདུག།

ཕྱི་ཡི་རྫ་རི་སྟོབས་དང་རྔམ་གྱིས་འགྱིང་།།
ནང་གི་བླ་སྲོག་བཅུད་དང་སྙིང་བོས་དབེན།།
ལས་དེར་བརྒྱུས་པའི་ཚིག་བཟང་དོན་གྱི་བུ།།
དབང་ཆེན་གང་གི་ངག་ན་ལྐུགས་ཤིང་ཉམས།།

སྙིང་ལ་གས་ཁ་ཤོར་བའི་སྒྲ་ཆེན་ཞིག།།
གནམ་ནས་ཐོལ་གྱིས་ལྷུང་བ་མ་ཡིན་ལ།།
ས་ནས་ཤུགས་ཀྱིས་འཕྱུར་བ་མ་ཡིན་ཏེ།།
ངག་གི་སྦུབས་ལས་ཐལ་བས་རྣ་བ་ཚ།།

བཅོས་འཛུམ་བུ་མོ་བགད་པ་འཕྲུལ་བ་རེད།།
བཅོས་མའི་ངག་གི་གྲེ་འགྱུར་སྒྱུ་མ་རེད།།
བཅོས་མའི་ཚིག་གི་སྦྱོར་བ་བསླུ་བྲིད་རེད།།
བཅོས་མའི་ལས་ཀྱི་རིགས་འདི་རྫུན་མ་རེད།།

རང་སེམས་ཤོག་དཀར་བཀྲམ་པའི་སྤང་ལྗོངས་སུ།།
ཀུན་སློང་སྦྲང་ནག་ཁྱུ་ཞིག་ལྡིང་སྐོར་རྩེན།།
འདོད་འདུན་གོས་ཀྱི་རི་མོ་ནོག་པ་ལ།།
མདངས་ཀྱི་འོད་ཅིག་མེད་པ་གཞི་ནས་ཚོར།།

            འགལ་ཟླ།

འདི་ལ་ཕན་ཡང་གན་ལ་ཤིན་ཏུ་གནོད།།
གན་ལ་འགྲིག་ཀྱང་འདི་ལ་གནོད་དུ་གྲུབ།།
སྤྱང་ཀི་མི་ལྟོགས་མ་མོ་མི་ཚ་བའི།།
ཐབས་ཀྱི་མཆོག་ཅིག་ང་ཡིས་གང་ནས་འཚོལ།།

བརྩེ་ལྡན་གྲོགས་ཀྱིས་ཁྱེད་རང་རྒྱས་འདུག་ཟེར།
སྙིང་སྡུག་མཛའ་མོས་ཁྱེད་རང་འགྱུར་འདུག་ཟེར།།
གྲོགས་དང་མཛའ་མོ་གང་ཡང་མི་གནོད་པའི།།
ཚུལ་མཐུན་མི་ཞིག་བདག་གིས་ཡོང་བ་དཀའ།།

སྐད་ཀྱི་གདངས་དེར་སྙན་ཆ་མི་འདུག་ཟེར།།
ལྡེམ་མྱུར་གན་ཡང་སྣང་ངོར་མི་མཐུན་སྐད།།
སྐད་དང་ལྡེམ་མྱུར་འཕྲོད་པའི་འཁྲབ་ཚན་ཞིག།
ཨ་ཕོ་འབྲོག་པ་ང་ཡིས་ནུས་ཚོད་མིན།།

གཏམ་ཞིག་ལབ་དུས་ཁོག་རྒྱ་མི་འདུག་ཟེར།།
ཚིག་སྦྱོར་སྤེལ་དུས་བསམ་བློ་དམའ་རབས་ལབ།།
བསམ་བློས་བཅུད་ཀྱིས་གཏམས་པའི་སྦྱོར་བ་ཞིག།
ཚུལ་བཞིན་སྤེལ་བ་འཇིག་རྟེན་ཁྱོན་ན་དཀོན།།

ཚིག་དེས་ང་ཡི་ཡིད་སེམས་རྨས་པར་སྐད།།
དོན་དེས་ང་ལ་ཁྱད་གསོད་བྱས་པར་ལབ།།
བྱམས་ལྡན་ཨ་མས་བགོས་པའི་སྐལ་འདྲ་ཞིག།
བདག་གི་ལུས་ངག་ཕུལ་ཀྱང་ཡོང་ཐབས་དཀའ།།

ཚིག་རྩུབ་ཚེར་མས་མི་སེམས་དབྲལ་རབས་ལབ།།
ཁ་ཡག་འོ་མས་མཁྲིས་པ་ན་རབས་ཟེར།།
ཉན་ན་གདམས་པ་ཐོབ་པའི་ལུང་བསྟན་ཅིག།
བློ་དམན་བུ་ལོ་བདག་གིས་ག་ནས་འཚོལ།།

དངོས་གྲུབ་ཆར་བའི་ཤག་སྒྲ་མཐོ་ནི་ཞིག།
ལག་ཡོང་ཆུ་མོའི་བཞུར་སྒྲ་སྙན་ནི་ཞིག།
ཀུན་ཕན་དཀར་པོ་ཆིག་ཐུབ་དངོས་མ་ཞིག།
དེ་རིང་ཁོ་བོས་ཁྱེད་ལ་བསྩལ་དུ་མེད།།

ཤ་ཚའི་ཚིག་གི་བདུད་རྩི་མི་དགོས་ཏེ།།
སྙིང་གཏམ་མགུར་གྱི་གདངས་ལ་ག་ནས་ཆགས།།
ཁེ་ཕན་ཤིག་གི་མཚང་རར་འཐམ་པ་ཡི།།
སྒེར་སྡོམ་ལྕགས་སྒྲོག་ཅན་ལ་ཅི་ཞིག་མཁོ།།

གན་ཡང་མི་འགྲིག་ཁྱེད་རང་འཕྱུག་འདུག་སྟེ།།
འདི་ཡང་མ་རེད་ཁྱེད་རང་ནོར་འདུག་ཅེས།།
རང་ཉིད་ཚད་མར་འཛིན་པ་མཐའ་དག་གིས།།
རང་ཁ་གསེར་གྱི་ཁ་དེར་ལྕགས་ཟྭ་རྒྱོབས།།

ནད་བརྒྱ་གསོ་བའི་ལྷ་རྗེ་ང་ཡང་མིན།།
ཡོ་གཟུར་མེད་པའི་ཚངས་པའི་ཐིག་ཀྱང་མིན།།
ཐམས་ཅད་མཁྱེན་པ་ཁྱེད་ཀྱང་གཏན་ནས་མིན།།
ང་ཚོའི་སྙིང་གི་འདོད་འདུན་གཅིག་པར་གྱིས།།

སྐད་ཅིག་ཁོང་ཁྲོའི་བང་ཁ་མྱུར་དྲགས་ཏེ།།
གཞན་སེམས་བདེ་མོའི་སྤང་ལ་རྡོག་བརྫིས་གྱིས།།
རང་ལ་དཔེ་ཞིག་ལོངས་ལ་གཞན་སྟེང་དུ།།
མྱི་ཁའི་དུག་མདའ་ཕོངས་དང་གནད་དུ་འཁེལ།།

ཁྱེད་ཀྱི་སེམས་པའི་སྤུ་ཉག་འབལ་བ་ལ།།
བཟོད་དུ་མེད་པའི་ན་ཟུག་དགུ་ལྡན་ཞིག།
བདག་གི་རང་རྩིས་བསམ་བློ་འཕྲོག་པ་ལ།།
རང་མགོ་ཐོ་བས་རྡུང་འདྲའི་སྡང་སེམས་ལྕི།།

            བདེན་རྫུན།

བདེན་པའི་ཐགས་པ་ཁྲ་བོའི་ཡས་སྣེ་ན།།
རྫུན་གྱི་ཁྱེའུ་གང་ཞིག་ཡུན་གྱིས་རྩེན།།
རྫུན་ཚིག་དམུ་ཐག་སྐྱ་བོའི་མས་སྣེ་ན།།
བདེན་པའི་འོད་དཀར་ཅིག་ཀྱང་ཡོད་སྣང་འཆར།།

རྫུན་ལ་ཟུར་ཁ་མང་ལ་རྙོག་འཛིང་ལྡན།།
བདེན་གྱི་རྩ་བ་འབུས་ཤིས་རྩེ་མོ་རྒྱས།།
བདེན་རྫུན་བསླེས་པའི་ཐ་གུ་ཁྲ་རིས་མ།།
འཇིག་རྟེན་མི་ཡི་སེམས་སུ་དལ་གྱིས་འཐེན།།

རྫུན་གྱི་དར་ཐགས་ལྷ་ཡི་ཡུལ་དུ་འཐེན།།
བདེན་པའི་མེ་ཏོག་དག་པའི་ཞིང་ལ་བཞད།།
བདེན་རྫུན་འོ་ཆུ་འདྲེས་པའི་བཏུང་བ་དེ།།
ཀུན་ཀྱིས་སྙོམས་པོར་བཞེས་པ་ཀྱེ་མ་མཚར།།

རྫུན་ནི་ཚེར་མ་འདྲ་བར་རྩུབ་སྣང་འཆར།།
བདེན་ནི་ནེ་ཙོའི་སྒྲོ་བཞིན་འཇམ་སྣང་ལྡན།།
འཇམ་རྩུབ་སྣོལ་བའི་འཚོ་བའི་མྱོང་ལུགས་འདི།།
དུས་ཡུན་ཅི་ཙམ་ཞིག་ལ་སེམས་ཀྱིས་མྱངས།།

བདེན་ནི་ལྷ་ཡི་སྐད་དེ་མཐོ་སར་འཕགས།།
རྫུན་ནི་མི་ཡི་ཚིག་སྟེ་ཆ་འཇོག་དཀོན།།
བདེན་རྫུན་ལས་ཀྱི་བག་མ་ཁྲ་རིས་མ།།
སུ་ཡིས་ཁྱིམ་ལ་བསུ་འམ་མོས་མཐུན་ཚོ།།

བདེན་པའི་ལུང་བ་གཡུ་ཡི་གཞོང་བ་ལ།།
རྫུན་གྱི་མེ་ཏོག་དམར་པོ་འགའ་ཤས་བཞད།།
རྫུན་ཚིག་ལྕགས་ཀྱི་ཕོར་བའི་གས་ཁ་ལ།།
བདེན་པའི་དངུལ་གྱི་ལྷན་པ་ཅུང་ཞིག་གླན།།

བདེན་གྱི་སྤང་ལ་ཡན་པའི་ལུག་ཁྱིར་ཡང་།།
རྫུན་གྱི་རི་སྤྱང་ལྟོགས་པ་འགའ་ཤས་རྒྱུགས།།
བདེན་དོན་པགས་པ་སྲ་བའི་བཀའ་དྲིན་ལ།།
རྫུན་གྱི་མཆེ་བ་ཁག་ཅིག་ཐང་ལ་ལྷུང་།།

བདེན་པའི་འོ་མ་སྐོལ་བའི་སླ་ང་རུ།།
རྫུན་ཚིག་སྲིན་འབུ་འགའ་རེ་གཡང་ལ་ལྕེབས།།
ལས་འབྲས་བསླུ་བ་མེད་པའི་ཆོས་ཉིད་ཀྱིས།།
འོ་མའི་ཁ་དོག་ད་དུང་གཙང་ཞིང་དཀར།།

བདེན་པའི་མཚོ་མོའི་ཁ་ཞེང་སྤང་ལ་བརྡལ།།
རྫུན་པའི་གཤོག་དྲུག་ཉ་མོ་དེ་ལ་འཁོར།།
མཚོ་མོར་ཀླུ་གཏེར་རྒྱས་པའི་རྟེན་འབྲེལ་གྱིས།།
ཉ་མོའི་གཤོག་གར་གདོན་གྱིས་ག་ལ་འཛིན།།

བདེན་པའི་རི་བོར་གཡོས་པའི་དར་ལྕོག་དེ།།
རྫུན་ཚིག་རླུང་གིས་བསྐྱོད་དེ་ལྷབ་ལྷུབ་འགུལ།།
བདེན་རྫུན་གཉིས་ཀྱི་སྣང་བ་རླུང་གཞོན་མ།།
གས་སར་འདུར་རྒྱུག་རྒོད་ཀྱང་ཕུགས་རེ་ཆུང་།།

བདེན་པའི་མཚོ་མོ་གཏན་ནས་རྙོག་པ་མེད།།
རྫུན་གྱི་ཆུ་མོ་ཐལ་རྡུལ་འདམ་གྱིས་སྦགས།།
ལས་འབྲས་སྲོག་ལྟར་སྲུང་བའི་བུ་ཆུང་གིས།།
སྔ་མ་གསེར་དང་ཕྱི་མ་ལྕགས་སུ་འཛིན།།

སྤྱི་ཚོགས་གང་གིས་བསླད་པ་མི་གསལ་ཀྱང་།།
རུལ་དྲིའི་རླངས་པ་འཐུལ་བའི་དེ་རིང་ལ།།
དཔྱོད་ལྔན་སྨྲ་ཤེས་དོན་གོའི་མི་བུ་ཡང་།།
སྐབས་འགར་ཐེ་ཚོམ་ལྕགས་སྒྲོག་དམ་པོས་བཅིངས།།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།