ངན་རྟོག་གཅེར་བུར་རྒྱུགས་པའི་སྲིད་པའི་གཞི།།
འདོད་རྔམས་བཤན་གྲིའི་ཁ་ན་འདར་ཞིང་ཡོམ།།
ཉི་ཟླའི་རྣ་ལུང་བོར་བའི་སློང་མོ་བས།།
བདེན་པའི་རྩམ་ཁུག་བྲང་གི་འོག་ཏུ་སྦས།།

རླུང་གིས་གཙབ་པའི་སྒོ་དར་སྔོན་པོ་དེར།།
འགྲོ་ཞོར་མི་ཡི་པར་ཆས་ཡང་ཡང་བསྐོར།།
དཔྲལ་བར་རྨ་ཁ་ཟབ་པའི་ཕོ་རྒོད་དེས།།
ལྷོ་དང་ནུབ་ལ་ལག་པ་བཀྱགས་ནས་བལྟས།།

འདམ་ཆུའི་སྣོད་དུ་ལྷུང་བའི་ཟླ་བའི་རོ།།
སྒོར་དང་ཟུར་གསུམ་རྩོད་པའི་ཀླན་ཀ་ཐལ།།
ཚུགས་ཐུབ་ལྟ་བ་རྙེད་པའི་གསོང་སྨྲ་བས།།
བདེན་པའི་རྒྱབ་རྟེན་གླེགས་བམ་གསེང་ལ་བཞག།

སྨུག་པས་མགྲིན་པ་བཙིར་བའི་རི་བོའི་ཟོམ།།
ཁྭ་ཏས་གཤོག་ལྕག་གཟེད་པས་ཡོམ་ཡོམ་བསྒུལ།།
སྦྲ་སྒོར་པགས་པ་མཉེད་པའི་གསར་རྒོད་དེས།།
འགྲམ་གྱི་གྲི་དང་མདུང་ལ་ལག་པ་བསྙབས།།

ཁ་ལག་ལྷག་མ་བསྐྱེད་པའི་་རྐུབ་སྟེགས་དེ།།
ལུགས་ལྡོག་ཝ་ཁྱིའི་སྡེར་མོ་སྟོང་གིས་བཏེགས།།
ཚངས་པའི་ལམ་ཐིག་བརྒྱུད་པའི་བསོད་སྙོམས་པས།།
ཕྱག་གི་འཁར་གསིལ་ས་ལ་ཡང་ཡང་བརྡབས།།

སྒལ་ཤུན་བཤུས་པའི་འོག་གཞི་ནད་པ་འདིའི།།
ནོར་བུ་བྲུས་པས་འཕག་འཚག་མང་དུ་རྒྱག།
ལྟེ་ཐག་བཅད་མ་ཐག་པའི་ཚེ་སྲོག་དེས།།
ཡོད་ཚད་སྟོང་བ་རེད་ཅེས་ངུ་སྐད་འདོན།།

ཆུ་བོའི་གཞུང་ལ་བསྐྱོན་པའི་ཀོ་གྲུ་ཞིག།
རླབས་ཀྱིས་གཙེས་པས་བྲག་གི་སྲུབས་ལ་འཚངས།།
ཆུ་འགྲམ་མེ་ཏོག་འཐུ་བའི་བེའུ་རྫི་དེས།།
དབྱུག་པའི་རྟ་ཁ་ཨ་མའི་ཕྱོགས་ལ་འཐེན།།

ས་རྡུལ་ཁུར་བའི་གླེགས་བམ་གསེར་བྲིས་མ།།
ལོ་ཟླའི་ཉལ་གོས་བརྩེགས་པའི་འོག་ནས་རུལ།།
སྲོག་གིས་བླུ་ཡོན་སྤྲད་པའི་ཕོ་ཉ་བས།།
ཕྱིར་རྟོག་ཉི་མའི་པང་ལ་མཆི་མ་ཟགས།།
           ༢༠༡༤--༦--༢༧ཉིན། 

 (མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།