གཞན་གྱི་སྐྱོན་བརྗོད་ཐེངས་གཅིག་གིས།།
རང་སེམས་དྲོན་མོར་ན་ཟུག་བསླངས།།
རང་ཉིད་ཉེས་པའི་བྱ་བཞག་དག།
རང་སྐྱོན་ཡིན་པ་རྟོགས་པར་དཀའ།།

སྡུག་བསྔལ་ཁབ་ཀྱི་རྩེ་མོ་ཙམ།།
རང་མགོར་ཐོན་ན་སུ་ཡང་འཇིགས།།
གཞན་ལ་གནོད་པའི་འཚེ་སེམས་དག།
ཉིན་མཚན་རྟ་ཕོའི་བང་ལ་འགྲན།།

གདོང་ནས་འཛུམ་ཆུང་བྱེད་ལུགས་འདི།།
སྲང་ན་འགྲོ་བའི་ཡུལ་མིའི་སྲོལ།།
སེམས་ནས་སྐད་ཆ་བཤད་པ་ཡང་།།
སྙིང་ལ་ན་བའི་ཕ་མའི་གཏམ།།

རང་གི་ཁེ་ཕན་ཕྲན་བུའི་ཆེད།།
གཉེན་ཉེ་ལ་ཡང་བསླུ་བྲིད་གཏོང་།།
རང་ལ་འཐོབ་བྱ་ཆུང་བུའི་དོན།།
སྤུན་མཆེད་དག་ཀྱང་གཞན་ལ་འཚོང་།།

རང་བཞིན་དྲང་བོའི་མཛེས་ཆ་ལ།།
ཀླད་མེད་ཁུམ་པོའི་ཐ་སྙད་སྤྱོར།།
རང་གཤིས་འཇམ་པོའི་བཟང་ཆ་ཡང་།།
ནུས་མེད་སྡར་མའི་མིང་བྱང་འདོགས།།

འབྱོར་མེད་དབུལ་བོའི་ནོར་འཁྲུལ་དག།
རང་ལམ་གཅོད་པའི་རྒྱུ་རུ་འགྱུར།།
འབྱོར་ལྡན་ཕྱུག་པོའི་མ་འཁྱོངས་ས།།
ཉམས་མྱོང་མེད་པའི་གནས་སུ་བརྩི།།

ཁ་ཡག་ངོ་དགའི་སྐད་ཆ་ལ།།
རྣ་བ་གཏད་ནས་ཉན་མཁན་མང་།།
སེམས་དཀར་གཏམ་གྱི་བསླབ་བྱ་དག།
རྗེས་ལུས་ཡིན་ཞེས་འདོར་བར་བརྩོན།།

ཡུན་རིང་འགྲོགས་པའི་ཕུ་ནུ་ཚོར།།
སྐྱོན་བརྗོད་ཚིག་ངན་བཤད་མཁན་མང་།།
དེ་རིང་འཕྲད་པའི་ངོ་ཤེས་ལ།།
ཨག་གསར་སྙིང་གཏམ་གླེང་རྒྱུར་དགའ།།

ངོ་ནས་བྱུང་བའི་འཛུམ་མདངས་དག།
ཁེ་ཕན་ཞིག་གི་ཆེད་དུ་གྲུབ།།
ཁ་ནས་བཤད་པའི་གཏམ་སྙན་ཡང་།།
དམིགས་ཡུལ་ཅིག་གི་དོན་དུ་བྱུང་།།

བསླུ་བའི་ལྗགས་རྩལ་མེད་པ་ཚོས།།
རྐང་བ་ས་ལ་འཛུགས་པ་དཀའ།།
ཆབ་སྲིད་ཀླད་པ་མེད་པའི་མིས།།
དོན་ཆེན་ལས་རིགས་གཉེར་བ་དཀོན།།
     ༢༠༡༤ ༡༢ ༡༤ཉིན།     

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།