དབང་ལྔས་གཅེས་ཤིང་བཀུར་བའི་ངན་གོམས་འདིས།།
དབང་ཆེན་སེམས་ཀྱི་རྒྱལ་མོར་རྔམ་སེམས་རྒོད།།
དབང་ལུང་ཆོས་ཀྱིས་མི་ཐུལ་སེམས་ཁམས་འདིས།།
དབང་མེད་ཉེས་སྐྱོན་བསགས་པ་རྩིས་མི་ཚར།།

དོན་ཆེན་གཙིག་ཏུ་བཀུར་བའི་སྙིང་སྟོབས་དང་།།
རླབས་ཆེན་འཕྲིན་ལས་སྒྲུབ་པའི་རུས་ཞེན་དག།
སེམས་ཀྱི་གཏོང་ཕོད་ཆེན་པོས་གནང་གྱུར་བས།།
དཀའ་སྡུག་ལས་ཀུན་གདོང་གིས་བསུ་བར་སྤོབས།།

ལུས་ཟུངས་ཟད་ཀྱང་སྤྱི་དོན་ཁུར་དུ་བཞེས།།
སྤྱི་ནས་གསོས་ཀྱང་རང་དོན་ཁེ་ཕན་གཉེར།།
མི་མཐུན་ལས་ཀྱི་ཉིན་སྲིབ་དཀར་ནག་འདི།།
སེམས་ཀྱིས་སྐྱེད་པའི་ས་བོན་རྡོག་པོ་ཉིད།།

སྣ་ཚོགས་མཆོད་པའི་རྫས་མཆོག་ཀུན་བཤམས་ཤིང་།།
ཡར་འཇོག་བཀུར་བསྟིའི་མགོ་བོ་སྒུར་ན་ཡང་།།
གང་ཞིག་སེམས་ཀྱི་སྣོད་ཆེན་མ་གང་བས།།
ཞེ་སྡང་དྲག་པོའི་སྦྱོར་བ་རྩོམ་ཞིང་འོང་།།

འཇིག་ཉེན་དངངས་འཚབ་དྲག་པོའི་འོ་དོད་ཀྱིས།།
སྐྱབས་འཇུག་གསོལ་འདེབས་མང་པོ་སྒྲོན་ན་ཡང་།།
གང་ཞིག་སེམས་ཀྱི་དམག་ཆེན་མ་སྒུལ་ན།།
སྐྱོབ་པའི་དུས་ཞིག་ནམ་ཡང་ཡོད་རེ་སྐན།།

སྒྲིག་ཁྲིམས་བཀའ་ལུང་བཙན་པོ་བསྒྲགས་པ་དང་།།
ཉམས་རྒུད་ཁྲག་རྩ་དམར་པོ་སྐམ་ན་ཡང་།།
གང་ཞིག་ལྷག་བསམ་དྭངས་མོ་སྐེམ་གྱུར་བས།།
མཉམ་རུབ་གསེར་གྱི་དཔུང་རྡང་རིང་དུ་ཆད།།

སྐབས་རེར་ལྷ་ཆོས་ཟེར་ཞིང་ཕྱག་གིས་མཆོད།
ལན་རེར་གདོན་བགེགས་རེད་ཅེས་མེ་ལ་སྒྲོན།།
གང་ཞིག་སེམས་ཀྱི་རི་རྒྱལ་མ་བརྟན་ན།།
མི་རྟག་ལུས་ཀྱི་ཁ་མདོག་དེ་ལྟར་བརྗེ།།

ལུས་འདི་མེ་ཕུང་དམར་པོས་བསྲེག་ན་ཡང་།།
སེམས་ཁོང་འཁྱག་པའི་གྲང་འདར་ལྷབ་ལྷབ་རྒྱག།།
ལུས་འདི་ངལ་ཞིང་དུབ་པའི་ཟུངས་ཟད་ཀྱང་།།
སེམས་ཀྱི་དཔལ་འབར་འོད་དུ་སྒྲོན་པའང་ཡོད།།

མདོར་ན་བདེ་སྡུག་ལེགས་ཉེས་གང་འབྱུང་བ།།
རང་གི་སེམས་ངོགས་དྲོན་མོའི་དྭངས་འཐིབ་ལགས།།
སེམས་ཀྱི་དབང་ཆེན་རྒྱལ་མོའི་བཀའ་ལུང་གིས།།
སྲིད་པའི་ཁམས་འདི་གནམ་ས་བླ་འོག་བརྗེ།།

གསར་བསྒྱུར་དུས་རབས་འདི་ཡི་གོང་ཁ་ནས།།
རང་རིགས་ཉམས་ཤིང་ཕོངས་པའི་སྐྱོ་གར་འདིར།།
སྤུན་ཟླའི་ལུས་སེམས་གཅིག་ཏུ་མཐུན་རྒྱུ་ན།།
མི་ཐུབ་དུས་ཀྱི་དགྲ་བོ་འདུལ་བ་སླ།།

སྙིང་སྟོབས་གསོན་པོའི་ལྗང་ལོ་ལྡེམ་ཡག་ལ།།
སྒྱིད་ལུག་བ་མོས་གཙེས་ཤིང་གཙེས་གྱུར་བས།།
དོན་ལྡན་ལས་ཀྱི་སོ་ཁ་ཤོར་ཚར་ན།།
རྒས་མེད་སེམས་ཀྱི་ལྷ་ལ་བདག་ཕྱག་འཚལ།།     

(མཆོད་མེའི་པར་དབང་གཞན་གྱིས་དགོལ་མི་རུང)
 

རྩོམ་ཁུངས། ངེད་དྲ་བ།