ཚོར་བ་འཇའ་སྤྲིན་གྱི་གུར་ཁྱིམ་དབུས་ན།།
ཁྱེད་ནི་གཡང་འཁྱིལ་གྱི་ནོར་བུ་གཅིག་སྟེ།།
སྣང་སྲིད་བརྡ་གླུ་ཡི་འགྱུར་ཁུགས་སྟོང་གིས།།
སྲིད་པའི་རི་སིལ་ལ་འཛུམ་རིས་བྲིས་འགྲོ།།

རབ་གསལ་གངས་དཀར་གྱི་ཉིན་དང་སྲིབ་ན།།
ཁྱེད་ནི་དྭངས་གཙང་གི་ཆུ་མོ་ཞིག་སྟེ།།
རིག་པ་མེ་ལོང་གི་མཐའ་དང་དབུས་སུ།།
དད་པའི་ཡོན་ཆབ་ཀྱི་རླབས་རིས་བཞེེངས་འགྲོ།།

ཟག་མེད་སེམས་ཁམས་ཀྱི་རི་བོའི་མགུལ་ན།།
ཁྱེད་ནི་འདབ་སྟོང་གི་དར་ལྕོག་ཞིག་སྟེ།།
ཆོས་ཉིད་སྙན་འཇེབས་ཀྱི་རོལ་མོ་དཀྲོལ་གྱིན།།
འཁོར་བའི་སྒལ་གཞུང་ལ་མཛེས་པ་བསྩལ་འགྲོ།།

ཉི་ཟླའི་གཞས་ཁྱིམ་གྱི་སྒེའུ་ཁུང་དབུས་ན།།
ཁྱེད་ནི་ཐུ་བྟོད་ཀྱི་འབྲོག་མོ་ཞིག་སྟེ།།
ཡིག་དྲུག་དབྱངས་རྟ་ཡི་འགྱུར་ཁུགས་ཁྲོད་ནས།།
འདི་ཕྱིའི་ལམ་ཁ་ཡི་བདེན་པ་འཚོལ་འགྲོ།།

                     2014.2.22

             ཟླ་འོད་རྒུམ་པའི་སེམས་རིས།

ཞལ་གོར་གོར་ལ་འོད་ཟེར་དཀར་དམར་རྒྱས་ཡོད།།
འཛུམ་ཆུང་ཆུང་ལ་པདྨའི་འདབ་ལོ་མངོན་ཡོད།།
སྨྲ་ཉུང་ཉུང་དེས་བྱིས་པའི་རང་གཤིས་སྟོན་པའི།།
ངའི་ཟབ་ས་རུ་ཁྱེད་ནི་རྒྱ་སེའི་མེ་ཏོག།

ལག་ཆུང་ཆུང་དེ་མཇམ་ཤའི་ཁུད་ན་འབར་ཡོད།།
མིག་ཟླུམ་པོ་དེ་དཔྲལ་བའི་འགབ་ན་འཛུམ་ཡོད།།
སྐྲ་བསིལ་མོ་དེས་ཚོར་བའི་བྲེད་ཤ་སློང་བའི།།
ངའི་གདེང་ག་ན་ཁྱོད་ནི་མར་མེ་ཚེ་འབར།།

གཤིས་མཚར་པོ་དེ་དགོད་སྒྲའི་ཀློང་ན་ངོམ་ཡོད།།
རོགས་ཆུང་ཆུང་དེ་གཉོམ་ཆུང་མིག་གིས་འཚོས་ཡོད།།
ཞེ་དྭངས་གཙང་གི་ཁ་མདོག་མདངས་སུ་འཕོས་པའི།།
ངའི་གཏིང་རིམ་ན་ཁྱོད་ནི་སྒྲོལ་མ་རང་བྱོན།།

སེམས་ཆུང་ཆུང་ལ་དམ་བཅའི་སྒོ་ཟྭ་མེད་ཀྱང་།།
ཞེ་དྭངས་མོ་ལ་མི་འགྱུར་རྒྱབ་རི་མེད་ཀྱང་།།
ངའི་ཟབ་ས་རུ་ཁྱོད་ནི་ནམ་མཁའི་ལྷ་སྟེ།།
ངག་གྲེ་འགྱུར་གྱིས་སྣང་སྲིད་གླུ་རུ་ལེན་ནོ།།
          2015.1.12

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།