ང་ནི་གཟུགས་བརྙན་ཁུར་བའི་མེ་ལོང་ཞིག།
འགྲོ་བའི་མིག་དང་དག་པའི་སྣང་བ་ལ།།
རྒྱལ་བའི་སྲས་དང་བཙན་གྱི་ས་མཁན་ཏེ།།
བླ་ན་འཕགས་ཤིང་ཀུན་ལས་རྒྱལ་བ་ཞིག།

དོན་ལ་ཁྲག་གི་ཁ་མདོག་དམར་བ་སྟེ།།
སྣང་བའི་ཁ་དོག་སྐྱེ་དགུར་མཚུངས་པ་ཡི།།
ལས་དབང་གཅིག་ཀྱང་ལམ་ཀ་མ་གཅིག་པའི།།
བས་མཐའི་ཚལ་གྱི་ང་རང་སྙིང་རེ་རྗེ།།

འཁོར་བའི་མེ་ཏོག་བཏུ་བར་མ་སུན་ཞིང་།།
ཞིང་གི་འོད་ལ་དཔྱང་བར་མ་སྤྲོ་བའི།།
འོད་དང་མུན་པ་འདྲེས་པའི་བར་དེ་ན།།
སྣང་བ་གཉིད་མ་སད་ཅིག་ཐོགས་ནས་ཡོད།།

ཚེ་ཡི་ཕྲེང་བ་མ་ཆད་ཐར་ཆགས་སུ།།
རི་བོའི་ཕར་གྱི་གཟུངས་ལ་ལེགས་བརྒྱུས་ཏེ།།
རེ་བའི་ཐིག་ལེ་གཏེར་ལ་སྦས་ནས་སུ།།
འོད་ཀྱི་གཤོག་ཟུང་རྒྱས་པའི་ང་རོ་ཡིན།།
               2015.2.24

             མུ་ཏིག་ཆག་རོ།

སེམས་ཤིག་ཡི་གེའི་ནང་དུ་གབ་པ་ན།།
ཀ་ཁའི་མིག་ཆུ་འཐོར་ཞིང་ངུ་བར་བྱེད།།
སྐྱོ་བ་དབྱངས་ལ་འཐེན་པའི་དར་སྐུད་ཅིག།
ང་ཡིས་ཚོར་བའི་ཕག་ནས་བསྒྲིམ་པར་བྱས།།

ཇག་པ་མགྲོན་དུ་འབོད་སའི་ཕོ་བྲང་ན།།
ང་ཡི་མུ་ཏིག་ཆག་རོ་སྡེར་དུ་བཤམས།།
མགྲོན་པོ་འཛུམ་གྱིས་བསུ་བའི་བར་སྟོང་ན།།
མིག་ཆུའི་ལག་ཆ་ཐོགས་པའི་ཆང་མ་ཞིག།

དེ་ཡིས་སྐྱོ་བའི་ངོས་སུ་ཆང་ཞིག་འདྲེན།།
ཆང་དེ་སེམས་པ་བཟི་བའི་རྒུན་ཆང་ཡིན།།
མིང་ལ་ཡིག་འབྲི་ནག་པོའི་ཆང་མ་ཟེར།།
མིང་དེ་མཁྱུད་པ་ཞིག་གི་མཚོན་དོན་ཡིན།།

དབྱངས་ཤིག་སྟོང་བའི་དབྱིངས་ནས་དཀྲོལ་བས་ན།།
མི་ཞིག་སེམས་པའི་ཁམས་སུ་འཕྲོད་པར་བྱས།།
མི་དེ་སྣང་བ་བརྒྱན་པའི་མུ་ཏིག་ཅིག།
མུ་ཏིག་ཆག་ལ་ཤོར་ནས་སྐྱོ་བ་འཁོར།།
          2015.3.11 བླ་རུང་ནས།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།