སྒྱུ་མ་རབ་རིབ།
འོད་ཀྱི་སྐར་ཁུང་དེ་ལ་ནི།།
མིག་གི་རྒྱལ་མོ་བཟེད་པ་ཡིས།།
རྨི་ལམ་ཐུན་གཅིག་རྨིས་པ་ལ།།
ང་དང་ཁྱོད་ཀྱི་མི་ཚེ་འཁྱིལ།།
སྤྲིན་ལ་འཐབས་པའི་སེམས་ངོས་སུ།།
ཁྱོད་ཀྱི་དྲོད་ཁོལ་སྨིན་པ་ཡིས།།
ཚེ་ཡི་རི་མོ་སྐྱ་ནར་དེ།།
རབ་རིབ་ཤིག་ལས་ཅི་ཡང་གདའ།།
སེམས་ལ་ལྷུང་བའི་སྙིང་སྡུག་གང་།།
ཁྲག་རྩའི་སྦུབས་སུ་ལྷོག་ལྷོག་གདུ།།
སྐྲ་ལོ་དཀར་བའི་ཨ་མ་ཞིག།
སྣང་བའི་སྒང་དུ་ཡ་ཡོར་ཐོན།།
དུས་ཀྱི་རྡོ་རིང་བསླངས་པ་ལ།།
སྙིང་གི་དམ་ཚིག་བརྟན་སེ་དགོས།།
འགྲོས་ཆུང་གོམ་སྟབས་གཞལ་བ་དེ།།
མི་ཚེའི་གླུ་དབྱངས་ཡིན་ན་བསམ།།
མི་རྟག་རླུང་བུ་ལྡང་བ་ལ།།
ཞེ་འདང་འཁུར་བ་མ་ཡིན་ཞིང་།།
སྲོག་སྣེར་བསྒོས་པའི་དབྱངས་ཅན་མ།།
གཙུག་ཕུད་གདན་དུ་དལ་བཞུགས་མཛོད།།
བྱེ་མའི་སྒང་གི་རྐང་རྗེས་དེ།།
དུས་ཀྱི་ཆར་བས་བརླན་ནའང་།།
གཟུགས་མེད་གྲིབ་མ་བསྣོལ་བ་ལ།།
དབྱེ་མཚམས་སུ་ཞིག་བསྒྲེངས་བར་སྤོབས།།
རྒྱང་ནས་མཆེད་པའི་གླུ་སྐད་དེར།།
ངས་ནི་རྣ་བ་དཀྲོགས་དཀྲོགས་ཉན།།
ཆུ་ལ་ཤར་བའི་གཟུགས་བརྙན་དེ།།
ཁྱོད་རང་ཡིན་པ་ཞེ་ལ་བབས།།
༢༠༡༤-༩-༡༥ ཉིན་བྲིས།
(མཆོད་མེའི་པར་དབང་གཞན་གྱིས་དགོལ་མི་རུང)
རྩོམ་ཁུངས། ངེད་དྲ་བ།