ཆར་སིམ་ཁྲོད་ཀྱི་ཁྱོད་རང་སྟེ།།
རླུང་བུས་དཀྲིས་ཤིང་མུན་པས་བསྡམས།
རི་བོའི་ཕར་ཚུན་ཆོད་པའི་མི།།
སྐྱོ་བ་སྐྱེས་པར་ཅིས་མི་འགྱུར།།
བརྩེ་བའི་མདུད་པའི་སྣེ་མོ་རུ།།
ཆུང་ཆུང་ལས་ཀྱི་མཛའ་གཞས་འདར།།
མགོ་བོ་སྨད་ཙམ་བྱས་པ་ན།།
མི་ཚེའི་རི་མོ་ཆུ་ལ་ཟགས།།
ཆུ་བོའི་གཞུང་ལ་མེ་ཏོག་སྐྱེས།།
མིག་ཆུའི་གདུང་བ་གཉིས་སུ་གྱེས།།

དོ་ནུབ་ང་ནི་བྱིའུ་ཞིག།
གཟེབ་ཏུ་ཚུད་པའི་བྱིའུ་ཞིག།
ཡིད་ལ་སྐྱེས་པའི་ན་ཟུག་བཅས།།
གཙང་བོའི་ནང་དུ་ལྷུང་གྲབས་འདུག།
མཚན་ལམ་རིང་མོའི་ནགས་ཚལ་གསེབ།།
སྙིང་གར་རྡེག་པའི་དབྱངས་རྟ་དེ།།
དར་མདོའི་མཛའ་གཞས་ཨེ་ཡིན་སྙམ།།
ཁྱོད་ཀྱིས་བཏང་བ་མིན་ནམ་སྙམ།།
གཞས་དེའི་ཕྱེད་ཀར་སྨུག་པ་འཐིབ།།
གཞས་དེའི་ཕྱེད་ཀར་སྐྱོ་བ་འཐིབ།།

དར་རྩེ་མདོ་ཡི་མཚན་མོའི་འོག།
ཁྱོད་ཀྱི་ཕྱོགས་སུ་འཕྲིན་ཞིག་བྲིས།།
སྐྱེ་བ་འདི་ཡི་གཏམ་རྒྱུད་བྲིས།།
གཏམ་རྒྱུད་ནང་དུ་མི་ཞིག་བྲིས།།
འཇིག་རྟེན་འདི་ཡང་ཆུང་སོང་ངམ།།
བྱེ་མའི་ཐང་སྟོང་ཞིག་ཏུ་ཡང་།།
རླུང་གིས་འདར་བའི་དབྱངས་རྟ་ཞིག།
སེམས་ནས་སེམས་ལ་སྤྲད་པ་ཙམ།།
ཁྱོད་རང་རྟག་པར་མ་སྐྱོ་ཞིག།
ང་ཡི་མིག་སྔར་སྐྱོ་བ་སྟེ།།
མུན་པའི་སྒོ་མོ་རྡུང་བ་རེད།།
གྲིབ་མས་རྣམ་ཤེས་དེད་པ་རེད།།
དོ་ནུབ་མཚན་མོའི་ཕྱི་ནང་དུ།།
མཛའ་གཞས་རེ་རེའི་གྲིབ་མ་འཕུར།།
               2015.7.7.མཚན་མོར་གྲུབ།

(མཆོད་མེའི་པར་དབང་གཞན་གྱིས་དགོལ་མི་རུང)

 

རྩོམ་ཁུངས། ངེད་དྲ་བ།