བྱིས་པ་རྣམས་ལ་གཏམ་དུ་བྱས་པ་མགུར་མ་མཐོང་བ་འཛུམ་ཤོར།
བྱིས་པ་དག་གི་སྐད་ཆ་ལ།།
དེ་ཙམ་ཆ་འཇོག་ག་ལ་ཡོད།།
ཕྱི་ཚུལ་ཚིག་གིས་བརྒྱན་གྱུར་ཀྱང།།
ནང་གི་དོན་ནི་འཆལ་ཆོལ་བ།།
བསླབ་སྦྱང་ཅུང་ཙམ་མ་བྱས་པར།།
མཁས་པར་འགྱུར་འདོད་རྨི་ལམ་ཙམ།།
ནང་པའི་ཆོས་ཀྱི་སྙིང་བོ་ནི།།
འཁོར་བ་སྡུག་ཏུ་མཐོང་བ་ཉིད།།
དེ་ལས་སྒྲོལ་བར་སུ་ནུས་ན།།
དེ་ནི་རྫོགས་སངས་རྒྱས་པ་ཉིད།།
རྗེ་བཙུན་མི་ལ་རས་པ་དེ།།
ཚེ་གཅིག་ལུས་གཅིག་ཉིད་དུ་ནི།།
རྫོགས་སངས་རྒྱས་པའི་ཕ་རོལ་བྱོན།།
དེ་ཡི་རྣམ་ཐར་ཐོས་མྱོང་ངམ།།
དེ་ཡི་མགུར་ལ་མཇལ་མྱོང་ངམ།།
དེ་ཡི་སྙིང་སྟོབས་ཤེས་ལགས་སམ།།
བླ་རུང་མཁན་པོ་ཚུལ་བློ་དེ།།
མཁས་པ་ཡིན་པ་བསྙོན་དུ་མེད།།
འོན་ཀྱང་མཁས་པ་ཐམས་ཅད་ནི།།
རྫོགས་སངས་རྒྱས་པའི་ངེས་པ་མེད།།
འཆད་རྩོད་རྩོམ་ལ་བྱང་བ་ཡིས།།
ནང་ཆོས་སྙིང་བོ་མི་ལོན་ཏེ།།
འཁོར་བ་དོན་དུ་གཉེར་བ་དང་།།
ཁེ་དང་སྙན་གྲགས་ལ་ཞེན་པ།།
དེ་ནི་འཕགས་པ་ག་ལ་འགྱུར།།
དེ་ལྟ་བུས་ན་སངས་རྒྱས་དང་།།
འཁོར་བར་འཁོར་བའི་གང་ཟག་གཉིས།།
བསྡུར་བ་བྱེད་པ་བྱིས་པའི་བློ།།
ཅོ་ཀ་ཙམ་ནི་བྱེའུ་ཡང་།།
སྒྲོག་པར་ནུས་པ་ཡིན་མོད་ཀྱི།།
ཁུ་བྱུག་སྔོན་མོའི་གསུང་སྐད་ལ།།
འགྲན་འདོད་རེ་བ་འབྲས་མེད་ཡིན།།
ཁ་ནས་ཅི་བྱུང་ལབ་བདེ་ཡང་།།
དོན་གྱི་སྟེང་ནས་ནོར་ཉེན་ཆེ།།
དེ་ཕྱིར་སྔར་གྱི་ལོ་པཎ་རྣམས།།
བསླབ་པའི་ཕ་མཐར་མ་སོན་པར།།
རྩོམ་པའི་ལས་ལ་འཇུག་མི་བགྱི།།
ད་ལྟའི་དུས་ཀྱི་མི་ཕལ་ཆེར།།
ཀློག་ཙམ་བསླབས་རྗེས་རྩོམ་ལ་འཇུག།
དེ་ཕྱིར་ནོར་འཁྲུལ་རྒྱུན་དུ་འབྱུང་།།
དེ་ཡང་ལམ་གྱི་གོ་རིམ་ཙམ།།
ཡིན་པ་བསྙོན་དུ་མེད་མོད་ཀྱང་།།
རྒྱུན་དུ་དྲན་ཤེས་བསྟེན་ན་བཟང་།།
རང་གི་ཁོག་ན་ཤེས་མེད་ན།།
ཁ་ནི་མང་བར་མི་བྱ་སྟེ།།
བོད་ཀྱི་མེས་པོ་དག་གིས་ཀྱང་།།
མ་ཤེས་མ་གོ་གཏམ་གྱི་མཆོག།
ཟེར་བ་དེ་ཡང་དོན་དང་མཐུན།།
དེ་ཕྱིར་བསླབ་ལ་བརྩོན་པ་རྣམས།།
དང་པོ་ཐོས་པ་དོན་དུ་གཉེར།།
དེ་རྗེས་འཆད་རྩོད་རྩོམ་གསུམ་ལ།།
འཇུག་པར་བྱས་ཀྱང་འཕྱི་མི་འགྱུར།།
དྲང་པོའི་གཏམ་གྱི་སྨྲས་པ་ཡིས།།
ཤ་ཚའི་ཚིག་འདི་མཐོང་བ་ན།།
མཁས་འདོད་དྲེགས་པས་མ་ནོན་པར།།
སྨྲས་པ་ཡིན་སྙམ་འཁྲུལ་མི་རུང་།།
འོས་ལངས་ཞེས་པ་ཞིག་གིས་མཁན་པོ་ཚུལ་ཁྲིམས་བློ་གྲོས་ལ་བསྟོད་པ་བྱེད་པའི་ཆེད་དུ་རྗེ་བཙུན་མི་ལ་རས་པ་དང་བསྡུར་བ་བྱས་འདུག་པ་ལ། མི་ལ་ལས་ཚུལ་བློ་སྟོབས་ཚུལ་ཞིག་ལབ་འདུག་པས། ལན་དུ་དེ་མ་ཐག་སེམས་ལ་ཅི་བྱུང་ཤར་མར་བྲིས་པའོ།།
རྩོམ་སྒྲིག་པ། ལྷ་སྐྱིད།
(མཆོད་མེའི་པར་དབང་གཞན་གྱིས་དགོལ་མི་རུང)
རྩོམ་ཁུངས། ངེད་དྲ་བ།