རབ་དྭངས་ཟླ་བ་དཀར་པོའི་དགྱེས་འཛུམ་གྱིས༎
མཚན་གུང་རི་སྐྱེས་རྩི་ཤིང་ལྷོད་ཀྱིས་འཇགས༎
དབེན་པའི་ཆོས་ཀྱི་ངུར་སྨིག་རྣམ་རོལ་བའི༎
བློ་གསལ་བཙུན་ཆུང་དག་གི་ཆོས་སྐད་སྙན༎

མཁའ་བསྟར་སྐར་མའི་འོད་ཟེར་ཆེམ་ཆེམ་འཕྲོ༎       
དྲི་བྲལ་དྭངས་གསལ་རླུང་བུ་ཡངས་པར་ལྡང་༎
ག་ལེར་གཟིགས་དང་སྣང་བའི་རི་གྲོང་འདིར༎        
ཆོས་ཀྱི་གཏེར་ཤོག་མངོན་གསལ་མཁའ་ན་འཕུར༎

ཞི་བའི་ཁམས་འདིར་ས་གཞིའི་རྡུལ་དག་ཅིང་༎
མ་ཡལ་བྱིན་རླབས་དྲོད་མོའི་རྔམ་ཤུགས་འཁྱིལ༎
འོད་ཀྱི་སྒྲོན་མེ་ཆུང་ཆུང་ཟེར་མས་ཀྱང་༎
བདག་གི་དུས་གསུམ་ནམ་མཁའ་ཡངས་པར་ཕྱེས༎

མཚན་གྱི་རང་ཉིད་སྒེའུ་ཁུང་ངོགས་ནས་ཅེར༎
དྲན་པའི་ཞལ་རས་ཟླ་བའི་ངོགས་སུ་སྒོམ༎
སྙིང་གི་མིག་ཆུ་སྤྲིན་པའི་གསེང་དུ་གཏོར༎        
ཁེར་རྐྱང་རྣམ་ཤེས་རླུང་བུའི་གཤོག་པར་འཇུས༎        

མཛེས་སྡུག་མི་ཟད་རྨ་ཀླུང་དལ་གྱིས་འབབ༎
ཞེན་པས་མདུད་དེ་རེ་བས་ཡོངས་སུ་བཅིངས།།
མཚན་གྱི་རྣམ་ཀུན་སྣང་བའི་ས་འཛིན་འདིར༎        
ཆོས་ཀྱི་བཀའ་ཡིག་སྤྲིན་གྱི་རྔ་སྒྲར་འདྲེས༎

སྐྱོ་བའི་སྣང་བ་རི་བོའི་སུལ་དུ་ཕྱིན༎
རེ་སྒུག་རྨི་ལམ་སྐར་མའི་སྐེད་དུ་བཏེགས༎        
ལྷིང་འཇགས་དྲན་པའི་དབེན་འཇེབས་གྲྭ་ཤག་ཏུ༎        
ཁྱེད་ཀྱི་དགག་གཞིའི་ཚེར་མ་སྙིང་དུ་སྡུག།

རབ་རིབ་སྐྱོ་བ་ང་ཡི་ནམ་མཁར་འཆར༎
འབྲུག་གི་ངུ་སྒྲས་སྡུག་གི་སྣང་བ་བསླངས༎
རྨི་ལམ་ནང་གི་སྣང་བའི་སྣང་བ་ལ༎
ས་ནས་བཞད་པའི་མེ་ཏོག་ཡང་ཡང་ངུ་༎

མིག་ཟུང་ཀེམ་ཀེམ་བརྩེ་བའི་རི་བོར་འཁྱུད༎
རྨི་ལམ་ངོས་ཀྱི་རི་མོར་སྣང་བ་ཞེན༎        
འབྲེལ་ཐག་སྐུད་པའི་ལམ་བུ་ཆུང་ཆུང་ལ༎        
འཕྲིན་པ་དམར་པོའི་དོ་ཤལ་ཡང་ཡང་གཏོར༎

ངས་ནི་རྣམ་ཀུན་སྨྲེང་བའི་པིར་ཁས་བྲིས༎
ཁེར་རྐྱང་རྨི་ལམ་སྙིང་དུ་སྐུད་པས་བཙེམ༎
དྲན་ཤེས་སྤོབས་པས་བཟོས་པའི་སྣང་བ་ལ༎
ཁྱེད་ནི་ལོ་མའི་མཐིལ་གྱི་འབྲུ་རྡོག་གཅིག།

མདོག་མེད་འཚོ་བའི་མེ་ལོང་ཁྲོད་ཀྱི་ང་།།        
ཞི་བའི་དབྱངས་ཡིག་གྱེར་བའི་མཚན་གུང་འདིར།།
རས་གཟན་སྣེ་མོ་ཟད་པའི་གཏམ་རྒྱུད་ཅིག།
དུས་གསུམ་སྨུག་ཞགས་འཕྱུར་བའི་ངོས་སུ་བཏབ༎        

དམར་པོ་རི་ནས་འཕུར་བའི་རྨི་ལམ་དེ།།
ཨ་ཡིག་སེར་པོའི་སྟེང་དུ་སིམ་ཙ་ན༎
སྔོ་སེར་དམར་ལྗང་ཀློང་གི་སྲིད་པའི་སེམས༎
སྐམ་ཞིང་རུལ་བའི་ལྗོངས་སུ་ཡར་ལ་འཕེལ༎

ཚུར་མཐོང་སྐྱེ་བོས་མི་མཐོང་གདོང་གི་རྡུལ༎        
དུས་རྒྱུན་རབ་རིབ་ཕྱི་ནང་བར་དུ་སིམ༎        
སྣང་བའི་ཉག་ཁ་ཟད་པོའི་བར་མཚམས་སུ༎
སེར་ལེར་གསལ་བའི་ཉི་མ་རེ་བས་སྒུག།

གྱང་ལྡེབས་ཕར་ནང་བརྒལ་བའི་དྲན་འཆར་འདིས༎
སྣང་བའི་བ་སྤུའི་གསེང་དུ་མུ་ཏིག་ལྷུང་༎
སེམས་པའི་སྤུབས་ཀྱི་སྡུག་གུ་ཆུང་ཆུང་ལ༎
ཨེན་ཙམ་སྤྲོ་བའི་འཛུམ་རིས་ཡང་ཡང་དམུལ༎    

                           ༢༠༡༥  ༠༦ ༠༦ ཉིན།

                                                                                                རྩོམ་སྒྲིག་པ། སྐྱ་བོ།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།