འཆི་བའི་རི་སུལ་རྡུལ་དང་ཁ་བས་གཡོགས་ཤིང་།།
ངག་གི་ས་ཆེན་མུན་པའི་ཡོལ་བར་འདྲེས་པའི།།
བདག་ཉིད་དུག་ལྔ་ཁུར་བའི་མགྲོན་པོ་ཞིག་སྟེ།།
ཉམ་ངའི་གཙང་བོའི་ཁ་རུ་གཅིག་པུར་ལུས་ཀྱང་།།
དོན་དམ་ཟེའུ་འབྲུ་རྡོལ་སའི་གླེགས་བམ་ཁུད་ཀྱི།།
སྐྱོ་སྣང་མགུར་ལ་འདྲེན་པའི་རིག་འཛིན་གོང་མའི།།
ཞལ་དང་སོར་མོས་རེག་པའི་བརྩེ་བ་དཀར་པོའི།།
རྗེས་སུ་ཆགས་པའི་འགྲུལ་བ་ང་ཙམ་མ་བྱུང་།།

སྲིད་པའི་ཟམ་ཁར་ལྷུང་བའི་ཡིག་འབྲུ་སྣ་ཚོགས།།
ཡིད་ཀྱི་མཐོང་གར་ཆར་བའི་ཚུལ་དུ་འབབ་ཚེ།།
འཁོར་བའི་གཏིང་ལ་འཐིབས་པའི་ཆོ་འཕྲུལ་དེ་དག།
མདུན་གྱི་རྡོ་དང་བྱེ་མའི་ཐང་ལ་འབྲི་བའི།།
བདག་ནི་མཛེས་པ་སྣ་དགུའི་གྲུ་ལ་ཞུགས་ཤིང་།།
དུས་མཐའི་སྙན་ཚིག་ཟེགས་མ་གོས་སུ་ཀླུབ་པའི།།
དབྱངས་ཅན་ཕྱག་གི་པི་ཝང་དཀར་པོ་ཡིན་ཏེ།།
སྐྱེ་དང་རྒ་བའི་ཆོས་ཉིད་སྒྲོག་པར་མཁས་ཨང་།།

ཞེན་པའི་རྒྱ་མཚོའི་རླབས་ཕྲེང་རྩེ་རུ་ལྡང་བའི།།
འོད་ཀྱི་རྨུ་ཐག་ཡ་གིའི་མཐིལ་ལ་སྣར་ཚེ།།
སེམས་སུ་འཆར་བའི་རྡུལ་ཕྲན་བྱེ་བའི་ཀློང་དུ།།
གཞོགས་དང་དུས་ཀྱི་སྒྱུ་འཕྲུལ་བསྟུད་མར་གྲོལ་བས།།
ཚོགས་དྲུག་སྣང་བ་ལ་ཁའི་སྨུག་པ་ཅི་བཞིན།།
མིག་དང་རྣ་བའི་དཀྱིལ་ལ་ལན་རེར་འདུ་ཞིང་།།
སྐབས་རེར་འདི་དང་གན་ལ་བཞུད་པ་ལྟར་དུ།།
ཕྱོགས་ཀྱི་ལ་ལུང་ཀུན་ལ་གྱེས་ནས་བུད་འགྲོ།།

རྟོག་པ་རང་གར་ཡན་པའི་དུས་ཤིག་ཡོད་ཀྱང་།།
སྨྲེང་བའི་སྤྲིན་པ་ཡལ་བའི་དུས་ཤིག་མེད་འདྲའི།།
ཚོར་བ་རུས་པར་སིམ་པའི་འཇིག་རྟེན་སྟེང་ན།།
ལས་ཀྱི་མུ་ཏིག་ཚོམ་བུ་གཡུལ་དུ་ཟ་བས།།
ཞེ་ཡི་མེ་ལོང་ནག་པོར་ཅིར་ཡང་འཆར་སྒང་།།
ངག་གི་གཏིང་ལ་འཐོར་བའི་ཟློས་གར་དེ་དག།
འཇའ་ཡི་ཕོ་བྲང་དང་པོའི་ཡང་རྩེར་བྱིང་ནས།།
ཤོག་བུའི་ཡ་ཐེམ་ཐོག་ཏུ་རི་མོར་འབེབ་ཡོང་།།

         བླ་རུང་ལྔ་རིག་ནང་བསྟན་སློབ་གྲྭ་རུ་  2015   11   4  མཚན་མོའི་དུས་ཚོད་ 12-2  བར་བརྗོད་བྱ་བློས་བསླངས་བྱས་ཤིང་ 2-4.30  བར་རྗོད་བྱེད་ཚིག་གི་ལམ་ལ་དྲངས་ནས་མཐར་ལེགས་པར་གྲུབ་བོ།།

                           
                             རྟོག་པ་རང་ཡན།

ཟླ་བས་གཞོགས་ཀྱི་སྒེའུ་ཁུང་འགྲིམ་པའི་ཚེ།།
ཁོ་མོས་ཆགས་པའི་བརྡ་ཡིས་རབ་བསྐུལ་ཞིང་།།
ཞལ་གྱི་ཕྱེད་མ་ཙམ་ཞིག་སྣང་བའི་སྐབས།།
མཆུ་ཡི་པད་མོའི་ཟེའུ་འབྲུར་རོལ་སྙམ་པས།།
ལུས་ཀྱི་རྨུ་ཐག་དེ་རུ་བསྐྱངས་ཙ་ན།།
ནམ་མཁར་བཞུར་བའི་སྐྱིན་ཐང་ནག་པོ་ཡིས།།
རས་ཀྱི་མལ་གདན་ཅུང་ཟད་དཀྲུགས་པ་བས།།
བདག་གི་སྙིང་དང་མཆིན་པ་རབ་གཡོས་ནས།།
བརྟུལ་ཞུགས་ཐབས་ཀྱི་ཕྱག་རྒྱ་ཆེན་པོ་དེ།།
ཡོངས་སུ་བརྟེན་པའི་དུས་ལས་ཡོལ་བ་ལ།།
རྗེས་ཆགས་བརྩེ་བས་ཁོ་བོ་འཛིན་མཛད་པའི།།
ལྷ་མོ་རྣམས་ཀྱང་ཕྲག་དོག་སྐྱེས་ནས་སུ།།
མདུན་གྱི་ཅོག་ཙེའི་སྒང་ལ་བཤམས་པ་ཡི།།
ཆང་དཀར་དམ་བུའི་ཀློང་དུ་རབ་འཁྱིལ་བའི།།
བདུད་རྩིའི་རྫིང་བུ་དེ་ག་བསྲུབས་པའི་མཐུས།།
སྨུག་པའི་དཀྱིལ་འཁོར་ས་རུ་ལྷུང་བ་ལས།།
བྱ་དང་བྱེ་འུའི་ཚོགས་དག་ཧད་ནས་སུ།།
གཤོག་པའི་སྟེང་ལའང་སྤྲིན་པ་ཆགས་ཙམ་བྱུང་།།

                  2015 10 15   མཚན་མོར་བྲིས།

                                                                    རྩོམ་སྒྲིག་པ། ལྷ་སྐྱིད།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།