1
ངས་དབྱངས་ཀྱི་གྲུ་ཁེམ་ཐོགས་པའི་ཚེ།།
ཆ་ཡོད་མེད་ཀུན་པོར་ཅོ་འདྲི་བྱེད།།
ངག་བདེ་སྟོང་ནང་ལ་འཁོར་ནས་ཡོང་།།
ཉམས་འུར་ཞིང་སྒྱུ་མའི་གྲོང་ལ་ལྟ།།
སྨད་དར་གྱིས་དཀྲིས་པའི་སྒྲོལ་མ་དང་།།
རྒྱབ་སྤྲིན་པའི་ཡོལ་བ་ཅན་པོ་དང་།།
མགོ་རླུང་གིས་བསྐྱོད་པའི་འཇག་མ་དག།
ཀྱེ་རྨི་ལམ་ཟེར་ནས་ཤོག་ངོར་འབྲི།།

                          2
རོ་ལག་པའི་མཐིལ་ལ་མ་འཇོག་ཨང་།།
ཞེ་འཛུམ་གྱི་གོང་བུར་མ་འཛུལ་རོགས།།
ང་ཟེར་ན་རླུང་ཁའི་མར་མེ་ཡིན།།
ང་ཟེར་ན་རྡོག་མགོའི་ཆུ་ཐིགས་ཡིན།།
ལས་ཨེ་ཡིན་ཅན་པོ་མ་བཤད་དང་།།
མགོ་མིག་ཆུ་ཅན་པོ་མི་སྟོན་རོགས།།
ངའི་དྲན་པ་རི་སུལ་སྨུག་པ་ཡིན།།
འདི་བསྒུལ་ན་ཅི་ཡོང་ཅི་ཤེས་ཨང་།།

                           3
ང་རིག་པའི་གདངས་ལ་སོན་པའི་དུས།།
འབུ་གྲོག་མ་ལྟ་བུའི་ལང་ཚོ་རུ།།
ལྷ་དབྱངས་ཅན་མ་ཡི་ཅོད་པན་འདོགས།།
འགྲིག་མེད་ཀྱང་སྣང་བ་ཨ་སྔོན་ཡིན།།
ལས་དེ་བྱས་དོན་ལ་སྙན་ངག་ཡིན།།
ལས་དེ་བྱས་དོན་ལ་འཆར་ཡན་ཡིན།།
ད་སྨྲ་བསམ་བརྗོད་མེད་མཐར་ཐུག་ཅིག།
འཁྱོངས་མེད་ཀྱང་ཡོད་པའི་ཚུགས་ཀ་འཛིན།།

                            4
ཚེ་འདི་ཕྱིའི་བར་ཐག་མ་རེད་དེ།།
སྡེ་ཆུང་ཆུང་ཞིག་གི་ཕར་ཚུར་རེད།།
ཞེ་སྣང་བ་མཐུན་ས་ཡིན་ན་ཡང་།།
ལས་མེད་ན་བཀོད་པ་མེད་ཀ་ཟེར།།
སེམས་འཁྱག་རུང་ད་ནི་འདི་རེད་མོ།།
ལག་དྲོན་པོ་ཞིག་ཀྱང་མི་ཐུག་ན།།
ང་དྲན་ནས་བསྡད་ཀྱང་ཅི་བྱེད་ཀོ།།
ལམ་གཅིག་ནས་འགྲོ་རྒྱུ་མི་རག་ག།

                            5
སྐྲའི་ལན་བུ་འཕྱིང་གི་ལོས་འཇུག།
ཡིད་སྐྱོ་སྐྱོ་ཅུང་ཙམ་ལོས་གནང་།།
མིག་ཁྲ་ཆུང་མཆིལ་མས་ལོས་གང་།།
དྲན་བཞག་དུས་ཨུ་ཤུ་ལོས་འཐེན།།
ཅི་བཤད་རུང་སྙིང་གི་མི་རེད།།

                      2016    1    3

རྩོམ་སྒྲིག་པ། དབང་མོ།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།