དཀར་མཛེས་ཞེས་པའི་དཀར་ཞིང་མཛེས་པའི་སའི།།
ཁམས་བྱང་མི་རིགས་མཐོ་རིམ་སློབ་འབྲིང་དུ།།
རྒྱུགས་ཤིག་སྤྲད་སར་ཁ་སང་ནས་ཐོན་ཞིང་།།
ང་རྒྱལ་མགོ་བོ་བཏེགས་ཏེ་རྒྱུགས་རར་འཛུལ།།
གཅིན་པ་འཆོར་མདོག་བྱས་ནས་སྒོ་རེར་བུད།།
ཆམ་པ་ན་ཁུལ་བྱས་ནས་སྣབས་རེ་སྤུར།།
བརྗེད་ནས་དྲི་བ་མང་པོ་ཤེས་མ་སོང་།།
གཉིད་ཀྱང་ཡེ་ནས་མི་ཁུག་ལས་ངན་ཨེ།།
སྟོང་ཆ་མང་པོ་མེད་པའི་རྒྱུགས་ཤོག་འདིའི།།
ཐ་ན་ཁ་བྱང་ལ་ཡང་ཡིག་ནོར་གདའ།།
དེང་འདིར་དགེ་རྒན་ཆེན་མོ་ཡིན་མདོག་འགས།།
ནོར་འཆུགས་འདི་འདྲ་བཟོས་པ་ཉུང་ཉུང་མིན།།
སྤང་དང་ལམ་ཁ་དག་ནས་ཅུང་བསྡད་རྗེས།།
ཕྱི་དྲོར་སླར་ཡང་རྒྱུགས་རར་འཛུལ་དགོས་བྱུང་།།
འབྲི་རྒྱུ་མཐའ་དག་ཕྱེད་ཙམ་བྲིས་ཚར་རྗེས།།
མལ་སྔས་ཅོག་ཙེ་བྱས་ནས་ཡུད་ཙམ་གཉིད།།
རྩིབ་ཀྱི་བུ་མོ་ཞིག་གིས་བོས་བྱུང་བས།།
འཚབ་འཚུབ་ཁོ་མོའི་ཕྱོགས་ལ་བལྟས་པ་ན།།
མཛུབ་མོས་རྒྱུགས་ཤོག་མནན་ནས་འདི་སྟོན་ཞེས།།
ཝ་ལེར་ཐོས་མོ་ཞིག་ནི་གསུང་བྱུང་མོད།།
གཞུང་གི་རྒྱུགས་རྟོག་པ་ཡིས་མིག་ཅེར་ནས།།
ཟ་རྒྱུ་ཡིན་པ་འདྲ་བར་བལྟས་ཚོད་ཀྱིས།།
འོན་པ་མི་བཅའ་ཐབས་མེད་ང་སྐྲག་གི།
ཡག་མ་ལྷ་མོ་འདྲ་བོ་ཐུགས་མ་ཁྲོ།།
ར་ལ་ཤ་ས་སོགས་ཀྱང་འབྲི་འདོད་མོད།།
ལོ་སིས（老师）རྒྱུགས་ཤོག་མྱུར་མོར་སྤྲོད་གསུངས་བས།།
གཤམ་གྱི་ཀ་འཕྲེང་འབྲི་མཚམས་འདིར་བཞག་སྟེ།།
བསམ་བློ་ལེགས་པོ་བཏང་ནས་རྒྱུགས་འཕྲོ་བྲིས།།
ཧེ་ཧེ་རྒྱུགས་རར་ནམ་རྒྱུན་རྩོམ་བྲིས་པས།།
ཨ་མ་ཨ་ཞང་སོགས་ཀྱིས་གོ་ན་ཚར།།

        *  ཡ་ཡན་ཆོད་རྒྱུགས་ར་ནས་བྲིས་ཤིང་ར་ནས་ཨ་བར་ཇ་ཁང་ཞིག་ནས་བྲིས།   
                                                   
                                  ༢༠༡༦/༤/༡༦ ཉིན།

རྩོམ་སྒྲིག་པ། དབང་མོ།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།