ལྷ་སའི་ལྕང་མ་ཆུ་རེད།།
ལྕང་མ་ལོག་ན་རྡོ་རེད།།
རྡོ་དང་ཆུ་ལ་བསམ་ན།།
ལྷ་སའི་ལྕང་མ་ཅི་རེད།།
ལྕང་མ་སྔོན་པོ་ཨེ་རེད།།
ལྕང་མ་སྔོན་པོ་མ་རེད།།
ལྕང་མ་གླིང་ཁའི་ནང་ལ།།
སོང་དང་མ་སོང་ཅི་རེད།།
རྐང་སྣེ་གླིང་ལ་བཏེགས་ཀྱང་།།
རྐང་ལྷམ་རྡོ་ལ་རལ་སོང་།།
ང་རང་ལྕང་མ་གླིང་ལ།།
ལས་འཕྲོ་ཟད་པས་མིན་འགྲོ།།

ལྕང་མའི་ཕ་ཤིང་གང་རེད།།
ལྕང་མའི་མ་ཤིང་གང་རེད།།
ལྕང་གླིང་སྤྱིལ་བུ་སྲུང་བའི།།
ཨ་ཕོ་བསམ་གྲུབ་གང་རེད།།
བསམ་གྲུབ་ཡོད་ན་ཆོག་ག།
བསམ་གྲུབ་མེད་ན་ཆོག་ག།
ལྕང་མ་འགྱུར་དང་མ་འགྱུར།།
ལྕང་ཤིང་མདོག་ལ་བལྟས་ཡོད།།

ལྕང་མ་ལྷ་སའི་ལྕང་མ།།
ཡར་ཆབ་ཁ་ན་ཨེ་འདུག།
ཡར་ཆབ་ཁ་ན་མི་འདུག།
ལྕང་མ་ཆུ་ལ་གཡུག་སོང་།།
ལྕང་ཕྲན་རླབས་ཀྱིས་དེད་སོང་།།
ལྕང་མ་གླིང་ཁའི་སྐུ་ཞབས།།
བཞུགས་དང་མ་བཞུགས་ཅི་རེད།།
ཝ་ཡེ་ལྕང་མ་གླིང་ལ།།
བཞུགས་དང་མ་བཞུགས་ཅི་རེད།།

ལྕང་མ་ཡར་བསྐྱེད་ཆུ་རེད།།
ལྕང་མ་མར་བསྐྱེད་ཆར་རེད།།
ཆུ་དང་ཆར་བ་གཉིས་ལ།།
ཟམ་པ་འཛུགས་མཁན་སུ་རེད།།
ཟམ་པ་འཛུགས་མཁན་ང་རེད།།
སྲས་མོ་གཡུ་ཆུང་དྲུག་དཀར།།
ཟམ་པ་བརྒྱུད་ནས་ཕེབས་དང་།།

ལྕང་གླིང་བྱེ་འུ་འཇོལ་མོ།།
ལྕང་མའི་སྐྱིབས་ན་ཨེ་འདུག།
ལྕང་མའི་སྐྱིབས་ན་མི་འདུག།
ལྕང་ཤིང་ཡལ་ག་ལྡེམ་པ།།
སྙན་ཚིག་ཨེ་ཡིན་བསམ་ཞིང་།།
སྙན་ཚིག་མིན་འགྲོ་བསམ་བྱུང་།།

ལྕང་གླིང་མི་ཡིས་གང་ན།།
མཚན་མོ་ཡིན་ཡང་གང་ན།།
ལྕང་མའི་གླིང་གི་སྲས་མོ།།
མཐོང་དང་མ་མཐོང་ཅི་རེད།།
ཝ་ཡེ་གླིང་ཁའི་སྲས་མོ།།
མཐོང་དང་མ་མཐོང་ཅི་རེད།།
སྲས་མོའི་རྒྱབ་གཟུགས་ནང་ལ།།
མེ་ཏོག་དཀར་དམར་མང་ཡང་།།
མེ་ཏོག་འཐུ་བའི་མི་དེ།།
ད་ནངས་ཚེ་ལས་འདས་བཞག།

ཉིན་མོ་མི་ཡིས་མི་མཐོང་།།
ཉིན་མོ་མི་ཡིས་གབ་བཞག།
མཚན་མོ་བཙལ་ཀྱང་མི་དགོས།།
མཚན་མོ་ཁྲོམ་གཞུང་གསལ་འདུག།
དེ་ན་ལྕང་མའི་ལྕུགས་ཕྲན།།
སྲས་མོའི་དབུ་ལྕང་ཨེ་ཡིན།།
སྡེ་བ་གཞུང་གི་རླུང་དེས།།
དབུ་ལྕང་ཡང་ཡང་བསེད་ན།།
སྲས་མོ་སྐྱོ་ལེ་འདུག་གམ།།

ལྕང་མ་སུ་ཡིས་བཅགས་སོང་།།
ལྕང་མ་ཁོང་གིས་བཅགས་སོང་།།
ལྕང་ཤུན་རུག་མཁན་སུ་ཡིན།།
ལྕང་ཤུན་རུག་མཁན་ང་ཡིན།།
ལྕང་གླིང་དྲན་ནས་ཡོང་བའི།།
ལྕང་མའི་སྐྱིབས་ཀྱི་ང་ཡིན།།

སྤྱན་གསལ་ཕོ་བྲང་ནང་གི།
ལྷ་སྐུ་ཡིན་ན་མ་གཏོགས།།
སྦྲང་ནག་སོ་ཡིས་རྨུགས་པས།།
ལྕང་གླིང་བསྐོར་ཐབས་ཨེ་འདུག།
ལྕང་གླིང་བསྐོར་ཐབས་མི་འདུག།
རབ་གསལ་ཁ་ཡི་སྦྲང་ཆུང་།།
འཕུར་ཙམ་འཕུར་ཙམ་གནོངས་དང་།།
ལྕང་མ་གླིང་ཁའི་སྲས་མོར།།
འཕྲིན་ཞིག་ཕུལ་དགོས་ཡོད་དོ།།

ལྕང་མའི་ཤག་ཆུང་ནང་ན།།
དོ་ནུབ་པ་སངས་ཨེ་འདུག།
དོ་ནུབ་པ་སངས་མི་འདུག།
པ་སངས་ཨམ་ཕྲག་ནང་ལ།།
དོ་ནུབ་སེམས་གཞས་བཅུག་ཡོད།།
ལྕང་མའི་ཉི་མ་ཟླ་བ།།
ལྕང་མའི་རྩེ་ནས་ནུབ་སོང་།།
དོ་ནུབ་པ་སངས་གཅིག་པུས།།
ཉི་མ་ཟླ་བ་དྲན་སོང་།།

ལྕང་མ་ཕོ་ལྕང་གང་རེད།།
ལྕང་མ་མོ་ལྕང་གང་རེད།།
དོ་ནུབ་ལྕང་གླིང་གྲུ་བཞིར།།
བྱེ་འུ་མང་པོ་ཨེ་འདུག།
བྱེའུ་མང་པོ་མི་འདུག།
སྣང་རྩེ་ཤག་ནས་ཡོང་བའི།།
བྱེའུ་དེ་ཅག་ཅག་འཕུར་སོང་།།
གཟིམས་ཆུང་ཡོལ་བའི་ངོས་ལ།།
སྤྲིན་པ་སྤར་གང་བསྐྱུར་བ།།
དགའ་ལྡན་ཨ་མགོ་རི་ནས།།
མཁའ་ལ་ལྡང་ཙམ་བྱས་སོང་།།
ད་ནངས་ཀུན་བདེ་གླིང་གི།།
བན་ཆུང་ཞིག་གིས་མཐོང་བཞག།

སྲས་མོ་གསུང་གཞས་སྙན་ལེ།།
ལྕང་བྱེའུ་དེས་ཀྱང་སྙན་ལེ།།
ལྕང་གླིང་ནང་གི་མི་ལ།།
ངལ་གསོ་ཡོང་བ་ལོས་ཡོད།།
ཀུན་བདེ་གླིང་ལ་ཨེ་འགྲོ།
ཀུན་བདེ་གླིང་ལ་མི་འགྲོ།།
སྲས་མོའི་གཟིམས་ཆུང་ནང་གི།
མར་མེ་ཡིན་ན་ཆོག་ག།

སྲས་མོ་གཟིམས་ན་ཨེ་ཡོང་།།
གཟིམས་ལམ་གཏང་ན་ཨེ་ཡོང་།།
གཟིམས་ལམ་ནང་གི་བྱེའུ་ཆུང་།།
མགོ་བོ་གུག་ཙམ་བཟོས་ཤིང་།།
གཤོག་པ་རྐྱོང་ཙམ་བྱས་ཏེ།།
མཁའ་ལ་འཕུར་ཚུལ་ཨེ་བསླབ།།
མཁའ་ལ་འཕུར་ཚུལ་བསླབས་ན།།
ང་ཡང་ལྕང་མ་གླིང་གི།
བྱེའུ་ཞིག་ཡིན་ན་ཆོག་ག།

སྲས་མོའི་སྤྱན་ལ་འཁྲུངས་བའི།།
སྤྱན་གྱི་འཛུམ་ལ་གད་པའི།།
ལྕང་ཤིང་རྩེ་ཡི་མེ་ཏོག།
དཀར་དམར་མང་དུ་བཞད་དེ།།
ལྕང་གླིང་ནང་དུ་ཨེ་ཁྱབ།།
ལྕང་གླིང་ནང་ལ་ཁྱབ་ན།།
ང་ཡང་སྲས་མོའི་སྤྱན་གྱི།།
མེ་ཏོག་ཡིན་ན་ཆོག་ག།

༢༠༡༥ལོའི་ཟླ༣པའི་ཚེས༢༤ཉིན་ང་རང་ལྷ་སར་འབྱོར་ཏེ།  ཏག་ཏག་ཉིན་བཅུའི་རིང་ཉི་མ་ལྷ་སའི་དགོན་གྲོང་དང་གནས་ཆེན་ཁག་ལ་བསྐྱོད།  དེ་དུས་ལྕང་མ་གླིང་ནས་འདི་འདྲ་ཞིག་བྲི་རྒྱུར་བློས་བསླངས་བྱས་མོད།  ཚིག་གྲུབ་དང་བརྗོད་པའི་རྩལ་གྱིས་མ་འདང་བས་ད་བར་ཏུ་ལུས།  ཡ་མཚན་པ་ཞིག་ལ།  དེ་རིང་གློ་བུར་གྱི་རྐྱེན་སྣང་གང་ཞིག་གིས་མགུར་གཞས་འདི་ཡི་གེར་མངོན་པའི་རབ་འདེགས་ཐོབ་བྱུང་།

རྩོམ་སྒྲིག་པ། ལྷ་སྐྱིད།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།