མི་སེམས་རོལ་མོ་དཀྲོལ་བའི།།
སིལ་སིལ་སྒྲ་ཞིག་གྲགས་པ།།
སྒོར་སྒོར་དོང་ཙེའི་བཞིན་རས།།
འཇོ་སྒེག་གང་ཞིག་མིན་ཡང་།།
འཚོ་བ་ཨ་འཁྱིལ་དགུ་འཁྱིལ།།
དྲན་པ་ཡར་འགྱུ་མར་འཁྱུག།
བསླུ་བྲིད་ལྐོག་གི་སྒྱུ་འཕྲུལ།།
སྒལ་བས་ལྕོགས་ས་མ་རེད།།
སྨྲ་སྒོ་མཚོན་གྱི་འཁོར་ལོ།།

ལྕེ་བརྒྱས་འཁྲོལ་བ་ཡོད་ཀྱང་།།
ཁ་རླངས་དུག་མདའ་ཕྲ་མོ།།
ཐུལ་ཐུལ་ཁ་བར་འཐིམ་སོང་།།
ལྷག་བསམ་སེམས་ཀྱིས་བཏེགས་པ།།
ཁ་བཏགས་དཀར་བོ་ཡིན་ཙང་།།
མི་སེམས་སད་དང་སེར་བ།།
འབྲུག་སྒྲ་དང་བཅས་བབས་སོང་།།
གཟུར་མེད་རྦབ་ཆུའི་རླབས་སྒྲ།།
ཤག་ཤག་སྟོབས་ཀྱིས་ལྷུང་བས།།
བྱ་བྱིའུའི་ཅ་ཅོའི་འོ་དོད།།
སུ་དང་གང་གིས་མ་ཚོར།།
ནམ་མཁའ་སྔོན་པོ་འདི་ཡིས།
དྭངས་གཙང་སྤྲིན་དཀར་ཕུལ་མོད།།
གཏིང་དུ་ཀྲུག་ཀྲུག་འགུལ་ཞིང་།།
འབུ་སྲིན་ཞིག་དང་འདྲ་བའི།།
གཟུགས་མེད་ཕྱི་ཡི་ཞགས་པས།།
ཟ་འཕྲུག་དང་བཅས་བསྡམས་སོང་།།

                                        2017.4.24

                           བརྩེ་དུངས་ཀྱི་རྩ་འགྲེལ།

དམ་ཚིག་རྡོ་ལ་བརྐོས་པའི།།
མཛའ་བརྩེའི་དུངས་སེམས་དམར་བོ།།
ལོ་ཟླའི་མིག་ཆུས་བརླན་ཞིང་།།
དུས་ཀྱི་རྡེག་འཚོག་དྲགས་པས།།
གདན་ཐོག་གཅིག་ཏུ་འཛོམས་མོད།།
སེམས་དང་སེམས་པའི་བར་ཐག།
ག་ལེར་ག་ལེར་བཀྱེད་སོང་།།
རྒྱང་རིང་ས་མཐའི་ཉི་མ།།
ལེགས་མཛེས་མེ་ཏོག་གང་དང་།།
མཚམས་སྤྲིན་མདངས་ཀྱིས་མ་ཁུག།
ཁད་ཁད་སྟབས་ཀྱིས་བཞུད་སོང་།།
ང་ཡི་སྙིང་ཐུབ་ལྷ་མོ།།
ང་ཡི་ཆུང་འདྲིས་བྱམས་པ།།
བདག་གི་ཚེ་གཅིག་སྐྱ་ཡ།།
བདག་གི་སེམས་ཀྱི་ཕྱེད་ཀ།
ཡ་ཆུང་ཁོག་ལ་བཅངས་པའི།།
མྱི་རེར་རྟགས་རེ་བརྒྱབ་སྟེ།།
ཁྲ་ཆུང་མིག་ལ་འཁོར་བ།།
ཁོ་མོའི་བཞིན་གྱི་འཛུམ་མདངས།།
ཡིད་ཀྱི་རྒྱ་མཚོ་བསྐྱོམས་པའི།།
དབྱངས་རྟའི་གསེར་གྱི་ལྡེ་མིག།
བཙལ་ཞིང་རྙེད་པས་སྤྲོ་མོད།།
ལྕགས་ཟྭའི་ཨ་ལོང་བཙའ་རོ།།
གསར་བརྗེའི་དར་ཞིག་བསྒྲོན་འདུག།
སེམས་ཀྱི་ཨ་སྔོན་ནམ་མཁའ།།
སྐྱོ་སྐྱོའི་ཁ་ཆར་བུ་ཡུག།
དགོས་དང་མ་དགོས་མི་འདུག།
འདས་པའི་མེ་ལོང་ངོས་ལ།།
ཝ་ལེར་ཝ་ལེར་བྲིས་འདུག།
ཧོར་གྱི་གུར་དཀར་རྒྱལ་བོས།།
སྐྱ་ལོ་སེང་ལྕམ་འབྲུག་མོ།།
གཡོ་དང་ཐབས་ཀྱིས་བསླུས་མོད།།
གེ་སར་རྒྱལ་བོའི་ཐུགས་རྗེས།།
འབྲུག་མོར་མ་གནངས་མེད་སོང་།།
དེས་མཛངས་བློན་ཆེན་མགར་གྱིས།།
རྒྱ་བཟའ་ཀོང་ཇོའི་བཞིན་ལ།།
ལག་པས་མ་རེག་ཟེར་ན།།
དེ་ནི་གཤོབ་ཀྱི་ཕུང་བོ།།
འོན་ཀྱང་སྲོང་བཙན་ཁོང་གིས།།
མིག་གཅིག་བཙུམས་ནས་བརྫུས་འདུག།
སུམ་གཉིས་ས་ཡི་བདག་པོ།།
མི་དབང་ཇིང་གུར་རྒྱལ་བོའི།།
ཕུད་ཀྱི་བཙུན་མོ་དེ་འང་།།
ཟས་ཀྱི་ལྷག་འཕྲོ་ཡིན་རུང་།།
སྔར་བཞིན་དང་བས་བཞེས་ཟིན།།
མེ་ཏོག་ཅེས་པའི་མཛེས་སྡུག།
གངས་ཅན་རྒྱ་མཚོའི་ཡུལ་དུ།།
མིག་སྣའི་ལོངས་སྤྱོད་མ་གཏོགས།
དགའ་བདེ་འཚོ་བའི་འཚོལ་སྙེག།
འབེན་དུ་སློང་བ་མིན་པས།།
རང་རང་འཁོར་བའི་གཏན་ཚིགས།།
སོ་སོས་རུམ་ན་བསམ་བྱུང་།།

                                       2017.4.25

                  　　སྣང་ལ་མ་ངེས་པའི་གཏེར།

ཕ་གིའི་འབྲོག་ཁྱིམ་དག་གིས།།
ལྷས་འདབས་རྟ་ནོར་ལུག་གསུམ།།
རྩྭ་ཆུའི་དྭངས་རྩེར་འདེད་པ།།
རྒྱབ་ལ་རན་པའི་ཉིའུ་ཙེ།།
འཐུང་ལ་རེམ་པའི་ཁ་ཧྥེ།།
དོང་ཙེའི་གྲངས་འབོར་མཚོན་བྱེད།།
ཡོད་ཚད་ཤ་ཁྲག་རུས་ལྤགས།།
མིན་ན་ཕྱུགས་ལ་གཅེས་སམ།།
མིན་ན་རྐང་ཡང་འཇིབ་བམ།།

མ་གིའི་རོང་གྲོང་རྣམས་ཀྱིས།།
ཞིང་ཆེན་གྲོ་ནས་སྲན་གསུམ།།
རྫས་ལུད་གཤེར་གྱིས་སྐྱོང་བ།།
གྲང་ལ་བྱོལ་བའི་མེ་སྒོང་།།
དྲོད་དང་བཅར་བའི་ལྕགས་ཐབ།།
བདེ་སྐྱིད་འཚོ་བའི་བསུང་ཞིམ།།
ཐབས་ཅད་ཨ་ཚ་ཨ་ཚ།།
མིན་ཚེ་ཙད་ལ་འདེ་འམ།།
མིན་ཚེ་ཆར་ལ་སྡང་ངམ།།

འདི་ན་འདུ་འཛོམས་དགའ་སྟོན།།
དེ་རུ་འགྲོ་རོགས་གྲིབ་མ།།
ཀན་ནས་མིང་ཆེན་གླུ་བ།།
གམ་དུ་གྲགས་ཅན་མཁས་པ།།
འདི་ན་ཟང་ཟིང་ལང་ལོང་།།
དེ་རུ་ཁ་ཁུ་སིམ་མེར།།
ཀན་ནས་གནམ་ལྡིང་ས་ལྡིང་།།
གམ་དུ་སྔུར་སྒྲ་ཧུར་ཧུར།།

མཛེས་སྡུག་རོལ་མོའི་སྒྲ་དབྱངས།།
ཁྱེད་ཀྱིས་གསན་པ་ཨེ་བྱུང་།།
ཞིམ་མངར་མཁའ་འགྲོའི་གཟུགས་རིས།།
ཁྱེད་ཀྱིས་མཐོང་བ་ཨེ་བྱུང་།།
འཇམ་གཉེན་འོ་ཞོའི་དྲི་ངད།།
ཁྱེད་ཀྱིས་མྱངས་པ་ཨེ་བྱུང་།།

                             2017.5.1

                           ཧ་ཧའི་དགོད་སྒྲ་དང་དབུགས་རིང་ཧལ་ཧལ།

                                        ------"ལྔ་བཞིའི"སྤྲེལ་ལད་ཅིག་ལ་ཁོང་དགོད་ཤོར་བ།

ཅིག་ཅིག་གི་སྙིང་སྟོབས་མ་གླེང་།།
ཉིག་ཉིག་གི་ཕུགས་འདུན་མ་བཤད།།
ལྕུག་ལྕུག་ལྕུག་འདར་བ་མཐོང་ན།།
ཤར་ར་ར་ཅི་ཙམ་བཟླས་རུང་།།
ཙི་གུ་ཞིག་ལངས་ནས་སྡོད་དཀའ།།

ཆེམ་ཆེམ་གྱི་གློག་འོད་བསྒྲོན་པའི།།
མཐོ་མཐོ་ཡི་སྡིངས་ཆར་འགྲེང་ནས།།
གསོག་གསོབ་ཀྱི་འགྱུར་ཁུགས་ཐོས་ན།།
ཁུ་ཚུར་དེ་ཅི་ལྟར་འཕྱར་ཡང་།།
སྐྱུག་མེར་གྱི་བྲེད་ཤས་དེད་ཡོང་།།

ཤམ་ཤམ་གྱི་གཟབ་མཆོར་སྤྲས་ཤིང་།།
ལྡ་ལྡི་ཡི་དྲ་བ་འཐེན་ནས།།
ཁུ་སིམ་མེར་དྲན་མེད་བརྒྱལ་དུས།།
ཨམ་གཙིགས་དེ་ཅི་ཙམ་བསྡམས་ཀྱང་།།
ལག་རྡུམ་གྱི་དམག་རྒན་དེ་ཁྱོད་རེད།།

ཟ་ཟུར་དང་རྒྱབ་ལོགས་གསེང་ནས།།
ལམ་ལམ་བཞིན་འོད་དུ་འཚེར་ཞིང་།།
ལྷང་ལྷང་ལྷང་རྣ་བར་སིམ་པའི།།
གཉོམ་དུངས་ཀྱི་ཕ་སྐད་མ་ཡིག།
ཐུ་ལུ་ལུ་འོ་ཇར་འདྲེས་ན།།

                            2017.5.4

རྩོམ་སྒྲིག་པ། ལྷ་སྐྱིད།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།