ཆུ་རྡུལ་ཟུངས་ཁྲག་ཟད་པས་རབ་དཀར་བ།།
ཕང་ཕུང་སྤྲིན་པའི་བལ་ལྡན་སྟོང་ཕྲག་ཁྱུ།།
སྔོ་བསང་མཁའ་ལ་བཀྲམས་པའི་དགའ་བ་ཡང་།།
གྲང་རེག་མདུང་མོ་དྲུད་པའི་རླུང་བུས་བཅོམས།།

རིང་ནས་བསྐྱངས་པ་གཤོག་ཐོགས་ལོ་མའི་ཚོགས།།
ལྗོན་པར་མཛའ་བ་ལྷོད་པའི་བརྟུལ་ཞུགས་ནི།།
ཁྲེལ་མེད་བུ་ལོ་ཕ་མར་འདྲོགས་པ་བཞིན།།
གང་སར་འཕུར་བ་སྨྲེང་བ་སྣོན་མའི་རྒྱུ།།

ཡིད་ཀྱི་གསོས་གྱུར་ཁུ་བྱུག་སྙན་པའི་དབྱངས།།
ལྷོ་བཞུད་ཁྲུང་ཁྲུང་བསྟར་བའི་གྲལ་གྱིས་བཅད།།
འཕུར་ལྡིང་གར་གྱིས་མྱོས་པ་བུང་བའི་འཁོར།།
སྤང་ལ་སེར་ཐིག་ལྷུང་བའི་མདའ་ཡིས་རྨས།།

གཡུ་ཞུན་ཐགས་སུ་བཏགས་པའི་ནེའུ་གསིང་ལྟོར།།
སྣ་ཚོགས་མེ་ཏོག་མཛེས་པའི་ཕུན་ཚོགས་ནི།།
སད་ཀྱི་གཟའ་རྒོད་ཁྲོས་པའི་རོ་འཛིན་གར།།
རྣམ་པར་གཡོས་པས་སྐད་ཅིག་ཉམས་པར་བྱས།།

གྲང་རླུང་ཤིག་ཤིག་ལ་ལུང་བར་མེད་དུ།།
རྩྭ་ལོ་ཤོག་ཤོག་འདེད་པའི་ལས་ཀྱིས་བྲེལ།།
ཁ་ཆར་ཤམ་ཤམ་བསྟུད་མར་བྱོ་བ་ཡིས།།
ཆུ་མོ་ཤང་ཤང་འཁུན་པའི་རང་སྒྲ་འབྱིན།།

རི་ཀླུང་རྩྭ་ལྡུམ་རུལ་བའི་དྲི་མ་ལྡང་།།
ནོར་འཛིན་འདམ་གྱིས་རལ་བའི་འཇིགས་ཉམས་ཤར།།
སྙེ་མའི་དབུ་འཕང་བྲལ་བའི་སོག་མའི་ཕོན།།
གང་སར་དངན་པ་འཐེན་པའི་ཤུ་སྒྲ་ཐོར།།

དབྱར་གྱི་དཔལ་མོ་སྐད་ཅིག་ཡལ་བ་ནི།།
མངར་སྐྱུར་སྦྲགས་མའི་འཚོ་བ་སྟོན་པ་བཞིན།།
མི་སྡུག་འཛིན་མའི་བཞིན་རས་གནག་པ་ནི།།
དར་བབ་ལང་ཚོ་རྒ་བར་འཛེག་པའི་ཆོས།།

སྣོད་ཀྱི་བཀོད་པ་ཉིན་བཞིན་རྒུད་གྱུར་བ།།
སྒྱུ་ལུས་གཡར་བོར་སྙུན་གྱིས་རྒོལ་འདྲ་སྟེ།།
རྣམ་ཤེས་སྦྲང་ཆུང་དགུན་གྱི་འོབས་རིང་དུ།།
འབྱིང་པར་འགྱུར་ལ་སེ་གོལ་ཏོག་གི་ཡུན།།

ཡོལ་ཉེའི་ལང་ཚོ་འབྲས་ཀྱིས་རབ་སྟོང་བ།།
གཞོན་དུས་སོན་ལ་ཆུ་ལུད་མ་བརྩོན་པའི།།
འགྱོད་གདུང་རི་བོའི་གདོས་ཀྱིས་མནར་འོག་ནས།།
སང་ལོའི་དཔྱིད་འདེབས་ཕྱི་རབས་བུ་ལ་སྐུལ།།

རྩོམ་སྒྲིག་པ། ལྷ་སྐྱིད།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།