དབྱངས་ཅན་ལྷ་མོར་བསྟོད་པ་ངག་གི་ཟླ་བ་རྒྱས་པའི་རོལ་མོ།
ཕྱོགས་དུས་རྒྱལ་ཀུན་གསང་གསུམ་ཡེ་ཤེས་མཛོད།།
གཅིག་ཏུ་བསྡུས་པ་འཇམ་དཔལ་དོན་གྱི་ལྷའི།།
བྱིན་རླབས་མེ་ཏོག་མནྡ་ར་ཡི་ཆར།།
བསྙིལ་བས་ཁྱེད་ལ་དགེ་ལེགས་ཤིས་པ་བསྩལ།།
དད་གསུམ་ཟླ་བ་ནོར་བུའི་འཁྲི་ཤིང་ལ།།
སྨོན་ལམ་འོ་མས་ཆབ་ཀྱི་ལེགས་བཀྲུས་ཏེ།།
སྒྲིབ་བྲལ་ཡེ་ཤེས་སྤྲིན་དཀར་གཡོ་བའི་སྣེར།།
ལེགས་བཤད་དབྱར་གྱི་དགའ་སྟོན་འབེབ་དུ་རེ།།
རབ་ཏུ་དགའ་བའི་ཡིད་ཀྱི་པད་ཚལ་དུ།།
ལྷུང་ལྷུང་གྲགས་པའི་སྙན་པ་སྟོང་གི་སྒྲས།།
ཨུཏྤལ་མིག་མི་ཟིམ་པའི་ཡེ་ཤེས་ཀྱི།།
སྙིང་ལ་སིམ་པའི་སྤྱོད་པ་དུས་འདིར་སྩོལ།།
ཀུན་ཁྱབ་གདོད་ནས་དག་པའི་ཡེ་ཤེས་ལས།།
རྣམ་རོལ་མཛད་པའི་འཁོར་ལོ་བསྒྱུར་བྱེད་པོའི།།
ཞབས་སེན་མེ་ཏོག་རལ་བའི་ཁུར་བླངས་ཏེ།།
སྙན་ཚིག་གཡས་སུ་འཁྱིལ་བའི་མཆོད་སྤྲིན་འབུལ།།
མྱོས་བྱེད་དགའ་བ་འཆིང་བའི་རི་དྭགས་མཚན།།
སོར་བཅུའི་མེ་ཏོག་སྦུབས་སུ་སྦྲུམ་པ་ལས།།
ངག་ཚིག་རིག་བྱེད་སྒྱུ་མའི་མཚར་སྡུག་གིས།།
སྙིང་ལ་བདེ་བ་སྟེར་བའི་སྤྲོ་དགའ་འཕེལ།།
ངོ་མཚར་ཚིག་སྡེབ་མ་ཀི་ལ་ཡི་སྐྱེས།།
དབྱངས་བདུན་དཔྱིས་སུ་འདྲེན་པའི་སྙན་ངག་མཛོད།།
གང་ཐུག་བློ་བཟང་བློ་ཡི་དཀྱིལ་འཁོར་ནས།།
རིག་བྱེད་གཏམ་གྱི་སྦྲང་ཆར་དབབ་དུ་རེ།།
རྨད་བྱུང་གཏམ་ཚོགས་དཔྱིད་ཀྱི་སྒེག་མོའི་འཕྲིན།།
མི་བཟད་ཀུན་ནས་ཀུན་ཏུ་འབེབ་པ་མོ།།
སྙིང་ལ་རབ་ཞུགས་འདོད་པའི་མེ་ཆེན་རྩེར།།
ངག་གི་སྦྲང་ཆར་བསྩལ་བའི་འཕྲིན་ལས་སྐྱོང་།།
མི་བརྟན་སྙིང་ཁམས་བྲུག་པའི་མཐའ་ཡས་མཚོར།།
བྱིན་རླབས་དུས་ཀྱི་རླབས་ཕྲེང་གཡོ་བ་ཡི།།
གསང་གསུམ་གསང་བའི་ཡུམ་ཆེན་དབྱངས་ཅན་མས།།
གཤིས་ལ་སིམ་པའི་སྙན་པ་དེང་འདིར་སྒྲོགས།།
མཁྱེན་རབ་མཐའ་མེད་ཡངས་པའི་མཚོར།།
མཚན་དཔེའི་ཀུ་མུད་འཛུམ་པ་ཡིས།།
བློ་གྲོས་གསར་བའི་པདྨའི་རྡུལ།།
རྐང་སྐྱེས་དྲུག་པས་ཉམས་སུ་བཞེས།།
མ་སྨད་ཚངས་པའི་རོལ་མོ་ཡི།།
འཇམ་མཉེན་སོར་མོར་ལ་རྩེན་པའི།།
ཆགས་བྲལ་བདེ་སྟོང་ན་དའི་དབྱངས།།
ཁ་འབབ་གཙང་བོའི་རླབས་སྒྲ་བཞིན།།
རིག་བྱེད་ངོས་ཀྱི་སྒྱུ་འཕྲུལ་ལས།།
ཚངས་ཆེན་བཞད་པའི་མེ་ཏོག་སྐྱེས།།
ཡིད་བྱེད་བུ་གར་འདྲེན་པའི་མཐུས།།
སྙིམ་པའི་དགའ་བ་སྩོལ་མེད་སྦྱར།།
ལྷན་སྐྱེས་བདེ་ཆེན་དབུ་མ་ལ།།
གཉིས་སྦྱོར་རྩེད་དགའི་ཐིག་ལེ་བཅུད།།
སྟེམ་མེར་འཁྱིལ་བའི་དྭངས་མའི་མདངས།།
ལོ་བརྒྱར་བསྙལ་བའི་ཡེ་ཤེས་ཆང་།།
བདེ་ཆེན་བདེ་སྟོང་རང་རིག་ཀློང་སྣང་ལས།།
ཆུ་ཁུར་གཞུ་ལྔའི་མདངས་ཀྱི་རི་མོ་འཛུམ།།
སེང་རས་སྲབ་མོ་རླུང་གིས་རྡེག་བྱས་པས།།
ག་བུར་རྡུལ་གྱི་དྲི་མ་རིང་ནས་ཞིམ།།
རྩེ་སྦྱོར་ལག་གི་པད་རྩའི་སོར་ཕྲེང་གིས།།
དམར་ཟངས་རོ་མའི་སྐུད་པ་འབྲད་ཙམ་ལའང་།།
དཀར་འཇམ་འཁྲི་ཤིང་སྨིན་མའི་དྲིལ་ཆུང་སྒྲ།།
མི་ཟད་རྣ་བའི་བཅུད་ལེན་ཆོས་དབྱིངས་མགུར།།
ཐབས་ཆེན་རིག་སྟོང་མི་འཇིགས་གཤིས་ཁམས་སུ།།
ཞོ་གསར་གཟུགས་སྐུའི་ཆུ་ཤེལ་རོལ་སྟབས་ཀྱིས།།
ཆེས་ལེགས་སྟོན་ཀའི་ཉེར་འཚོའི་དཔལ་སྦྱིན་མ།།
བློ་གྲོས་རྩ་ཕུང་གྲོལ་བའི་ཤེས་རབ་སྨན།།
རབ་ཡངས་སྤྱན་གྱི་རྒྱུ་སྐར་ཟེགས་མའི་འོད།།
སྙིང་མུན་ཟ་བའི་རྟ་བདུན་དགྱེས་པའི་འཛུམ།།
ཕྱེད་བཅིང་གནག་སྣུམ་ཟུར་ཕུད་དབུ་ལྕོག་ལ།།
དྲེག་ལྡན་གཟི་འོད་མོག་པའི་ཐོར་ཅོག་ལྡེམ།།
རོ་བརྒྱའི་མྱོས་འཛིན་དཀར་ཟླུམ་བིམ་པའི་མངར།།
མརྒད་གསར་བའི་མདོག་འཛིན་འོ་མའི་མཛོད།།
སྦྲང་རྩིའི་མཆུ་སྒྲོའི་འབིགས་བྱེད་རྣོ་མྱུར་གྱིས།།
གསལ་དག་སྙན་ངག་མཛོད་ཀྱི་འོ་མཚོ་གཞིབ།།
ཐུན་མཚམས་ངལ་གསོའི་རྐང་རྟེན་དུ།།
སྙན་མཛོད་ངག་གི་ཕོ་བྲང་གི།།
སྒོ་གླེགས་ཕྱེ་བའི་མཐོང་ཀ་ནས།།
དབྱངས་བདུན་འགྲོས་ཀྱི་མན་ངག་ལེན།།
རྣམ་མང་ཤེས་བྱའི་སྐྱེད་ཚལ་དུ།།
བློ་གསར་དགའ་བའི་བུ་རམ་ཞུན།།
ཟེའུ་འབྲུ་སྦྲུམ་པའི་གེ་སར་གཞུང་།།
ཨ་མྲའི་འབྲས་བཞིན་ཕྱི་ནང་སྨིན།།
ལེགས་བཤད་ཚིག་གི་ཆུ་གཏེར་སྟོང་།།
ཤེས་རབ་མགྲིན་པར་བསྐྱིལ་པ་ཡིས།།
རྗེས་ཆགས་རྡོ་རྗེ་རྣོན་པོ་ཡི།།
རྟོག་གེའི་ཀླད་པ་འགེམ་པར་བྱས།།
ཡལ་འདབ་ལྗོན་བཟང་ལོ་མའི་དྲ་ཕྱེད་ཚལ།།
གཡུ་ཡི་མཎྜལ་སྤུངས་པའི་མཚོ་སྟེམས་སུ།།
ལྷུན་པའི་རི་ལ་ཆུ་ཁུར་འཁོར་བ་ལྟའི།།
དབྱངས་ཅན་ངག་གི་རོ་འཛིན་ཡིད་འཕྲོག་མ།།
གཡུ་ཞུན་བཻཌཱུརྱ་སྔོན་པོོའི་སྤང་ཐང་དུ།།
འོད་འབར་གསེར་གྱི་རྣ་ཆ་ཁྲོལ་བའི་སྒྲས།།
དྲི་མེད་ན་སྤང་མཚོ་རྫིང་ག་ལ་བར།།
རྐང་ཆགས་བྱོལ་སོང་དག་ཀྱང་བགས་ཀྱིས་རྒྱུ།།
སྒྲ་ཚད་སྲབ་འཇམ་ཡངས་པའི་དར་རིས་ལ།།
སྡེབ་སྦྱོར་ངག་གི་སྐྱེས་བཟང་གསེར་སྐ་བཅིངས།།
རིག་བྱེད་གཙུག་ན་འོད་འཛིན་ཟླ་ཟེར་གྱིས།།
མཁས་རྒུའི་དྲེགས་པའི་ང་རྒྱལ་ས་རུ་བསྣུར།།
ཧ་རའི་ཙན་དན་ལྗོན་པའི་འཁྲི་ཤིང་གི།།
ཨ་དོན་རིག་སྟོང་འོད་གསལ་ཁམ་བུའི་འབྲས།།
མ་རྙིང་སྒྱུ་འཕྲུལ་རྒྱན་གྱི་མཚོན་ཐབས་ཀྱིས།།
ཚངས་པའི་རིག་བྱེད་ཐིག་ལེའི་བཅུད་དམ་སྩོལ།།
མ་སྨད་རིང་ནས་བསོད་ནམས་རྫིང་རིང་གི།།
སྦྱངས་སྟོབས་སད་པའི་དགེ་ཚོགས་པད་དཀར་ལ།།
རིག་བྱེད་སྐྱེས་ཚོམས་ཟེ་འབྲུ་གསར་པའི་དཔུང་།།
མཆོང་མེན་ཡོལ་གོར་གསེར་ཕྱེའི་རི་ལྟར་སྤུངས།།
སྒེག་བཞད་མཉེན་ལྕུགས་སོར་མོའི་འཕྲུལ་རྩེ་ལས།།
འཐབ་རྩོད་མི་འདོད་ཞི་བའི་དབྱངས་ཅན་སྒྲ།།
ཆེ་དགུའི་སྙན་དབང་འཕྲོག་པའི་རྫ་ཆུའི་རྒྱུན།།
མངོན་བྱས་དྲི་ཟའི་རྒྱལ་མོ་ཟླ་བའི་མ།།
ལི་ཁྲིའི་མདངས་ལ་མ་བྱུགས་སྤོས་ཤིང་གི།།
བསུང་ཞིམ་ག་བུར་སོ་མའི་ངད་དུད་ཀྱིས།།
སྨྲ་བའི་འབབ་སྟེགས་ངག་ཐུན་མ་ཎི་ཀར།།
སྡེབ་སྦྱོར་ག་བུར་སིལ་མས་ལན་དུ་བསྐུས།།
སྲིད་འདས་ཆེ་ལས་ཆེ་རྒྱལ་མཁྱེན་རབ་མ།།
གཏེར་དང་དགོས་འདོད་ནོར་བུ་མ་རྨོའི་འབྲས།།
འདོད་འཇོའི་བ་མཆོག་བདུད་རྩིའི་སྤྲིན་ཆེན་ཏེ།།
མཆོག་སྦྱིན་དགའ་བ་ལྷ་མོར་རིང་ནས་གུས།།
བདག་ཡིད་དུག་གསུམ་ཆང་གིས་རབ་དྲེགས་པ།།
མི་བསྲིན་གཉིས་འཐུང་མྱོས་འདྲའི་མ་རུང་སེམས།།
སླར་ཡང་གང་གི་འཕྲིན་ལས་ལྕགས་ཀྱུ་ཡིས།།
སྙིང་མ་རིང་ལ་འདུལ་བའི་དབང་སྡུད་མཛོད།།
མདོར་ན་རྗེས་ཆགས་ཡིད་ལ་རེ་དཔལ་གྱི།།
ཕན་བདེའི་དགེ་ལེགས་འཇོ་བའི་སྦྲང་ཆར་གྱི།།
རེ་སྐོང་བསྔལ་བའི་གདུང་སེལ་རབ་དགའི་མཛོད།།
རིང་ནས་མ་ཐོག་བརྩེ་བའི་མཆོག་ཐུན་སྩོལ།།
ཁྱད་པར་ཟུང་འཇུག་འོད་གསལ་སྙིང་པོ་ཡི།།
ཟབ་དོན་གྲུབ་པའི་རྟེན་འབྲེལ་རོལ་རྩེད་ལས།།
མཁའ་སྤྱོད་དབུ་མའི་གྲོང་ཁྱེར་ཉམས་དགའ་བར།།
བདེ་ཆེན་ལྷན་སྐྱེས་ཆོས་སྐུའི་སྐུར་གྱུར་ཅིག །
ཞེས་མཚན་བཟང་སོ་གཉིས་ཀྱི་གྲངས་ལྡན་འདི་ནི་ལྔ་རིག་ཤེས་བྱའི་རྒྱལ་ས། མདོ་སྨད་གསེར་མོ་ལྗོངས་ནས་སྙན་གཞུང་པདྨ་དཀར་པོ་ལ་མི་ཕྱེད་དགའ་བ་ཐོབ་པའི་དམན་ལམ་པ་འོད་གསལ་སྙིང་པོའམ། མིང་གཞན་ལ་རོལ་སྐུད་དུ་འབོད་པས་སྦྱར་བའོ།།
རྩོམ་སྒྲིག་པ། དབང་མོ།
གཅིག་ཏུ་བསྡུས་པ་འཇམ་དཔལ་དོན་གྱི་ལྷའི།།
བྱིན་རླབས་མེ་ཏོག་མནྡ་ར་ཡི་ཆར།།
བསྙིལ་བས་ཁྱེད་ལ་དགེ་ལེགས་ཤིས་པ་བསྩལ།།
དད་གསུམ་ཟླ་བ་ནོར་བུའི་འཁྲི་ཤིང་ལ།།
སྨོན་ལམ་འོ་མས་ཆབ་ཀྱི་ལེགས་བཀྲུས་ཏེ།།
སྒྲིབ་བྲལ་ཡེ་ཤེས་སྤྲིན་དཀར་གཡོ་བའི་སྣེར།།
ལེགས་བཤད་དབྱར་གྱི་དགའ་སྟོན་འབེབ་དུ་རེ།།
རབ་ཏུ་དགའ་བའི་ཡིད་ཀྱི་པད་ཚལ་དུ།།
ལྷུང་ལྷུང་གྲགས་པའི་སྙན་པ་སྟོང་གི་སྒྲས།།
ཨུཏྤལ་མིག་མི་ཟིམ་པའི་ཡེ་ཤེས་ཀྱི།།
སྙིང་ལ་སིམ་པའི་སྤྱོད་པ་དུས་འདིར་སྩོལ།།
ཀུན་ཁྱབ་གདོད་ནས་དག་པའི་ཡེ་ཤེས་ལས།།
རྣམ་རོལ་མཛད་པའི་འཁོར་ལོ་བསྒྱུར་བྱེད་པོའི།།
ཞབས་སེན་མེ་ཏོག་རལ་བའི་ཁུར་བླངས་ཏེ།།
སྙན་ཚིག་གཡས་སུ་འཁྱིལ་བའི་མཆོད་སྤྲིན་འབུལ།།
མྱོས་བྱེད་དགའ་བ་འཆིང་བའི་རི་དྭགས་མཚན།།
སོར་བཅུའི་མེ་ཏོག་སྦུབས་སུ་སྦྲུམ་པ་ལས།།
ངག་ཚིག་རིག་བྱེད་སྒྱུ་མའི་མཚར་སྡུག་གིས།།
སྙིང་ལ་བདེ་བ་སྟེར་བའི་སྤྲོ་དགའ་འཕེལ།།
ངོ་མཚར་ཚིག་སྡེབ་མ་ཀི་ལ་ཡི་སྐྱེས།།
དབྱངས་བདུན་དཔྱིས་སུ་འདྲེན་པའི་སྙན་ངག་མཛོད།།
གང་ཐུག་བློ་བཟང་བློ་ཡི་དཀྱིལ་འཁོར་ནས།།
རིག་བྱེད་གཏམ་གྱི་སྦྲང་ཆར་དབབ་དུ་རེ།།
རྨད་བྱུང་གཏམ་ཚོགས་དཔྱིད་ཀྱི་སྒེག་མོའི་འཕྲིན།།
མི་བཟད་ཀུན་ནས་ཀུན་ཏུ་འབེབ་པ་མོ།།
སྙིང་ལ་རབ་ཞུགས་འདོད་པའི་མེ་ཆེན་རྩེར།།
ངག་གི་སྦྲང་ཆར་བསྩལ་བའི་འཕྲིན་ལས་སྐྱོང་།།
མི་བརྟན་སྙིང་ཁམས་བྲུག་པའི་མཐའ་ཡས་མཚོར།།
བྱིན་རླབས་དུས་ཀྱི་རླབས་ཕྲེང་གཡོ་བ་ཡི།།
གསང་གསུམ་གསང་བའི་ཡུམ་ཆེན་དབྱངས་ཅན་མས།།
གཤིས་ལ་སིམ་པའི་སྙན་པ་དེང་འདིར་སྒྲོགས།།
མཁྱེན་རབ་མཐའ་མེད་ཡངས་པའི་མཚོར།།
མཚན་དཔེའི་ཀུ་མུད་འཛུམ་པ་ཡིས།།
བློ་གྲོས་གསར་བའི་པདྨའི་རྡུལ།།
རྐང་སྐྱེས་དྲུག་པས་ཉམས་སུ་བཞེས།།
མ་སྨད་ཚངས་པའི་རོལ་མོ་ཡི།།
འཇམ་མཉེན་སོར་མོར་ལ་རྩེན་པའི།།
ཆགས་བྲལ་བདེ་སྟོང་ན་དའི་དབྱངས།།
ཁ་འབབ་གཙང་བོའི་རླབས་སྒྲ་བཞིན།།
རིག་བྱེད་ངོས་ཀྱི་སྒྱུ་འཕྲུལ་ལས།།
ཚངས་ཆེན་བཞད་པའི་མེ་ཏོག་སྐྱེས།།
ཡིད་བྱེད་བུ་གར་འདྲེན་པའི་མཐུས།།
སྙིམ་པའི་དགའ་བ་སྩོལ་མེད་སྦྱར།།
ལྷན་སྐྱེས་བདེ་ཆེན་དབུ་མ་ལ།།
གཉིས་སྦྱོར་རྩེད་དགའི་ཐིག་ལེ་བཅུད།།
སྟེམ་མེར་འཁྱིལ་བའི་དྭངས་མའི་མདངས།།
ལོ་བརྒྱར་བསྙལ་བའི་ཡེ་ཤེས་ཆང་།།
བདེ་ཆེན་བདེ་སྟོང་རང་རིག་ཀློང་སྣང་ལས།།
ཆུ་ཁུར་གཞུ་ལྔའི་མདངས་ཀྱི་རི་མོ་འཛུམ།།
སེང་རས་སྲབ་མོ་རླུང་གིས་རྡེག་བྱས་པས།།
ག་བུར་རྡུལ་གྱི་དྲི་མ་རིང་ནས་ཞིམ།།
རྩེ་སྦྱོར་ལག་གི་པད་རྩའི་སོར་ཕྲེང་གིས།།
དམར་ཟངས་རོ་མའི་སྐུད་པ་འབྲད་ཙམ་ལའང་།།
དཀར་འཇམ་འཁྲི་ཤིང་སྨིན་མའི་དྲིལ་ཆུང་སྒྲ།།
མི་ཟད་རྣ་བའི་བཅུད་ལེན་ཆོས་དབྱིངས་མགུར།།
ཐབས་ཆེན་རིག་སྟོང་མི་འཇིགས་གཤིས་ཁམས་སུ།།
ཞོ་གསར་གཟུགས་སྐུའི་ཆུ་ཤེལ་རོལ་སྟབས་ཀྱིས།།
ཆེས་ལེགས་སྟོན་ཀའི་ཉེར་འཚོའི་དཔལ་སྦྱིན་མ།།
བློ་གྲོས་རྩ་ཕུང་གྲོལ་བའི་ཤེས་རབ་སྨན།།
རབ་ཡངས་སྤྱན་གྱི་རྒྱུ་སྐར་ཟེགས་མའི་འོད།།
སྙིང་མུན་ཟ་བའི་རྟ་བདུན་དགྱེས་པའི་འཛུམ།།
ཕྱེད་བཅིང་གནག་སྣུམ་ཟུར་ཕུད་དབུ་ལྕོག་ལ།།
དྲེག་ལྡན་གཟི་འོད་མོག་པའི་ཐོར་ཅོག་ལྡེམ།།
རོ་བརྒྱའི་མྱོས་འཛིན་དཀར་ཟླུམ་བིམ་པའི་མངར།།
མརྒད་གསར་བའི་མདོག་འཛིན་འོ་མའི་མཛོད།།
སྦྲང་རྩིའི་མཆུ་སྒྲོའི་འབིགས་བྱེད་རྣོ་མྱུར་གྱིས།།
གསལ་དག་སྙན་ངག་མཛོད་ཀྱི་འོ་མཚོ་གཞིབ།།
ཐུན་མཚམས་ངལ་གསོའི་རྐང་རྟེན་དུ།།
སྙན་མཛོད་ངག་གི་ཕོ་བྲང་གི།།
སྒོ་གླེགས་ཕྱེ་བའི་མཐོང་ཀ་ནས།།
དབྱངས་བདུན་འགྲོས་ཀྱི་མན་ངག་ལེན།།
རྣམ་མང་ཤེས་བྱའི་སྐྱེད་ཚལ་དུ།།
བློ་གསར་དགའ་བའི་བུ་རམ་ཞུན།།
ཟེའུ་འབྲུ་སྦྲུམ་པའི་གེ་སར་གཞུང་།།
ཨ་མྲའི་འབྲས་བཞིན་ཕྱི་ནང་སྨིན།།
ལེགས་བཤད་ཚིག་གི་ཆུ་གཏེར་སྟོང་།།
ཤེས་རབ་མགྲིན་པར་བསྐྱིལ་པ་ཡིས།།
རྗེས་ཆགས་རྡོ་རྗེ་རྣོན་པོ་ཡི།།
རྟོག་གེའི་ཀླད་པ་འགེམ་པར་བྱས།།
ཡལ་འདབ་ལྗོན་བཟང་ལོ་མའི་དྲ་ཕྱེད་ཚལ།།
གཡུ་ཡི་མཎྜལ་སྤུངས་པའི་མཚོ་སྟེམས་སུ།།
ལྷུན་པའི་རི་ལ་ཆུ་ཁུར་འཁོར་བ་ལྟའི།།
དབྱངས་ཅན་ངག་གི་རོ་འཛིན་ཡིད་འཕྲོག་མ།།
གཡུ་ཞུན་བཻཌཱུརྱ་སྔོན་པོོའི་སྤང་ཐང་དུ།།
འོད་འབར་གསེར་གྱི་རྣ་ཆ་ཁྲོལ་བའི་སྒྲས།།
དྲི་མེད་ན་སྤང་མཚོ་རྫིང་ག་ལ་བར།།
རྐང་ཆགས་བྱོལ་སོང་དག་ཀྱང་བགས་ཀྱིས་རྒྱུ།།
སྒྲ་ཚད་སྲབ་འཇམ་ཡངས་པའི་དར་རིས་ལ།།
སྡེབ་སྦྱོར་ངག་གི་སྐྱེས་བཟང་གསེར་སྐ་བཅིངས།།
རིག་བྱེད་གཙུག་ན་འོད་འཛིན་ཟླ་ཟེར་གྱིས།།
མཁས་རྒུའི་དྲེགས་པའི་ང་རྒྱལ་ས་རུ་བསྣུར།།
ཧ་རའི་ཙན་དན་ལྗོན་པའི་འཁྲི་ཤིང་གི།།
ཨ་དོན་རིག་སྟོང་འོད་གསལ་ཁམ་བུའི་འབྲས།།
མ་རྙིང་སྒྱུ་འཕྲུལ་རྒྱན་གྱི་མཚོན་ཐབས་ཀྱིས།།
ཚངས་པའི་རིག་བྱེད་ཐིག་ལེའི་བཅུད་དམ་སྩོལ།།
མ་སྨད་རིང་ནས་བསོད་ནམས་རྫིང་རིང་གི།།
སྦྱངས་སྟོབས་སད་པའི་དགེ་ཚོགས་པད་དཀར་ལ།།
རིག་བྱེད་སྐྱེས་ཚོམས་ཟེ་འབྲུ་གསར་པའི་དཔུང་།།
མཆོང་མེན་ཡོལ་གོར་གསེར་ཕྱེའི་རི་ལྟར་སྤུངས།།
སྒེག་བཞད་མཉེན་ལྕུགས་སོར་མོའི་འཕྲུལ་རྩེ་ལས།།
འཐབ་རྩོད་མི་འདོད་ཞི་བའི་དབྱངས་ཅན་སྒྲ།།
ཆེ་དགུའི་སྙན་དབང་འཕྲོག་པའི་རྫ་ཆུའི་རྒྱུན།།
མངོན་བྱས་དྲི་ཟའི་རྒྱལ་མོ་ཟླ་བའི་མ།།
ལི་ཁྲིའི་མདངས་ལ་མ་བྱུགས་སྤོས་ཤིང་གི།།
བསུང་ཞིམ་ག་བུར་སོ་མའི་ངད་དུད་ཀྱིས།།
སྨྲ་བའི་འབབ་སྟེགས་ངག་ཐུན་མ་ཎི་ཀར།།
སྡེབ་སྦྱོར་ག་བུར་སིལ་མས་ལན་དུ་བསྐུས།།
སྲིད་འདས་ཆེ་ལས་ཆེ་རྒྱལ་མཁྱེན་རབ་མ།།
གཏེར་དང་དགོས་འདོད་ནོར་བུ་མ་རྨོའི་འབྲས།།
འདོད་འཇོའི་བ་མཆོག་བདུད་རྩིའི་སྤྲིན་ཆེན་ཏེ།།
མཆོག་སྦྱིན་དགའ་བ་ལྷ་མོར་རིང་ནས་གུས།།
བདག་ཡིད་དུག་གསུམ་ཆང་གིས་རབ་དྲེགས་པ།།
མི་བསྲིན་གཉིས་འཐུང་མྱོས་འདྲའི་མ་རུང་སེམས།།
སླར་ཡང་གང་གི་འཕྲིན་ལས་ལྕགས་ཀྱུ་ཡིས།།
སྙིང་མ་རིང་ལ་འདུལ་བའི་དབང་སྡུད་མཛོད།།
མདོར་ན་རྗེས་ཆགས་ཡིད་ལ་རེ་དཔལ་གྱི།།
ཕན་བདེའི་དགེ་ལེགས་འཇོ་བའི་སྦྲང་ཆར་གྱི།།
རེ་སྐོང་བསྔལ་བའི་གདུང་སེལ་རབ་དགའི་མཛོད།།
རིང་ནས་མ་ཐོག་བརྩེ་བའི་མཆོག་ཐུན་སྩོལ།།
ཁྱད་པར་ཟུང་འཇུག་འོད་གསལ་སྙིང་པོ་ཡི།།
ཟབ་དོན་གྲུབ་པའི་རྟེན་འབྲེལ་རོལ་རྩེད་ལས།།
མཁའ་སྤྱོད་དབུ་མའི་གྲོང་ཁྱེར་ཉམས་དགའ་བར།།
བདེ་ཆེན་ལྷན་སྐྱེས་ཆོས་སྐུའི་སྐུར་གྱུར་ཅིག །
ཞེས་མཚན་བཟང་སོ་གཉིས་ཀྱི་གྲངས་ལྡན་འདི་ནི་ལྔ་རིག་ཤེས་བྱའི་རྒྱལ་ས། མདོ་སྨད་གསེར་མོ་ལྗོངས་ནས་སྙན་གཞུང་པདྨ་དཀར་པོ་ལ་མི་ཕྱེད་དགའ་བ་ཐོབ་པའི་དམན་ལམ་པ་འོད་གསལ་སྙིང་པོའམ། མིང་གཞན་ལ་རོལ་སྐུད་དུ་འབོད་པས་སྦྱར་བའོ།།
རྩོམ་སྒྲིག་པ། དབང་མོ།
རྩོམ་ཁུངས། ངེད་དྲ་བ།