བཤེར་འཚོལ།
དུས་མཐའི་གླུ་ངག
སྨུག་པའི་རི་ནས་རྡུལ་གྱི་ཤྭ་འོད་བརྡོལ།།
ཉི་མའི་ཁྱིམ་ནས་ཙད་པའི་མེ་སྟག་མཆེད།།
ནགས་མའི་ཀློང་ནས་དབུགས་ཀྱི་ཆ་ལང་རྡེབ།།
ཐང་ཆེན་ནད་པ་ཁྲོས་པས་ཟེ་བ་གཡུག།
ལྷ་ས་སྙུན་ལ་བླ་བྲང་བསྙུངས་པ་ཡིས།།
དག་ཞིང་དག་ཀྱང་མ་དག་མིག་ལ་གཙེས།།
ཡུལ་ཤུལ་བྲེད་ཅིང་ཟི་ལིང་ཞོད་དྲུད་པས།།
བདེ་བའི་གྲོང་དག་བདེ་བར་མ་གྱུར་ཏོ།།
ཆུ་མོ་མ་བོས་རི་ཆུ་སྒང་ནས་ཤོར།།
ཉི་མ་མ་གླེང་ཚ་ཟེར་རི་ནས་འབར།།
ས་འཛིན་མ་སྐུལ་དྲག་ཤུལ་གཏིང་ནས་ལྡང་།།
དུས་ངན་བརྗོད་དམ་སྐྱེ་འགྲོའི་བཅས་པ་ཟེར།།
མི་རྟག་མ་དྲན་དྲན་ནི་མི་རྟག་པ།།
རྟག་པར་མ་བཟུང་བཟུང་འཛིན་རྟག་མེད་པ།།
རྟེན་འབྱུང་བསླུ་མེད་བྱུར་གྱི་སྣ་ཐིག་ནི།།
འདོད་ལྡན་མི་ཡི་འདོད་པས་མ་བཏང་ངོ་།།
ལོ་ལ་ལོ་སྐེག་ཟླ་ལ་ཟླ་ཀག་ཅེས།།
སྲིད་ནི་སྲིད་ཅིང་བར་ཆད་བསལ་བ་ཡོད།།
ལོ་གསུམ་དུག་ལ་ཁ་སྣོན་མོད་པ་ནི།།
ཟླུམ་པོ་གོ་ལའི་ཕས་རྒོལ་མིན་ནམ་ཅི།།
ལྷ་ཀླུ་གཉན་ལ་ཕོག་ཐུག་མི་བཟོ་བ།།
བརྒྱད་ལྡན་ཆུ་བོར་བརྐོ་སློག་མི་བཅའ་བ།།
སྤང་ལ་མེ་དང་ཁྱི་རར་མི་འདུར་བ།།
རྨོངས་དད་རེད་དམ་དུས་མྱི་རྨོངས་བར་ཟད།།
གཉུག་མའི་གཤིས་ནི་དབང་གི་ལག་པས་བཙུར།།
གསོང་བའི་ཚིག་ནི་དངུལ་གྱི་རྐང་པས་བསྒྱུར།།
ཟོལ་གྱི་བརྫུ་དག་མཆོད་ཁྲིར་བཤམས་པ་ཡིས།།
ཉེས་པའི་དུག་རླུང་ཡངས་པའི་འཛིན་མར་གཡོས།།
བྱམས་པའི་སེམས་ནི་དྲིན་གཟོའི་རེ་བས་མིན།།
མ་སྐུལ་དང་བླངས་སྙིང་རྗེའི་རླུང་བུས་ཏེ།།
དེང་སང་ཡོད་ཚད་རྒྱབ་རས་ཤིག་གིས་བརླག།
འགྲོའམ་འདུག་གམ་གཞུངས་དྲང་མི་བུ་འཁྲུལ།།
སྨྱོན་པའི་གར་ལ་མཆོག་གི་སྨོན་པ་ཤོར།།
ལེགས་བྱས་ལག་པ་ཕུ་དུང་ནང་ནས་རུལ།།
སྲིད་ཀྱི་ཁྲི་ལ་སྤྲེའུའི་མཆོང་རྩལ་ངོམས།།
རིགས་ཀྱི་བུ་ལ་མ་ཉེས་འགྲམ་ལྕག་གཞུ།།
སྙིགས་མ་ལྔ་ཡི་གྲངས་འདྲེན་མི་རྟོག་མོད།།
སྙིགས་དུས་འདི་ལ་ལྔ་ལས་ཤིན་ཏུ་འདས།།
ས་ཡོམ་ནད་ཡམས་དམག་འཁྲུག་མུ་གེའི་ཚོགས།།
རིང་མིན་མིག་གི་བྱེད་པོར་ཡང་ཡང་རྩེན།།
སྐྱབས་དང་རེ་ས་གསོན་པོའི་མི་ལ་བྱས།།
མི་བུ་ཁྲ་ཁྲས་ཤི་བོའི་ལས་དག་བྱས།།
རང་མགོན་རང་ཞེས་ཀུ་ཅོ་སྒྲོགས་དང་ཀྱེ།།
དུས་མཐའི་ངག་ནི་མཆི་མའི་ནང་དུ་ལུད།།
དུག་གསུམ་རི་ཤོར་རང་གིས་མ་བཏུལ་ན།།
ཁམས་གསུམ་འགྲོ་བ་གཡུལ་གྱིས་ཁ་བཏགས་ནས།།
གླུ་ངག་སྐྱོ་བོ་ཞིག་ཀྱང་མ་འཁྱོངས་བར།།
གོ་ལའི་འཇིགས་རྔམ་ཁྲོད་ནས་ཚར་རེ་སྐན།།
༢༠༢༢.༨.༡༨ཉིན།
རྩོམ་སྒྲིག་པ། གངས་དགའ།
ཉི་མའི་ཁྱིམ་ནས་ཙད་པའི་མེ་སྟག་མཆེད།།
ནགས་མའི་ཀློང་ནས་དབུགས་ཀྱི་ཆ་ལང་རྡེབ།།
ཐང་ཆེན་ནད་པ་ཁྲོས་པས་ཟེ་བ་གཡུག།
ལྷ་ས་སྙུན་ལ་བླ་བྲང་བསྙུངས་པ་ཡིས།།
དག་ཞིང་དག་ཀྱང་མ་དག་མིག་ལ་གཙེས།།
ཡུལ་ཤུལ་བྲེད་ཅིང་ཟི་ལིང་ཞོད་དྲུད་པས།།
བདེ་བའི་གྲོང་དག་བདེ་བར་མ་གྱུར་ཏོ།།
ཆུ་མོ་མ་བོས་རི་ཆུ་སྒང་ནས་ཤོར།།
ཉི་མ་མ་གླེང་ཚ་ཟེར་རི་ནས་འབར།།
ས་འཛིན་མ་སྐུལ་དྲག་ཤུལ་གཏིང་ནས་ལྡང་།།
དུས་ངན་བརྗོད་དམ་སྐྱེ་འགྲོའི་བཅས་པ་ཟེར།།
མི་རྟག་མ་དྲན་དྲན་ནི་མི་རྟག་པ།།
རྟག་པར་མ་བཟུང་བཟུང་འཛིན་རྟག་མེད་པ།།
རྟེན་འབྱུང་བསླུ་མེད་བྱུར་གྱི་སྣ་ཐིག་ནི།།
འདོད་ལྡན་མི་ཡི་འདོད་པས་མ་བཏང་ངོ་།།
ལོ་ལ་ལོ་སྐེག་ཟླ་ལ་ཟླ་ཀག་ཅེས།།
སྲིད་ནི་སྲིད་ཅིང་བར་ཆད་བསལ་བ་ཡོད།།
ལོ་གསུམ་དུག་ལ་ཁ་སྣོན་མོད་པ་ནི།།
ཟླུམ་པོ་གོ་ལའི་ཕས་རྒོལ་མིན་ནམ་ཅི།།
ལྷ་ཀླུ་གཉན་ལ་ཕོག་ཐུག་མི་བཟོ་བ།།
བརྒྱད་ལྡན་ཆུ་བོར་བརྐོ་སློག་མི་བཅའ་བ།།
སྤང་ལ་མེ་དང་ཁྱི་རར་མི་འདུར་བ།།
རྨོངས་དད་རེད་དམ་དུས་མྱི་རྨོངས་བར་ཟད།།
གཉུག་མའི་གཤིས་ནི་དབང་གི་ལག་པས་བཙུར།།
གསོང་བའི་ཚིག་ནི་དངུལ་གྱི་རྐང་པས་བསྒྱུར།།
ཟོལ་གྱི་བརྫུ་དག་མཆོད་ཁྲིར་བཤམས་པ་ཡིས།།
ཉེས་པའི་དུག་རླུང་ཡངས་པའི་འཛིན་མར་གཡོས།།
བྱམས་པའི་སེམས་ནི་དྲིན་གཟོའི་རེ་བས་མིན།།
མ་སྐུལ་དང་བླངས་སྙིང་རྗེའི་རླུང་བུས་ཏེ།།
དེང་སང་ཡོད་ཚད་རྒྱབ་རས་ཤིག་གིས་བརླག།
འགྲོའམ་འདུག་གམ་གཞུངས་དྲང་མི་བུ་འཁྲུལ།།
སྨྱོན་པའི་གར་ལ་མཆོག་གི་སྨོན་པ་ཤོར།།
ལེགས་བྱས་ལག་པ་ཕུ་དུང་ནང་ནས་རུལ།།
སྲིད་ཀྱི་ཁྲི་ལ་སྤྲེའུའི་མཆོང་རྩལ་ངོམས།།
རིགས་ཀྱི་བུ་ལ་མ་ཉེས་འགྲམ་ལྕག་གཞུ།།
སྙིགས་མ་ལྔ་ཡི་གྲངས་འདྲེན་མི་རྟོག་མོད།།
སྙིགས་དུས་འདི་ལ་ལྔ་ལས་ཤིན་ཏུ་འདས།།
ས་ཡོམ་ནད་ཡམས་དམག་འཁྲུག་མུ་གེའི་ཚོགས།།
རིང་མིན་མིག་གི་བྱེད་པོར་ཡང་ཡང་རྩེན།།
སྐྱབས་དང་རེ་ས་གསོན་པོའི་མི་ལ་བྱས།།
མི་བུ་ཁྲ་ཁྲས་ཤི་བོའི་ལས་དག་བྱས།།
རང་མགོན་རང་ཞེས་ཀུ་ཅོ་སྒྲོགས་དང་ཀྱེ།།
དུས་མཐའི་ངག་ནི་མཆི་མའི་ནང་དུ་ལུད།།
དུག་གསུམ་རི་ཤོར་རང་གིས་མ་བཏུལ་ན།།
ཁམས་གསུམ་འགྲོ་བ་གཡུལ་གྱིས་ཁ་བཏགས་ནས།།
གླུ་ངག་སྐྱོ་བོ་ཞིག་ཀྱང་མ་འཁྱོངས་བར།།
གོ་ལའི་འཇིགས་རྔམ་ཁྲོད་ནས་ཚར་རེ་སྐན།།
༢༠༢༢.༨.༡༨ཉིན།
རྩོམ་སྒྲིག་པ། གངས་དགའ།
རྩོམ་ཁུངས། ངེད་དྲ་བ།