དབུས་གཙང་ཁོངས་ན་རྒྱ་ར་ག་ཤར་ཞེས་པའི་ལུང་པ་ཞིག་ཡོད་པ་དེར། བདག་སྐྱོང་བྱེད་མཁན་མི་དབང་བྱམས་པ་མགོན་པོ་ནི་གཏེར་སྟོན་ཞིག་དང་གྲུབ་རྟགས་ཀྱང་སྟོན་ཐུབ་མཁན་ཞིག་ཡིན། ལོ་རྒྱུས་ཡིག་ཆ་ཁག་ན། ཁོང་ནི་རོང་ཚའི་སྤྲུལ་སྐུ་ཡིན་ཚུལ་བཀོད་ཡོད། ཁོང་གི་ཡུམ་གྱི་མཚན་ལ་ཚེ་རིང་ཆོས་འཛོམས་ཟེར་ཞིང༌། ཁོང་གཉིས་ལ་ཕྱི་ལོ་ ༡༨༨༠ ལོར་བུ་མོ་ཞིག་སྐྱེས་པ་དེ་ནི། ཡབ་ཀྱི་དགོངས་པ་ལ་རང་ཉིད་ཀྱི་དཔོན་གནས་དང་བདག་དབང་རྒྱུད་འཛིན་པ་ཞིག་ཡོང་བར་རེ་བ་ཆེན་པོ་བཅངས་ནའང༌། བུ་མོ་ནི་ཡབ་ཀྱི་རྒྱུད་འཛིན་པ་བྱེད་པའི་བསམ་པ་མེད་པར། ནམ་རྒྱུན་རང་གིས་རྙེད་པ་ཡིན་ཟེར་ནས་སྐུ་འདྲ་དང་ཐང་ག ཆོས་དཔེ་སོགས་དངོས་རྫས་མང་པོ་བསྣམས་ཕེབས་མཁན་ཞིག་དང༌། དུས་རྒྱུན་དུ་གོ་དཀའ་བའི་སྙན་ཚིག་འདྲ་པོ་རེ་སྐྱོར་བ་ལ་དགའ་མོས་བྱེད་པ་ཞིག་ཡིན།
      དེ་ལྟ་བུའི་བུ་མོ་དེ་ཆུང་ངུའི་སྐབས་ནས་སྐྱིད་ཤོད་གྲོང་དཔོན་ཟེར་བ་ཞིག་ཡོད་པ་དེའི་སྲས་དང་གཉེན་རྟགས་བརྒྱབ་ཡོད་པ་ཞིག་ཡིན་ནའང༌། བུ་མོས་དུས་ནམ་ཡང་རང་བཞིན་ཕལ་བའི་ཁྱིམ་ཐབ་མི་བྱེད་ཅེས་ཨུ་ཚུགས་མཐར་བསྐྱེལ་བྱེད་ཀྱི་ཡོད་སྟབས། མི་དབང་བྱམས་པ་མགོན་པོ་ཡབ་ཡུམ་གཉིས་ཐབས་ཟད་ཨུ་ཐུག་ཏུ་གྱུར་ནས། ད་ནི་ཅི་ཞིག་བྱེད་དགོས་སམ་སྙམ་ནས་སྡོད་དགོས་པ་བྱུང༌།
      བུ་མོ་དགུང་ལོ་བཅུ་གཉིས་ལ་སོན་སྐབས། མདོ་ཁམས་ཕྱོགས་ན་རྫོགས་པ་ཆེན་པོའི་ཆོས་ཡོད་འདུག་པ་དེར། ཚེ་འདི་ལ་སློབ་སྦྱོང་དང་དེར་ཆོས་ཀྱི་བྱ་བ་བྱེད་ཐུབ་པ་ཞིག་བྱེད་དགོས་བསམ་པ་ཐུགས་ལ་ཡང་ཡང་འཆར་བ་དང་ཞལ་ནས་ཀྱང་དེ་ལྟར་ཡང་ཡང་གསུངས་སྟབས། ཡབ་ཡུམ་གཉིས་ལའང་ཅི་བྱ་འདི་བྱ་མེད་པར། བུ་མོའི་འདོད་པ་དེ་ཡམ་ཡུམ་གཉིས་ཀྱི་འདོད་པ་དང་མི་འདྲ་བ་ཞིག་འདུག་སྙམ་སྟེ། ཆུང་ངུ་ནས་གཉེན་གྱི་འབྲེལ་བ་བྱས་ཡོད་པ་དེ་ཕྱོགས་ལ་བསམ་བློ་གཞན་གཏོང་རྒྱུ་མ་རྙེད་པར་ལུས་པ་རེད།
       བུ་མོ་དགུང་ལོ་བཅུ་དྲུག་ལ་སོན་པའི་སྐབས་ལ། མདོ་ཁམས་གསེར་རྟའི་གསེར་སྒར་གྱི་རྒྱལ་སྲས་རིན་པོ་ཆེ་སྤྲུལ་དྲི་མེད་རིན་པོ་ཆེ་ཞུ་བ་དེ་གའི་འཁོར་ཚོགས་མང་པོ་དང་ལྷན་དབུས་མཇལ་ལ་སླེབས་པ་དང་འཕྲད། འཕྲད་ནས་མདོ་ཁམས་ཕྱོགས་ན་རྫོགས་པ་ཆེན་པོའི་ཆོས་ཡོད་སྐོར་བཀའ་འདྲི་སོགས་ཞུས་ནས་ཐུགས་ཞིབ་གནང་ཞིང་། སྔོན་གྱི་ཐུགས་འདོད་སྒྲུབ་པའི་འདུན་པ་ཤུགས་ཇེ་ཆེར་འཕེལ་ནས། དེ་དག་གི་རྗེས་སུ་གསང་སྟབས་ཀྱིས་འབྲངས་ཏེ། ཡུལ་དབུས་ནས་མདོ་ཁམས་ཕྱོགས་སུ་ཕེབས། དེར་ཐོག་མར་མདོ་སྨད་མགོ་ལོག་གི་མི་ཁྱིམ་ཆེན་པོ་ཞིག་གི་གཡོག་མོའི་ཚུལ་གྱིས་ལྟོ་གོས་འཕྱིད་ཙམ་གྱི་འཚོ་བར་རོལ་ནས་བཞུགས། རྗེས་ལ་ཁྱིམ་ཚང་དེས་མོ་རང་ལ་རང་གི་བུ་ཕྲུག་ནང་བཞིན་བདག་གཅེས་ཧ་ལས་པ་བྱས་ནའང༌། ཁྱིམ་ཐབ་འཛིན་པ་སོགས་གཏན་དུ་སྤངས་ནས་གནས་ངེས་མེད་དུ་འགྲིམ་ཞིང་ཆོས་ཁོ་ནར་གཞོལ། གང་དུ་ཕེབས་པ་དང༌། གང་ནས་བཞུགས་པ་ཡིན་ནའང༌། ངོ་མཚར་བའི་བློ་ཇུས་དང༌། རྣམ་དཔྱོད་ནི་མི་ཕལ་བ་ཞིག་ལས་ལྷག་པ་ལྡན་སྟབས། དད་ལྡན་མང་པོའི་ཡིད་ཀྱི་བརྟན་པ་དབང་མེད་དུ་འཕྲོག་ནས་སྙན་གྲགས་ཇེ་ཆེ་ནས་ཇེ་ཆེར་འཕེལ།
        སྐབས་དེར་མདོ་ཁམས་ཕྱོགས་ན་སྙན་གྲགས་དང་འཕྲིན་ལས་ཀྱི་བདག་པོར་གྱུར་པ་ཁྲག་འཐུང་བདུད་འཇོམས་གླིང་པ་དང༌། རིགས་སྲས་དྲི་མེད་འོད་ཟེར། མགར་བ་གཏེར་ཆེན་བདུད་འདུལ་དབང་ཕྱུག་གླིང་པ། དཔལ་ཡུལ་སྒོ་སྤྲུལ་རིན་པོ་ཆེ་སོགས་རྩོད་མེད་ཡོངས་གྲགས་ཀྱི་གཏེར་སྟོན་པ་དང་། གྲུབ་ཐོབ་པ་མང་པོའི་མདུན་ནས་ཆོས་དང་གདམས་ངག་ཞུ་བ་སོགས་ལ་འབད་པ་བསྟེན་པས། དུས་ཚོད་ཐུང་ངུའི་ནང་བསྟན་པ་དང་འགྲོ་བའི་དོན་མང་པོ་འགྲུབ་པ་ཞིག་ཆགས། ལྷག་པར་དུ་འཆད་པ་དང་རྩོམ་པའི་མཁས་པའི་ལས་ལ་ཐོགས་པ་མེད་པར་གྱུར་ཏེ། མགོ་ལོག་དང་གསེར་རྟ་གཉིས་ཀྱིས་གཙོས་པའི་ཡུལ་ཕྱོགས་གང་སར་སྙན་གྲགས་ཁྱབ་པ་ཞིག་བྱུང་བ་དེ་ནི། དབུས་གཙང་གི་ཡུལ་ནས་མདོ་ཁམས་ཕྱོགས་སུ་ཆོས་ཁོ་ནའི་ཆེད་ཕེབས་པའི་དབུས་བཟའ་མཁའ་འགྲོ་མ་ཀུན་བཟང་བདེ་སྐྱོང་དབང་མོ་བདེ་བའི་རྡོ་རྗེ་ཞུ་བ་ཁོང་ཡིན།
         ཁོང་གིས་རིག་གནས་སྤྱི་དང་ལྷག་པར་ནང་ཆོས་རྫོགས་པ་ཆེན་པོ་ལ་སློབ་སྦྱོང་གནས་སྟངས་ནི། འཇིག་རྟེན་གྱི་གནས་སྐབས་བདེ་བའི་རིགས་ཆ་ཚང་རྒྱབ་ཏུ་སྐྱུར་ཞིང༌། གནས་གང་དང་ཡུལ་གང་དུ་ཕེབས་པ་དང་བཞུགས་པའི་སྐབས་ལ། སློབ་གཉེར་བྱེད་པ་ནི་ལས་དོན་ཐམས་ཅད་ཀྱི་ཨང་དང་པོར་བཞག་སྟེ། ཉིན་མཚན་དབྱེར་མེད་ལྟ་བུའི་འབད་པ་དྲག་པོ་བྱས་ནས་ཐོག་མར་སྤྲང་འཁྱམ་པ་ཞིག་གི་རྣམ་པས་མདོ་ཁམས་ཕྱོགས་སུ་ཕེབས་པ་དེ། རྗེས་ལ་མཆོག་དམན་སྐྱེ་བོ་མང་པོས་དད་པའི་གུས་ཕྱག་འཚལ་ཡུལ་ཞིག་ཏུ་འགྱུར་བ་བྱུང་ཡོད། ཉེ་རབས་ཀྱི་ལོ་རྒྱུས་ཁྲོད་ནས་གཟེངས་སུ་ཐོན་ཤོས་ཀྱི་བུད་མེད་མཁས་པ་ཆེན་པོ་ཞིག་ཡིན།
        དབུས་བཟའ་མཁའ་འགྲོ་མ་ནི། ཆུང་ངུ་ནས་ཆོས་སེམས་ཆེ་ཞིང་ཆོས་ཀྱི་བྱ་བ་བྱེད་པ་ལ་བློ་སེམས་གཅིག་ཏུ་ཕྱོགས་པ་ཞིག་ཡིན་པ་དང༌། མདོ་ཁམས་ཕྱོགས་སུ་ཕེབས་ནས། ཆོས་ཀྱི་གཞུང་དང༌། སུམ་རྟགས་རིག་གནས་སོགས་ལའང་ལེགས་པར་སྦྱངས་ནས་མཁས་པར་གྱུར་པ་ཞིག་ཡིན་པ་དང༌། ཁོང་ལ་གསུང་འབུམ་མང་པོ་ཞིག་ཡོད་འདུག་ནའང༌། ད་ལྟ་དངོས་སུ་མཇལ་རྒྱུ་ཡོད་པ་ལ། གསུང་འབུམ་པོད་ཆེན་དྲུག་ཡོད།
       གསུང་འབུམ་དེ་དག་གི་ནང་དུ། རྫོགས་པ་ཆེན་པོའི་ཆོས་ཀྱི་སྐོར་དང༌། ཉམས་ལེན་གྱི་སྐོར། མན་ངག་གི་སྐོར། གཏེར་ཆོས་ཀྱི་སྐོར། ཡི་དམ་སྒྲུབ་ཐབས་ཀྱི་སྐོར་སོགས་ཆོས་ཚན་མང་པོ་བཞུགས་ཤིང༌། གཞན་ཡང༌། རང་རྣམ་པོད་ཆེན་གཅིག་དང༌། ཉམས་མགུར་གྱི་སྐོར། ནད་རིམས་ཞི་བྱེད། བར་ཆད་སེལ་བྱེད། ཕྱུགས་གོད་དང་བཙན་ཐན་འགོག་བཅོས། ཁོར་ཡུག་སྲུང་སྐྱོབ། ས་བཅུད་གསོ་ཐབས་སོགས་མང་དུ་བཞུགས་པ་དེ་དག་ནི་རྗོད་བྱེད་ཀྱི་བབ་དེ་འབངས་མི་རང་བཞིན་པའི་སྐད་ཀྱི་འགྲོས་ཤུགས་ཆེ་བར་བྱས་ཡོད་པ་ཞིག་ཡིན་པ་དེ་ནི། བོད་ཀྱི་རྩོམ་རིག་སྤྱི་དང༌། ནང་སྒོས་སུ། བུད་མེད་རིགས་ཀྱི་ལྷན་སྐྱེས་ཐུན་མིན་གྱི་ཚོར་བའི་ཁྱད་ཆོས་ཀྱིས་ཡུལ་བཀོད་དང༌། བརྩེ་དུང་སོགས་ཉམས་སུ་ལེན་སྟངས་ཁྱད་པར་བ་སྤྱད་ནས་བྲིས་འདུག་སྟབས། བུད་མེད་ཀྱི་བརྩམས་ཆོས་ཁྲོད་ནས་གོ་ས་མཐོ་ཤོས་ཟིན་ཡོད་པ་ཞིག་ཡིན།

རྩོམ་ཁུངས། ངེད་དྲ་བ།