ཐའེ་ཝན་བོད་བརྒྱུད་ནང་བསྟན་དྲ་རྒྱའི་བརྙན་འཕྲིན་ནི་སྤྱི་ལོ་༢༠༡༣ ཟླ་༥་ཚེས་བཅུ་བདུན་ཏེ། གནས་བརྟན་པའི་ལུགས་ཀྱི་བདག་ཅག་གི་སྟོན་པ་ཐུབ་པའི་དབང་པོའི་འཁྲུངས་སྐར་དང་འབྲེལ་ཏེ་སྒོ་འབྱེད་ཤར་གཏོང་བྱས་ཤིང་། ཆེད་བཀོལ་བརྙན་གཟུགས་ཀྱི་དྲ་རྒྱ་ཞིག་ཡིན་པ་དང་། དེ་ཡང་བོད་བརྒྱུད་ནང་བསྟན་གཙོ་བོར་བྱས་པའི་འཛམ་གླིང་ཁྱོན་ཡོངས་ཀྱི་སངས་རྒྱས་པའི་ཆོས་བརྒྱུད་ཁག་གི་བྱུང་རིམ་དང་། ལྟ་གྲུབ། ཉམས་ལེན། བྱེད་སྒོ། གསར་འགྱུར་སོགས་འགོད་པའི་དམིགས་ཡུལ་བཅངས་ཡོད། སྤྱི་ལོ་༢༠༡༢ ལོའི་ཟླ་༡༢ ཚེས་ ༣་ཉིན་ལས་ཀ་དངོས་སུ་མགོ་བཙུགས་ཏེ་ད་ལྟའི་བར་གྱི་ཟླ་ངོ་ལྔ་ལྷག་ལ་དྲ་རྒྱ་ཇུས་འགོད་དང་། བརྙན་ལེན། ཡིག་གཏགས། སྒྲིག་སྦྱོར་སོགས་ཀྱི་བྱ་བ་མཐའ་དག་རིམ་བསྟུད་དུ་བསྒྲུབས་ཏེ་དེ་རིང་སྟེ་སྤྱི་ལོ་༢༠༡༣ ཟླ་༥་ཚེས་ ༡༧ ཐའེ་པེ་སློབ་ཆེན་གྱི་་་་་ཚོམས་ཆེན་དུ་སྒོ་འབྱེད་མཛད་སྒོ་གཟབ་རྒྱས་དང་བཅས་དངོས་སུ་ཤར་གཏོང་བྱས། འདས་པའི་ཟླ་བ་དེ་དག་གི་རིང་ལ་ཆོས་བརྒྱུད་རིས་མེད་དང་། སྐྱ་སེར་ཁྱད་མེད་ཀྱི་མཁས་པའི་འཆད་ཁྲིད་བདུན་ཅུ་ལྷག་ཅིག་བརྙན་ཕབ་བྱས་ཟིན་པ་དང་། དྲ་རྒྱ་འདིའི་རང་གི་རྩ་དོན་ལྟར་འཛམ་གླིང་གི་ནང་པའི་བརྒྱུད་པ་ཆེན་པོ་གསུམ་དང་། དེ་དག་རེ་རེའི་ནང་ཚན་གྱི་ཆོས་བརྒྱུད་སོ་སོའི་ལྟ་གྲུབ་དང་ཉམས་ལེན། ལོ་རྒྱུས། ཕྱག་སྲོལ་དང་བཅས་པ་ངོ་སྤྲོད་བྱ་རྒྱུ་ཡིན།
   དྲ་རྒྱ་འདི་ནི་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་ཡན་ལག་སྡེ་ཚན་ཞིག་ཡིན་པ་དང་། ཐའེ་ཝན་གནས་བཞུགས་ཤེས་འཇོན་ལྷག་བསམ་ལྡན་པའི་བླ་སྤྲུལ་མཁན་པོ་དགེ་བཤེས་སྐོར་ཞིག་གིས་གྲོས་བསྡུར་རབ་དང་རིམ་པ་བརྒྱུད་མཉམ་ལས་ཀྱིས་རྩ་འཛུགས་བྱས་པ་ཞིག་ཡིན། བརྙན་འཕྲིན་དྲ་རྒྱ་འདིའི་འགན་དབང་ལྡན་པའི་མི་སྣའི་ཁྲོད།  རྒྱལ་བསྟན་རིས་མེད་རིག་འཛིན་ཚོགས་པའི་ཀ་ཐོགཿརིག་འཛིན་ཆེན་པོ། ཐའེ་ཝན་ཀླུ་སྒྲུབ་ཆོས་ཚོགས་ཀྱི་ཨ་ཀ་རིན་པོ་ཆེ། རིག་འཛིན་ཆེན་པོ་འཇའ་ཚོན་སྙིང་པོའི་ཆོས་ཚོགས་ཀྱི་འཇའ་ཚོན་རིན་པོ་ཆེ། བྱང་ཆུབ་ཐེག་གསུམ་ཆོས་གླིང་གི་མཁན་པོ་ཚུལ་རྣམ་རིན་པོ་ཆེ། སྔ་འགྱུར་དྲེལ་དཀར་མདོ་རྒྱུད་ཆོས་གླིང་མཁན་པོ་ཆོས་ཉིད་དོན་རྟོགས། འབའ་རོམ་བཀའ་བརྒྱུད་བྱང་ཆུབ་ཆོས་གླིང་གི་ཚང་སར་ཀུན་དགའ་རིན་པོ་ཆེ། སློབ་དཔོན་བསོད་ནམས་ཕུན་ཚོགས། མཁན་པོ་ཚེ་རིང་བཀྲ་ཤིས། མཁྱེན་བརྩེ་ནུས་ལྡན་གླིང་གི་དགེ་བཤེས་འཕྲིན་ལས་རྒྱ་མཚོ།  ཐའེ་ཝན་བོད་ཀྱི་དོན་གཅོད་ཁང་གི་ཆོས་དགེ་དགེ་བཤེས་འཇམ་དཔལ་ཆོས་འཛིན། ས་སྐྱ་དགྱེས་པ་རྡོ་རྗེ་ཆོས་ཚོགས་ཀྱི་ཕུར་བླ་རིན་པོ་ཆེ། ཐའེ་ཝན་ས་སྐྱ་ཤེར་ཆེན་ཞིབ་འཇུག་ཆོས་ཚོགས་ཀྱི་སྤྲུལ་སྐུ་བཀྲ་ཤིས་རྒྱ་མཚོ་སོགས་་ཡོད་ལ། དེ་མིན་ད་དུང་ཚོགས་ཁོངས་སུ་ཞུགས་པའི་མི་སྒེར་དང་ཆོས་ཚོགས་མང་པོ་ཞིག་གིས་བྱ་བ་འདིར་རམ་འདེགས་དང་། འཆད་ཁྲིད་བགྲོ་གླེང་སོགས་ལ་མཉམ་ཞུགས་གནང་བཞིན་པ་ཡིན།
   དམིགས་ཡུལ་ནི་ནང་པ་སངས་རྒྱས་པའི་ཡང་དག་པའི་ལྟ་གྲུབ་དང་། ཉམས་ལེན། བྱུང་རིམ་སོགས་ལོག་འཚོ་དང་དཔེ་མཁྱུད་སྤངས་པའི་སྒོ་ནས་འཛམ་གླིང་གི་ནང་ཆོས་དོན་གཉེར་བ་རྣམས་ཀྱིས་ཤེས་རྟོགས་ཡོང་རྒྱུར་དམིགས་ཡོད།
   ད་སྔ་བོད་ཀྱི་སྐྱེས་ཆེན་མཁས་དབང་རྣམས་ཀྱི་སྐུ་དྲིན་ལས་བོད་བརྒྱུད་ནང་བསྟན་འཛམ་གླིང་ཁྲོད་དགའ་འོས་པའི་འཕེལ་རྒྱས་དང་དར་ཁྱབ་ཕྱིན་ཏེ་ཉམས་ལེན་བྱེད་མཁན་དང་། ཞིབ་འཇུག་སློབ་སྦྱོང་བྱེད་མཁན་རྒྱ་ཁྱབ་ཏུ་འཕེལ་བཞིན་ཡོད་མོད། བཀྲ་ཤིས་སྣ་ནག་མ་དང་ལྷན་ཅིག་ཅེས་པ་ལྟར་དུ། རང་རེའི་ཆོས་བརྒྱུད་འཛིན་པའི་སྐྱེ་བོ་རེ་ཟུང་གི་བྱེད་བབས་ལ་བརྟེན་པ་དང་། གཞན་ཡང་ཆེད་དུ་རང་རེའི་རིག་གནས་ལོ་རྒྱུས་ཆོས་ལུགས་དང་བཅས་པར་བསམ་བཞིན་དུ་མཐོང་ཆུང་ཁྱད་གསོད་བྱ་སེམས་ཀྱིས་ཀུན་ནས་བསླངས་ཏེ། ཆེད་དུ་གླེང་ཕྱོགས་སྣ་ཚོགས་བཟོ་བ་དང་། གསང་སྔགས་ཉམས་ལེན་གྱི་སྤྱོད་པ་རེ་འགའ་དང་ལྷ་སྐུའི་རྣམ་པ་ཅི་རིགས་ལ་ཁག་བཏགས་ཏེ་ཅི་ཐུབ་ཀྱིས་བོད་ཀྱི་ཆོས་དང་རིག་གནས་ལ་དམའ་དབབ་པའི་ཚོགས་སྡེ་དང་མི་སྒེར་བའང་ཅི་རིགས་མཆིས་ཤིང་། དེ་དག་གི་བྱེད་བབ་ལ་བརྟེན་ནས་ནང་པའི་རྗེས་འཇུག་སྐྱེ་འགྲོ་མང་པོར་ཆོས་སྤངས་ཀྱི་ལས་ངན་ཚབ་པོ་ཆེ་གསོག་པའི་རྒྱུ་རུ་འགྱུར་བ་མང་དུ་འཕེལ་བཞིན་ཡོད་པས། བོད་བརྒྱུད་ནང་པ་སངས་རྒྱས་པའི་ཆོས་ལུགས་ཀྱི་དོན་དངོས་གནས་ཚུལ་ཧ་གོ་སྟེ་རང་གཞན་ལོག་པར་ལྟུང་བའི་རྒྱུ་ཚབས་པོ་ཆེ་མི་གསོག་པའི་མཐུན་རྐྱེན་དུ་འགྱུར་རེ་དང་།
   སྤྱིར་ན་དུས་རབས་ཀྱི་འཕེལ་ཕྱོགས་དང་མིའི་རིགས་ཀྱི་འདུ་ཤེས་འགྱུར་རིམ་གྱི་དབང་དུ་བཏང་ནའང་དད་མོས་ཡོད་པ་སྐད་ཀྱི་ཆོས་ལུགས་ཀྱི་དུས་རབས་མཇུག་རྫོགས་ལ་ཉེ་ཞིང་། ལྷག་པར་དུ་ནང་པ་སངས་རྒྱས་པའི་ཆོས་ལུགས་ཀྱི་དབང་དུ་བྱས་ན་རིགས་པའི་ཆོས་ལུགས་དང་། རྒྱུ་མཚན་གྱི་ཆོས་ལུགས། གནས་ལུགས་ཀྱི་ཆོས་ལུགས་ཤིག་ཡིན་པས་རང་ཅག་གིས་ད་ལྟའི་འཛམ་གླིང་གི་འཕོ་འགྱུར་ཡ་མ་བརླ་འདིའི་ནང་ཆོས་ལུགས་འདི་ལ་བརྟེན་ནས་འགྲོ་བ་མིའི་རིགས་ལ་ཞབས་འདེགས་རྒྱ་ཆེར་ཞུ་ཐུབ་པའི་གདེང་སྤོབས་རྒྱུ་མཚན་ལྡན་པ་ཡོད་པའི་ཐོག དུས་རབས་དང་འདུ་ཤེས་ཀྱི་འགྱུར་བ་ལ་བསྟུན་ཏེ་རང་རེའི་ཆོས་ལུགས་དར་སྤེལ་རྒྱུད་འཛིན་ལ་འབད་པ་བླ་ལྷག་བསྟེན་དགོས་པ་སྨོས་མེད་ཡིན། ༸གོང་ས་སྐྱབས་མགོན་ཆེན་པོས་ཡང་ཡང་གདམས་པ་ལྟར་དུས་རབས་ཉི་ཤུ་རྩ་གཅིག་པའི་ནང་པ་ཞིག་བྱེད་པ་ལ་སྡོམ་སེམས་དང་དད་མོས་ཙམ་གྱིས་མི་ཆོག་པར་ཤེས་རབ་ཀྱི་དཔྱད་སྟོབས་ལ་བརྟེན་ནས་དད་མོས་བྱེད་པ་དང་། ཤེས་རབ་ཀྱི་གྲོགས་དང་བཅས་པའི་སྤྱོད་པ་ལ་བསླབ་རྒྱུ་ནི་དུས་རབས་དང་འཚམ་པའི་ཆོས་ལུགས་པ་ཞིག་གི་འགན་འཁྲི་ཡིན། དེ་འདྲའི་འགན་འཁྲི་ཞིག་འཁུར་བར་ངེས་པར་དགོས་པ་ནི་ཐོས་བསམ་སྒོམ་གསུམ་གྱི་རྣམ་གཞག་ལས་འདའ་ས་མེད་པས། ཐམས་ཅད་ཀྱི་རྩ་བ་ནི་ཐོས་པ་སྟེ་སློབ་སྦྱོང་བྱ་དགོས་པ་ཡིན། དེའི་ཕྱིར་དྲ་རྒྱའི་བརྙན་འཕྲིན་འདི་བརྒྱུད་ནས་འཛམ་གླིང་ཡོངས་ཀྱི་ནང་པ་རྣམས་ལ་རང་རེའི་ལྟ་སྒོམ་སྤྱོད་གསུམ་གྱི་དོན་དངོས་གནས་ཚུལ་ར་སྤྲོད་ཐབས་བྱེད་རྒྱུ་ལ་འབད་པ་གཙོ་བོར་བསྟེན་བཞིན་ཡོད།
   མིག་སྔར་བོད་ཀྱི་དྲ་རྒྱ་ཁག་ལ་ལྟོས་ནས་བཤད་ན། དྲ་རྒྱ་འདི་ནི་ཆོས་ལུགས་ཀྱི་སློབ་གསོ་གཙིགས་སུ་བཟུང་བའི་བརྙན་འཕྲིན་གྱི་དྲ་རྒྱ་གཅིག་བུ་དེ་ཡིན་ལ་གནས་སྐབས་སུ་ཡི་གེའི་ཆ་ནས་རྒྱ་ཡིག་རྐྱང་བ་བཀོལ་གྱི་ཡོད་པ་དང་། སྐད་ཆ་ལ་བོད་རྒྱ་དབྱིན་གསུམ་ཅི་རིགས་ཡོད། ང་ཚོའི་བོད་དབྱིན་གཉིས་ཀྱི་འཆར་ཡིག་ལྡན་པའི་བརྙན་འཕྲིན་དྲ་བ་ཡང་འཛུགས་སྐྲུན་བྱ་ཐུབ་པའི་རེ་བ་འཆང་གི་ཡོད།  དེ་མིན་དྲ་རྒྱ་འདིའི་ནང་ཆོས་དང་འབྲེལ་བའི་དཔེ་དེབ་གྲགས་ཅན་སྣ་ཚོགས་མཚམས་སྦྱོར་བྱ་རྒྱུ་ཡིན་ལ། གལ་ཏེ་བདག་དབང་གི་ཆ་ནས་མོས་མཐུན་ཡོད་པའི་དཔེ་དེབ་རིགས་ PDFདང་ eBook ཅི་རིགས་ཐོག་ཕབ་ལེན་བྱ་སའང་ཡོད། (གནས་སྐབས་རྒྱ་ཡིག་མ་གཏོགས་བཀོལ་གྱི་མེད།)
   དྲ་རྒྱ་འདིས་བོད་ཀྱི་ཆོས་བརྒྱུད་རིས་སུ་མ་ཆད་པའི་སྐྱེས་ཆེན་མཁས་དབང་མང་པོ་ཞིག་གི་འཆད་ཁྲིད་བརྙན་ལེན་སྒྲིག་སྦྱོར་བྱས་དང་བྱེད་མུས་ཡིན་ལ། ལྷོ་བརྒྱུད་དང་རྒྱ་བརྒྱུད་ཀྱི་མཁས་པ་ཚོའི་འཆད་ཁྲིད་དང་མཛད་ཕྲིན་ཀྱང་བརྙན་དུ་ཕབ་ནས་ཐུན་མོང་གི་ལོངས་སྤྱོད་དུ་འབུལ་ངེས་ཡིན།
དྲ་རྒྱའི་ཁ་བྱང་ནི།  www.ttbtv.org

རྩོམ་ཁུངས། ངེད་དྲ་བ།