སྔོན་འགྲོ།

　　ཉིན་འགའི་སྔོན་ལ། ན་གཞོན་བརྩམས་སྒྲུང་པ་ཉི་མ་ནོར་བུས་འཕྲིན་ཕྲན་ཞིག་བསྐུར་ཏེ།ཁུལ་རིག་རྩལ་ལྷན་ཚོགས་ཀྱིས་ཁོ་རང་གི་བརྩམས་སྒྲུང་པར་ལ་འདེབས་གྲབས་ཡོད་པས། ང་ལ་སྔོན་འགྲོ་ཞིག་འབྲི་རོགས་ཞེས་སྐུལ་བྱུང་། སྤྱིར་ན་དཔེ་དེབ་རྣམས་ལ་སྔོན་འགྲོ་འབྲི་བ་ནི་གཉེར་འདོད་མེད་པའི་ལས་ཀ་དམིགས་སུ་བསལ་བ་ཞིག་ཡིན་པ་འདྲ་མོད། བདག་དང་ཉི་མ་ནོར་བུ་གཉིས་ཀར་འབྲེལ་བ་དམིགས་སུ་བསལ་བ་ཞིག་གྲུབ་ཡོད་པས། སྔར་དུས་གཞན་གྱིས་བསྐུལ་ན་གཏན་ནས་གཉེར་མི་སྲིད་པའི་ལས་ཀ་འདི་ཨུ་ཚུགས་ཆེན་པོ་དང་བཅས་གཉེར་དགོས་བྱུང་།

　　གཅིག ང་དང་ཉི་མ་ནོར་བུ།

　　དེང་སྐབས། ཁམས་ཕྱོགས་སུ་བོད་ཡིག་གི་ལམ་ནས་བརྩམས་སྒྲུང་དང་སྙན་ངག་ལ་འཇུག་མཁན་གྱི་ན་གཞོན་སྐོར་དང་རིམ་པ་ཞིག་འཚར་ལོངས་འབྱུང་བཞིན་ཡོད་ལ། ཉི་མ་ནོར་བུ་ནི་གཞོན་ནུ་རྩོམ་དགའ་དེ་དག་ཁྲོད་ཀྱི་གཅིག་རེད། འདིར་གསལ་བཤད་བྱ་དགོས་པ་ཞིག་ནི། བདག་གིས་འཕྲིན་ཕྲན་ལས་ཉི་མ་ནོར་བུའི་སྐད་གོ་བ་ཙམ་ལས་མི་ངོ་མ་དེ་མཐོང་མ་མྱོང་། གོ་ཐོས་སུ་ཁོ་ནི་དཀར་མཛེས་ཁུལ་བྲག་འགོ་རྫོང་དུ་སྐྱེས་པ་དང་། སྤྱི་ལོ2011ལོར་མཚོ་སྔོན་དགེ་ཐོན་སློབ་གྲྭ་ཆེན་མོའི་བོད་དབྱིན་འཛིན་གྲྭ་ནས་སློབ་མཐར་ཕྱིན་རྗེས། བྲག་འགོ་རྫོང་ལི་སྨད་སློབ་ཆུང་དུ་དགེ་རྒན་གྱི་ལས་ཀ་གཉེར་མགོ་བརྩམས་པར་བརྗོད། གོ་ཐོས་སུ་ཉི་མ་ནོར་བུས་སྔ་གཞུག་ཏུ《བོད་ཀྱི་རྩོམ་རིག་སྒྱུ་རྩལ》དང་། 《མི་རིགས》དང་། 《ཁ་བཏགས་དཀར་པོ》དང་། 《གངས་དཀར་རི་བོ》དང་། 《གངས་རྒྱན་ན་ཆུང་ཚགས་པར》དང་། 《ཁམས་པའི་ཚགས་པར》དང་། 《གཞིས་ཀ་རྩེ་ཚགས་པར》སོགས་སུ་སྙན་ངག་དང་། བརྩམས་སྒྲུང་དང་། སྒྱུར་རྩོམ་སྐོར་ཞིག་སྤེལ་ཡོད་པར་བཤད་མོད། བརྩམས་ཆོས་ལ་ལ་དངོས་སུ་མཐོང་སོང་ལ། མང་པོ་ཞིག་གི་ཁ་བྱང་ཙམ་ཡང་མཐོང་མ་བྱུང་། ང་དང་ཉི་མ་ནོར་བུ་གཉིས་ཀར་འབྲེལ་བ་དམིགས་སུ་བསལ་བ་དེ་ནི་འདི་ལྟར་བྱུང་བ་ཡིན་ཏེ། སྤྱི་ལོ2018ལོར་ཟི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས་ཀྱིས་ས་གནས་རང་གི་ན་གཞོན་རྩོམ་པ་པོ་གསོ་སྐྱོང་ལ་དམིགས་ཏེ། བརྩམས་སྒྲུང་དང་སྙན་ངག ལྷུག་རྩོམ་འབྲི་མཁན་གྱི་རྩོམ་པ་པོ་འགའ་ལ“སློབ་མ”འགའ་རེ་བཀོད་སྒྲིག་བྱས་ཏེ་ན་གཞོན་རྩོམ་པ་པོ་གསོ་སྐྱོང་བྱེད་མགོ་བརྩམས། བྱེད་སྒོ་འདི་ཉིད་སྤེལ་སྐབས། བདག་ཀྱང་མཛུབ་སྟོན་དགེ་རྒན་གྱི་གྲས་ལ་བཀོད་པ་མ་ཟད། ཉི་མ་ནོར་བུ་དང་། པདྨ་རྒྱལ་མཚན་དང་། ཆོས་དབྱིངས་རྒྱ་མཚོ་གསུམ་གར་བདག་གིས་མཛུབ་སྟོན་བྱ་དགོས་བྱུང་བ་ན། ཉི་མ་ནོར་བུས་བྲིས་པའི་བརྩམས་སྒྲུང་རེ་རེ་ཞིབ་ཏུ་བཀླགས་ཏེ། བརྩམས་ཆོས་ཀྱི་སྐྱོན་ཡོན་གཉིས་ཏེ་སྒོས་སུ་སྐྱོན་གྱི་སྐོར་དེ་ཚིག་ཐུང་ཞིང་དོན་གསལ་བ། འཛེམ་པ་མེད་པའི་སྒོ་ནས་བརྗོད་པ་ལས་གཞན། བརྩམས་སྒྲུང་གསར་རྩོམ་ཐད་ཀྱི་རྒྱུན་ཤེས་ངེས་པར་བྱ་ཆེད། བདག་གིས་འབྲི་བཞིན་ཡོད་པའི《བརྩམས་སྒྲུང་གསར་རྩོམ་ལ་འཇུག་པའི་སྒོ》ལས་ཚན་པ་རེ་གཉིས་ཆེད་དུ་བསྐུར་ནས་ལྟ་ཀློག་ལ་འཇུག་པར་བསྐུལ་བ་དང་། བརྩམས་སྒྲུང་གྱི་དཔེ་དེབ་འགའ་ཞིག་ངོ་སྤྲོད་བྱས་ཏེ་གོ་རིམ་ཡོད་པའི་སྒོ་ནས་མཛུབ་སྟོན་གྱི་ལས་ལ་རོལ་བ་ན། ཉི་མ་ནོར་བུ་ལ་བློ་བསྐྱེད་ཆེན་པོ་བྱུང་སོང་བ་འདྲ་སྟེ། ཁོ་རང་གི་བརྩམས་ཆོས་ཀྱི་སྤུས་ཀ་ཇེ་བཟང་ནས་ཇེ་ལེགས་ལ་སོང་བ་དང་། བརྩམས་སྒྲུང་ལ་ལ་ནི་སྒྱུ་རྩལ་རིན་ཐང་དང་མཛེས་དཔྱོད་རིན་ཐང་སོགས་ཀྱི་ཐད་དུ་ཅུང་ལེགས་པོ་ཞིག་འཁྱོངས་འདུག་པས། མཛུབ་སྟོན་དགེ་རྒན་གྱི་ངོས་ནས་དགའ་སྤྲོ་ཆེན་པོ་སྐྱེས་བྱུང་བ་ན། བརྩམས་སྒྲུང་གྱི་དཔེ་དེབ་ལ་སྔོན་འགྲོ་འབྲི་བའི་ལས་ཀའང་དང་ལེན་མི་བྱེད་ཀ་མེད་བྱུང་སོང་།

　　གཉིས། ཉི་མ་ནོར་བུ་དང་ཁོ་རང་གི་བརྩམས་སྒྲུང།

　　ན་གཞོན་རྩོམ་པ་པོ་ཉི་མ་ནོར་བུ་བདག་གི“སློབ་མར”གྱུར་རྗེས། ཉི་མ་ནོར་བུས་བརྩམས་སྒྲུང་གསར་རྩོམ་གྱི་ལས་ལ་འབད་དེ།སྔ་གཞུག་ཏུ་རང་གིས་བྲིས་པའི་བརྩམས་ཆོས་ཏེ《རྣམ་སྨིན》དང་། 《སྤྲུལ་སྐུ》དང་། 《རྔོན་པ》དང་། 《ཤིག་དང་ལྗི་བ》དང་། 《མི་ལུས་ལེན་ཁར་ཁྱི་ལུས》སོགས་ཡིག་ཟམ་བརྒྱུད་ནས་བདག་ལ་བསྐུར་པ་ན། བདག་གིས་ཀྱང་བརྩམས་སྒྲུང་རེ་རེ་དུས་ལྟར་བཀླགས་པ་མ་ཟད། རང་གི་བློ་ཡིས་ལྕོགས་ལུགས་ལྟར་བརྩམས་ཆོས་ཀྱི་དགེ་སྐྱོན་གཉིས་ཀ་སྦ་གསང་མེད་པར་བརྗོད་དེ། ཉི་མ་ནོར་བུ་ལགས་ལ་བཟོ་བཅོས་བྱེད་པར་བསྐུལ་པ་ན། ཁོ་རང་གིས་ཀྱང་རང་གི་བརྩམས་ཆོས་ཀྱི་སྐྱོན་རྣམས་དུས་ལ་འགྱངས་པ་མེད་པར་བཟོ་བཅོས་བྱས་རྗེས་སླར་ཡང་བདག་ལ་བསྐུར་པ་ཡིན། འདི་ལྟར་བརྩམས་སྒྲུང་གཅིག་ལན་གྲངས་དུ་མར་ཕར་སྐུར་ཚུར་སྐུར་བྱས་པ་ན། ཁོ་རང་གི་བརྩམས་ཆོས་ཀྱི་སྤུས་ཀ་རིམ་བཞིན་ཇེ་ལེགས་ལ་སོང་བ་དང་། བརྩམས་སྒྲུང་གསར་རྩོམ་ཐད་དུ་ངེས་ཤེས་ཅུང་ཟད་རྙེད་སོང་། ཚུལ་དེ་ཞིབ་ཏུ་བརྗོད་ན་འདི་ལྟར་ལགས་ཏེ།ངེད་གཉིས་ཀར“དགེ་སློབ”ཀྱི་འབྲེལ་བ་དེ་འདྲ་བྱུང་རྗེས། ལོ་གཅིག་ལ་ཉེ་བ་ཙམ་གྱི་རིང་ལ་ཉི་མ་ནོར་བུས་བརྩམས་སྒྲུང་བཅུ་ལྷག་བརྩམས་པ་དང་། བརྩམས་སྒྲུང་དེ་དག་གསར་རྩོམ་དང་ཞུ་དག་གི་གོ་རིམ་ཡང་ཡང་བརྒྱུད་པ་ན། སྔར་དུས་བྱུང་རིམ་ཞིབ་ཕྲ་མེད་པ་ལ་བྱུང་རིམ་ཕྲ་མོ་ལྡན་པར་གྱུར། སྔར་དུས་གཏམ་རྒྱུད་ནག་འགྲོས་སུ་དེད་འདུག་པ་རྣམས་ལ་གཙོ་ཕལ་དང་རྒྱས་བསྡུས་ཀྱི་དབྱེ་བ་ལྡན་པར་གྱུར། སྔར་དུས་བརྗོད་སྙིང་སྤངས་ཏེ་བྱུང་རིམ་གང་དྲན་དྲན་དུ་དྲངས་འདུག་པ་རྣམས་ལ་གཞུང་རྟ་དང་སྲོག་ཤིང་ལྡན་པར་གྱུར་ཏེ། བརྩམས་སྒྲུང་ཅུང་ཚད་ལྡན་སྐོར་ཞིག་བྱུང་སོང་། ཉི་མ་ནོར་བུས་བརྩམས་པའི་བརྩམས་སྒྲུང་རྣམས་ལས《ཤིག་དང་ལྗི་བ》ནི་བརྗོད་སྙིང་དང་། བརྗོད་བྱ། སྒྲིག་གཞི་སོགས་ལས་གང་ལ་གཞིགས་ཀྱང་བྱིས་སྒྲུང་ཕུལ་དུ་བྱུང་བ་ཞིག་འཁྱོངས་འདུག་པས། བདག་གིས་བརྩམས་སྒྲུང་དེ་དུས་ལྟར《སྦྲང་ཆར》རྩོམ་སྒྲིག་ཁང་ལ་བསྐུར་པ་མ་ཟད། བརྩམས་སྒྲུང་རྩོམ་སྒྲིག་པ་ལ་ཁ་པར་བཏང་སྟེ་བརྩམས་ཆོས་དེ་ངོ་སྤྲོད་གང་ལེགས་བྱས་མོད། ཉི་མ་ནོར་བུ་བརྩམས་ཆོས་ཀློག་མཁན་ལ་འབུལ་བར་རྔམ་ནས་ཡུན་རིང་མ་འགོར་བར་བྱིས་སྒྲུང་དེ་དྲ་ངོས་སུ་བཀོད་པ་ན། 《སྦྲང་ཆར》གྱི་ཤོག་ལྷེ་དུ་མ་འཛིན་པའི་གོ་སྐབས་བཟང་པོ་ཞིག་རྔམ་པའི་དབང་གིས་བརླགས་པ་མ་ཟད། བདག་ལའང་ཁོང་ཁྲོ་ཅུང་ཟད་བསླངས་སོང་། འོན་ཏེ་ཉི་མ་ནོར་བུ་ད་དུང་ལོ་ན་གཞོན། བརྩམས་སྒྲུང་ལ་ཤིན་ཏུ་དུངས་པས། 《སྦྲང་ཆར》གྱི་ཤོག་ལྷེ་འཛིན་པའི་གོ་སྐབས་ནི་རྗེས་སུ་འབྱུང་ངེས།

　　གསུམ། ཉི་མ་ནོར་བུ་དང་ཁོའི་བརྩམས་སྒྲུང་གི་འབྱུང་འགྱུར།

　　ཉི་མ་ནོར་བུ་ནི་ལོ་ན་ཤིན་ཏུ་གཞོན་པའི་ན་གཞོན་རྩོམ་པ་པོ་ཞིག་ཡིན་པ་མ་ཟད། གསར་རྩོམ་གྱི་ལས་ལ་ཞུགས་ནས་དུས་ཡུན་རིང་པོ་མ་འགོར་བ་ན། མིག་སྔའི་བར་དུ་བོད་ཀྱི་རྩོམ་སྟེགས་མངའ་དབང་སྒྱུར་ནུས་པའི་བརྩམས་ཆོས་གཅིག་ཀྱང་འབྲི་མ་ནུས་མོད། འོན་ཏེ་སྔར་དུས་མ་ནུས་ན་རྗེས་སུ་མི་ནུས་པའི་ངེས་པ་ནི་གཏན་ནས་མེད་དེ། ཅི་ཡིན་ཞེ་ན་རྒྱུ་མཚན་ནི་འདི་ལྟར་ལགས་ཏེ། གཅིག སྲིད་པའི་ཁྱོན་གྱི་ལས་ཀ་གང་ཞིག་ལ་གཞུག་དགོས་ཀྱང་། དེ་ལ་དུངས་པའི་སྒོ་ནས་བརྩོན་པ་ཆེན་པོ་དང་བཅས། ཨུ་ཚུགས་ཆེན་པོ་དང་བཅས་འཇུག་པར་ནུས་ན། མཇུག་འབྲས་ནི་མོས་འདུན་གྱི་རྗེས་སུ་འགྲོ་བ་ཞིག་འབྱུང་ངེས་ཡིན་ལ། ཉི་མ་ནོར་བུ་ནི་བརྩམས་སྒྲུང་ལ་ཤིན་ཏུ་དུངས་པ་མ་ཟད། གསར་རྩོམ་ལ་འཇུག་དུས་བརྩོན་པའང་ཤིན་ཏུ་ཆེ་བས། གལ་སྲིད་སྔར་གྱི་དུངས་པ་མི་ཉམས་པ་དང་སྔར་གྱི་བརྩོན་པ་མ་ལྷོད་དེ་གསར་རྩོམ་གྱི་ལས་ལ་ཞུགས་པ་ན། གསར་རྩོམ་ལ་བྱང་ཆ་བྱུང་བ་དང་བསྟུན་ནས་བརྩམས་ཆོས་ཀྱི་སྤུས་ཀ་རིམ་བཞིན་ཇེ་མཐོར་འགྲོ་ངེས་ཡིན། གཉིས། སྲིད་པའི་ཁྱོན་གྱི་ལས་ཀ་གང་ལ་གཞུག་དགོས་ཀྱང་། ལྷན་སྐྱེས་སུ་གྲུབ་པའི་འཇོན་ཐང་སྤྱོད་ནུས་ན་གྲུབ་འབྲས་མི་དམན་པ་ཞིག་ལེན་ཐུབ་པ་འདྲ་སྟེ། མིག་སྔར་ཉི་མ་ནོར་བུ་ནི་བརྩམས་སྒྲུང་གསར་རྩོམ་ལ་བྱང་ཆ་ཆེན་པོ་མེད་མོད། ཁོ་རང་ལ་འཚོ་བའི་རྣམ་པ་ཕྲ་མོ་དང་། མི་སྣའི་རྣམ་པ་ཕྲ་མོ། ཁོར་ཡུག་གི་རྣམ་པ་ཕྲ་མོ་འཛིན་ལུགས་ཐད་ཀྱི་ལྷན་སྐྱེས་ཀྱི་འཇོན་ཐང་ཞིག་ལྡན་པ་འདྲ་བས། འཇོན་ཐང་འདི་ཉིད་སྤྱད་དེ་གསར་རྩོམ་གྱི་ལས་ལ་ཞུགས་ན་གྲུབ་འབྲས་མི་འབྱུང་ཐབས་མེད་ཡིན་པ་འདྲ། གསུམ། ཕུལ་དུ་བྱུང་བའི་བརྩམས་སྒྲུང་པ་ཞིག་ཡིན་ན། བརྩམས་སྒྲུང་འབྲི་ལུགས་ནི་ཁོ་རང་གི་བརྩམས་ཆོས་ཀྱིས་གསལ་བཤད་བྱས་ཡོད་པས། བརྩམས་སྒྲུང་གསར་རྩོམ་ལ་འཇུག་མཁན་རྣམས་ཀྱིས་ལྟ་ཀློག་གི་གོ་རིམ་ཁྲོད་ནས་བརྩམས་སྒྲུང་འབྲི་ལུགས་དང་ཁྱད་ཆོས་སྣ་ཚོགས་རྟོགས་པ་ན། རང་ཉིད་ཀྱི་ངེས་ཤེས་དང་མཐུན་པའི་བརྩམས་སྒྲུང་སྣ་ཚོགས་རྩོམ་པར་ནུས་པ་ཡིན། ཉི་མ་ནོར་བུ་ནི་ལྟ་ཀློག་ལ་འཇུག་པར་སྤྲོ་བའི་ན་གཞོན་རྩོམ་པ་པོ་ཞིག་ཡིན་པས། འབྱུང་འགྱུར་གྱི་དུས་སུ་གལ་སྲིད་ཁོ་རང་གིས་སྔར་སྲོལ་ལྟར་ལྟ་ཀློག་ལ་འབད་པ་དང་ལྟ་ཀློག་ལ་དང་དོད་བྱས་ན། བརྩམས་སྒྲུང་གསར་རྩོམ་ལ་གྲུབ་འབྲས་ཆེན་པོ་འབྱུང་བར་འདོད།

　　མཇུག་གི་གཏམ།

　　ཉི་མ་ནོར་བུ་ནི་གསར་རྩོམ་གྱི་ལས་ལ་ཞུགས་ནས་དུས་ཡུན་རིང་པོ་མ་འགོར་བའི་ན་གཞོན་རྩོམ་པ་པོ་ཞིག་ཡིན་པས། མིག་སྔར་ཁོ་རང་གི་བརྩམས་ཆོས་ནི་གཞུང་ལུགས་ཤིག་གི་རྒྱ་ལ་དྲངས་ཏེ་དཔྱད་ན་ཡོན་ཏན་རང་བཞིན་བརྗོད་པའི་གཏམ་མང་པོ་ནི་སྨྲ་མི་ནུས་མོད། འོན་ཏེ་གོ་སྐབས་དེ་འདྲ་ནི་རྗེས་སུ་འབྱུང་ངེས་ཡིན་པས། ཀློག་པ་པོ་ལྷན་རྒྱས་ཀྱིས་རེ་སྒུག་གནང་རོགས། ཉི་མ་ནོར་བུ་ལགས་ཀྱིས་འབད་པ་གནང་རོགས།

　　                                                                            སྤྱི་ལོ2019ལོའི་ཟླ5བའི་ཚེས3ཉིན།

རྩོམ་སྒྲིག་པ། དབང་མོ།

རྩོམ་ཁུངས། ངེད་དྲ་བ།