དགོད་སྒྲ་དང་འཛུམ་མདངས་གྱིས་ཁེངས་པའི་ཁ་སང༌།
ཡིད་འོང་མ། ཐུགས་རྗེ་ཆེ།
ཁྱེད་ཀྱིས་ང་ལ་གནང་བའི་བརྗེད་དཀའ་བའི་དྲན་གསོ།
བརྩེ་དུང་ནི་ཡོད་ཚད་མིན་པས།
ལས་དབང་གི་ས་བོན་བྲལ་བའི་གཤིན་སར།
བརྩེ་དུང་གི་སྡོང་པོ་རྒྱས་མི་ཐུབ།
དེ་ལྟར། ཁྱེད་དང་ངའི་བརྩེ་དུང་གི་འཚོ་བ་མཇུག་སྒྲིལ།
འགོ་ཚུགས་མ་ཐག་པའི་ལེ་ཚན་དེ་མཇུག་སྒྲིལ།
ང་ཁྱོད་ལ་སྨོན་ཡོད།
འོན་ཀྱང། ང་ཁྱེད་ལ་དགའ་མི་རུང༌།
ཡོངས་སུ་མི་མཐུན་པའི་འཇིག་རྟེན་གཉིས་ན།
ཁྱོད་རང། ཁྱོད་ལ་དབང་བའི།
འོད་ཟེར་སྟོང་ལྡན་གྱི་བདེ་ལམ་ཡངས་པོར་བསྐྱོད་ཅིག།
ང་རང༌། ང་རང་ལ་དབང་བའི།
གདུང་ཟམ་གཅེར་བུའི་སྟེང་སྒམ་བརླིང་གིས་འགྲོ་སྲིད།
མ་འོངའ་པར། འཚོ་བའི་བསམས་གཞིགས་གྱི་དུས་མཚམས་རེ་རེར།
ངས། ལྷག་བསམ་གྱི་གངས་དཀར་སྤོ་ནས།
དྲན་སེམས་གྱི་མཇལ་དར་བཏེགས་ཏེ།
སྨོན་འདུན་བཟང་པོ།
ཡང་རྩེའི་རླུང་བུ་ལ་མངགས་ནས།
ཁྱེད་ཕྱོགས་ལ་བཀུར་སྲིད།
དེ་དུས། ཁྱེད་ནི། མཐོ་སྒང་གི་བུ་ཆུང་ང་བརྗེད་ནས།
འཚོ་བ་ཡི་དགའ་བདེའི་བྲོ་གར་ལ་འཕགས་ནས་ཡོད་པ།
ང་རྦད་དེ་ཡིད་ཆེས་ཡོད།
ཡིད་འོང་མ། ཁྱེད་ནི།
ངའི་འཚོ་བའི་བྲག་ངོས་ན།
ནམ་ཡང་བསུབ་དཀའ་བའི་བརྐོས་རིས་ཞིག།
ང་ནི། ཡིད་འོང་མ་ཁྱེད་ཀྱི།
བརྩེ་དུང་འཚོ་བའི་ཁང་བཟང་དུ་སླེབས་མྱོང་བའི།
དྲན་འཆར་ན་མོག་པའི་མགྲོན་པོ་ཞིག།
དེ་ནི་འཚོ་བ་རེད་ལ། དེ་ནི་ལས་དབང་རེད།

རྩོམ་ཁུངས། ངེད་དྲ་བ།