ངས་མ་བོས་ཀྱང་ཁྱོད་སླེབས་བྱུང༌།
སུས་ཀྱང་མི་ཤེས་པའི་གསང་ལམ་ཕྲ་མོ་ཞིག་ནས།
ཁྱོད་གློ་བུར་ཏུ་ཇི་ལྟར་ཡོང་བ་ཡིན།
ལས་རླུང་ངམ་རང་བཞིན་འདེམས་སྒྲིག་གི་སྲིད་པ་ཞིག་ནས།
རིང་ཞིང་སྦོམ་པའི་འདོམས་ལ་མེ་སྒྱོགས་དང༌།
ཟླུམ་ཞིང་རྒྱགས་པའི་མའི་འོག་སྒོ་ལ་སྐྱིབས་སྣང་ཞིག་ཤར་ཡོད་ཤས་ཆེ།
གང་ལྟར་ཡང༌། ཆུས་དེད་པའི་ཕྱི་བ་ཕུག་པ་ལས་ཐོན་པ་ལྟར་ཁྱོད་སྐྱེས།
སྐབས་དེར་ཁྱོད་ལ་ངུ་སྐད་མེད་ཅིང་ངའི་གདོང་ལ་ཅེར་གྱིས་བལྟས།
གཉིད་དུས་ཡང་ཡང་འཛུམ་ཞིང་མཛུབ་རྒྱ་ཡ་མ་ཟུང་སྟོན།
ཕ་མའི་གཅེས་སྐྱོང་དང་མཇམ་མཉེན་གྱི་རོལ་དབྱངས་ཁྲོད།
ཁྱོད་དག་དག་ལོ་གསུམ་ལ་སླེབས།
འོད་སྣང༌། གཙང་སྦྲ། ངོ་བསྟོད་སོགས་ལས།
ངས་ཁྱོད་ཀྱི་དགའ་སྣང་དང་འཛུམ་མདངས་ཡང་ཡང་མཐོང་ཞིང༌།
བཙོག་རྡུལ་དང༌། དྲི་ཞིབ་ཀྱི་ཕྱུག་པ། གྲིབ་ནག་སོགས་ལས།
ངས་ཁྱོད་ཀྱི་སྐྲག་སྣང་དང་ངུ་སྐད་ཡང་ཡང་ཚོར།
ཁྱོད་ཉི་མའི་ཁྱིམ་རྒྱུད་ལ་ངོ་མཚར་ཆེ་བས།
ངས་འདུན་པ་མཐའ་ཡས་པའི་མཁའ་དབྱིངས་སུ་འཕུར།
ཁྱོད་གཡུག་ལྡེམ་གྱི་གླུ་གར་ལ་ཤིན་ཏུ་དགའ་བས།
ང་འཇམ་མཉེན་གྱི་རོལ་མོའི་རྒྱ་མཚོར་ལྷུང༌།
སྙིང་རྗེ་བའི་གདུག་ཅན་གྱི་ལག་པ་ཆུང་ཆུང༌།
ཆ་ཚང་ཆ་མེད་དང༌། ཆ་མེད་ཆ་ཚང་བཟོ་སྐབས།
ཁྱོད་འཕྲུལ་རིག་པ་ཞིག་ལོས་ཡོང་སྙམ་ནས་ང་དགའ་སྤོབས་སྐྱེས།
ཁ་ཏ་ཕར་ལ་བྱས་ན་ཚུར་ལ་བསླབ་བྱ་གཏོང་བ།
ཕྲུ་གུའི་ལུས་ལ་རྒན་པོའི་སེམས་པ་ཅན་ཁྱོད།
གཅིག་བྱས་ན་ཚོང་བ་གཡོ་ཅན་ཞིག་དང༌།
ལས་འབྲས་མེད་པའི་ཁྲིམས་རྩོད་པ།
ཡང་ན། ངོ་མཐུག་སེམས་ནག་གི་སྲིད་དོན་པ་ཞིག་ཀྱང་བྱེད་ལས་ཆེ།
འོན་ཏེ། ཁྱོད་ཀྱི་འཇིག་རྟེན་ནི་ཁྱོད་དང་མཉམ་དུ་སྐྱེ་ཞིང་འཇིག་ལ།
ངའི་འཇིག་རྟེན་ནི་ང་དང་མཉམ་དུ་སྐྱེ་ཞིང་འཇིག་ངེས་ཡིན་སྟབས།
ངས་ཁྱོད་ཀྱི་འཛམ་གླིང་ལ་བཀྲ་ཤིས་བདེ་ལེགས་ཞུ་བ་ལས།
རྒོལ་གཏམ་དང་གཉའ་གནོན་གྱི་ཇུས་གཏོགས་བྱེད་མི་འདོད།

རྩོམ་ཁུངས། ངེད་དྲ་བ།