གནམ་ལ་བསྲིངས་པའི་ལག་པ།
གནམ་ལ་བསྲིངས་པའི་ལག་པ།
ཆོས་ཤུལ་གསང་བདག （གནམ་འོག་གི་རྨ་ཁུག་དང་པོ）
༡
ཀླད་ནས་བཞུར་འོང་བའི་ཆུ་ཐིགས
ལག་པའི་མཐིལ་དུ་ལྷུང་དུས
ངོ་གདོང་བཀྲུ་བྱེད་ཀྱི་ལག་ཕྱེ
གསང་བར་སྦེད་པའི་ཚིག་དུམ་ཞིག་དང་འདྲ
མིག་གིས་འཐོང་ཐབས་བྲལ
ནམ་མཁའི་དབྱིངས་སུ་
རྒོད་པོ་ཞིག་གི་གཤོག་སྣེ
བྲག་ལ་བརྡར་བའི་ཉིན་ཞིག
ཁྱོད་ཀྱི་ནམ་མཁའ་ཏིལ་འབྲུ་ཙམ་པོ
སུ་ཞིག་གི་ཆེད་དུ་བསྲིངས་པའི་ལག་པ
ཕྱོགས་སོ་སོ་ནས་བསྲིངས་ཡོང
ལག་པར་གོན་པའི་སོར་གདུབ
བུ་མོ་ཞིག་གི་གམ་དུ་བཞག་རྗེས
རང་ཉིད་ལ་གཏོགས་པའི་ནེའུ་གསིང་དང་གཞིས་ཀ
རི་རབ་འདི་དག་གི་རྒྱབ་ཏུ་ཡིབ་ཡོད་པ་འདྲ་སྟེ
བདག་གིས་བཙལ་ཀྱང་རྙེད་རྒྱུ་མི་འདུག
༢
ཁ་བ་མཐུག་པོ་འདིར་ལག་པ་བསྙབ་ཀྱང
གྲང་བོའི་སྣང་བ་མེད་པར་དྲོད་སྣང་གིས་ཁེངས་དུས
འཇིག་རྟེན་ཟེར་བའི་ཟླུམ་པོ་འདི
བདག་གི་ལག་མཐིལ་བཞིན
གང་དུའང་འཇོག་ཆོག་པའི་ས་ཁྲ་ཞིག་དང་འདྲ
དུས་ཚོད་ཀྱིས་ཟོས་པའི་མི་དང་དུད་འགྲོ
གྲོག་མ་ཞིག་ཏུའང་འགྲན་མི་བཟོད་པའི་ཉིན་འདི་གར
ང་ཚོར་དབང་བའི་གོ་ལ
བྱིའུ་ཚང་ཞིག་དང་འདྲ་བར
མགྲོན་པོ་དག་གིས་རྐང་འོག་དུ་བསྣན་ཡོང
ཉི་འོད་ཀྱི་སྡུག་སྒྲིབ་འོག
ང་ཚོ་དུས་ཡུན་ག་ཚོད་ཙམ་ལ་འཚོ་གནས་བྱེད་ཐུབ
བདེ་སྐྱིད་ཟེར་བའི་ཚོར་བ་བལ་འདྲ་བ་དག
གང་ཞིག་ནས་རྙེད་སྲིད
ཇི་ལྟར་འཚོལ་ཆོག
མཚན་གུང ཉིན་གུང ཡང་ན་ཉི་ནུབ་ཀྱི་དུས
ལག་པ་འདི་རིང་དུ་རྐྱོང་ཆོག་གམ
བདེ་སྐྱིད་ཟེར་བའི་མུན་ནག
བཙལ་ནས་རྙེད་རྒྱུ་ཞིག་ཡོད་དམ
༣
གྲིབ་བསིལ་ཏིལ་འབྲུ་ཙམ་པོ
དགུན་ཁའི་ཉི་འོད་ཇི་བཞིན
འཇིག་རྟེན་གྱི་གཞིས་སུ་ཤར་ནའང
ཤ་རུས་ཀྱི་གྲུབ་པའི་སྒྲོམ་གཞི་འདི་དག
དྲོད་ཁོལ་གྱིས་ཡོངས་སུ་དབེན་པར་གྱུར
མིག་ལ་ཟ་འཕྲུག་སློང་བྱེད་ཀྱི་མེ་ལོང
མདུན་དུ་བཟུང་ནས་ཡུན་རིང་འགོར
ལག་པ་འདི་སྟོང་བའོ
སེམས་པ་འདིའང་སྟོང་བའོ
མིག་ཤེལ་གྱི་ངོས་སུ་ཤར་ཡོང་བའི་མི་དག
ད་དུང་བདག་གི་ལག་པར་འཇུས་ཡོང
འཇམ་ཐང་ངེར་གྲགས་པའི་གླུ་གཞས
ཐག་རིང་ཞིག་ནས་བདག་གི་གམ་དུ་འབྱོར་འོང
མཚན་མོ་ཞིག་གི་སྒེའུ་ཁུང་ངོགས་ཟླ་འོད་བཞིན
འཁྱག་སིབ་སིབ་ཀྱིས་བདག་གིས་སྔས་གཞི་བརླན
གྲང་བསིལ་བསིལ་གྱིས་ནམ་མཁར་འཐིབས
ཉི་ནུབ་ཅིག་དྲན་འོང་བའི་དོ་དགོང
ཁྱོད་གཅིག་པུའི་རྣམ་ཤེས་ལྷག་མ་ཞིག
བར་དོའི་གཏིང་དུ་སིམ་པ་འདྲ་སྟེ
རླུང་གིས་བདག་ལ་མིག་བརྡ་བྱེད་ཀྱི་གདའ
༤
ལག་པ་ཞིག་ཁྱོད་ལའང་ཡོད་སྲིད
ནམ་མཁར་དཔྱངས་ཆོག་པའི་ལག་པ་ཞིག
དཀོན་མཆོག་གིས་ཚང་མར་བསྩལ་ཡོད
གལ་སྲིད་ཁྱོད་ཀྱིས་ལག་པ་འཇོག་མི་ཐུབ་ན
དཀོན་མཆོག་ལ་བཀའ་འདྲི་ཞུ་ཆོག
ཁྱོད་ཀྱི་སྐྱག་པ་ཕྱི་བྱེད་ཅིག
དཀོན་མཆོག་ལ་ཐལ་མོ་སྦྱར་བྱེད་ཅིག
སུ་ལའང་གནང་སྲིད
མཛེས་སྡུག་ཡོད་ཚད་ལ་རེག་བྱེད་ཀྱི་ལག་པ
སྐྱུག་བྲོ་བ་མཐའ་དག་འབྲད་བྱེད་ཅིག
འུ་ཚོའི་ལུས་སུ་འབྱར་ནས་བསྡད་ཡོད
༢༠༠༩ལོའི་ཟླ༡པའི་ཚེས༡༡ཉིན་སྦྱར།
རྩོམ་ཁུངས། ངེད་དྲ་བ།