—— ལྷ་སའི་ཟིན་ཐོ་ཁག་ཅིག་བཀླགས་རྗེས།

སྨུག་སྤྲིན་ལང་ལོང་དུ་འཁྲིགས་པའི་

མག་མོག་གི་མཁའ་དབུགས་ཁྲོད

རྒྱང་རིང་གི་ལྷ་ས  ཁ་མི་གྲགས་པའི་བྱིས་པ་བཞིན

སོ་ལྟ་དང་ལྐོག་མིག་གི་མཆེ་བར་ན

འཇིགས་ཡེར་བའི་སྣང་བ་ཁོ་ནས་འཚོ་བར་སྐད

ལྕགས་མཆུ་རིང་མོ་དེས་ལྷ་སའི་ལམ་སྣེ་ཟིན་པ་ནས

གྲོག་ཚང་ནག་པོ་དེའང་ག་ལེར་འགུལ་འགོ་བརྩམས

ལོ་ཟླ་དང་དུས་ཚིགས་ཀྱི་ཤར་ནུབ་མེད་པར

གྲོག་མའི་འདུ་འཛི་སྔར་ལས་ཆེ་བས

རྒྱང་རིང་གི་ལྷ་ས  ཟླ་བ་མར་ངོ་བཞིན

ཇེ་ཆུང་ནས་ཇེ་ཆུང་དུ་གྱུར

དྲིལ་བསྒྲགས་དང་ཁ་གཡང་གི་སྣེ་ན

རྒྱང་རིང་གི་ལྷ་ས  འོད་ཀྱིས་འཚོ་ཡང

བར་སྐོར་གླིང་དང་པོ་ཏཱ་ལའི་མདུན་རྒྱབ་ཏུ

ཉིན་ལྟར     རིགས་གཅིག་པའི་མཐེ་བོང་མང་བོ་

དུས་གཅིག་ཏུ་ཚོགས་པར་སྐད

སྨད་འཚོང་མའི་ཟུར་མིག་དང་དུ་ཆང་གི་མངར་ཁ་འཇམ་པོས

ལྷ་སའི་བསམ་བློ་ལྗིད་ཀྱིས་བཟུང་ཞིང  

མེས་པོའི་ཁྲེལ་གཞུང་རིང་དུ་བོར

རྒྱང་རིང་གི་ལྷ་ས   ཉི་འོད་མེད་པའི་ནམ་ཟླའི་ཁུད་དུ

ཁྱོད་འདི་ལྟར   མེས་པོའི་ལྷ་ས་ནས་མགྲོན་པོའི་ལྷ་སར་གྱུར་པ་སུ་ལ་བཤད

                                                         ༢༠༠༩།༡།༡༢ཕྱི་དྲོར་བྲིས།

རྩོམ་ཁུངས། ངེད་དྲ་བ།