གངས་རིའི་རིང་ལུགས་གངས་ལྗོངས་ཆོས།།
གངས་དཀར་ལས་ཀྱང་ལྷག་པ་ཡི།།
གངས་ཅན་པ་ཡི་འོད་མདངས་ཆེ།།
གངས་རིའི་རྒྱུན་ལས་ཡོངས་སུ་འཕྲོ།།
རིགས་མཐུན་ལས་དབང་གཅིག་པ་ཡིས།།
རིགས་རུས་འདྲེས་པའི་བོད་པ་བ།།
རིགས་ལུང་རྣམ་དག་ལས་འོངས་པའི།།
རིགས་པའི་ངར་སྐད་རྒྱུན་བཟང་འབར།།
བོད་སོགས་འཛམ་གླིང་རྩེ་མོ་ཡི།།
བོད་ཀྱི་གངས་རི་གཟི་མདངས་འོད།།
བོད་ཡུལ་ཁམས་ཀུན་ཡོངས་ཁྱབ་པའི།།
བོད་ཀྱི་རིག་གནས་ཁྱད་དུ་འཕགས།།
ཆོས་ཀྱི་ཆུ་གཏེར་རྒྱ་མཚོ་ལས།།
ཆོས་སྙིང་བསྟན་པའི་མཛོད་འཛིན་པའི།།
ཆོས་གྲོགས་ལས་མཐུན་མཐུན་སྒྲིལ་ལས།།
ཆོས་རྒྱུན་གང་གཱའི་ཀླུང་དབང་འཁྱིལ།།
མི་རིགས་སྣ་ཚོགས་ཡིད་ཀྱི་དབང༌།།
མི་དབང་འགུགས་པའི་གཅེས་པའི་ནོར།།
མི་རིགས་ཀུན་ལས་འཕགས་པ་ཡི།།
མི་ཆོས་སྣ་འཛོམས་གངས་ལྗོངས་མཛེས།།
རྣམ་མང་འོད་སྟོང་རབ་འབར་བའི།།
རྣམ་དཀར་དགེ་བའི་ལས་དབང་གིས།།
རྣམ་སྨིན་ལས་ཀྱིས་ལེགས་འཕང་པའི།།
རྣམ་མང་དགེ་མཚན་འདི་ན་འཁྱིལ།།
བློ་གསལ་མཁས་མང་རྒྱ་མཚོ་ལས།།
བློ་གྲོས་གཏེར་གྱི་སྒོ་འབྱེད་པའི།།
བློ་ཡེངས་རྣམ་པའི་རྒྱང་དོར་ནས།།
བློ་གསལ་མཛའ་འདྲེས་དགའ་བའི་ཉམས།།
རིན་ནས་ཉོས་པའི་དངུལ་མེད་ཞིང༌།།
སྤུངས་པའི་བློ་གྲོས་དེ་ལས་ཀྱང༌།།
ཚུར་རོལ་ཕར་རོལ་ཁྱད་མེད་པའི།།
བསྟན་ལ་དད་འདུན་ལྷག་བསམ་བརྟས།།
      ཞེས་༢༠༠༧ ༥ ༣ ཉིན་ལ་རང་ཤག་ཏུ་བྲིས་པའོ། །

རྩོམ་ཁུངས། ངེད་དྲ་བ།