རི་སྒང་ནས་ཀི་རིང་འདེབས་མཁན
ཁྱོད་ཡིན་པ་ཤེས་པ་ནས
ང་ནམ་ཡང་གཉིད་ནས་འདུག་མི་འདོད
དུར་ཐང་དེ་ན་ཡོད་པའི་མི་རོ་དག་མཐོང་དུས
ཁོ་ཚོའི་ཆེད་དུ་མེ་ཏོག་རེ་འབུལ་འདོད་མོད
ཁྱོད་ཀྱིས་རི་སྒང་ན་སོ་ལྟ་བྱས་ཡོད་པར་སེམས་ནས
འབུལ་མ་ཕོད
ཁྱོད་ཀྱིས་ར་མ་དག་རི་ལ་བརྒྱབ་རྗེས
རི་སྒང་ནས་བསྡད་དེ་
ངའི་འགྲོ་འདུག་ལ་སོ་ལྟ་བྱེད་རྒྱུ
རང་གི་གོམས་གཤིས་སུ་ཆགས་ཡོད་ཟེར
རྩྭ་ཆུ་འཛོམས་སའི་ངའི་ཕ་ཡུལ་གྱི་རི་ལུང་ཀུན་ན
ཁྱོད་ཀྱི་འགྲང་རྒྱུ་མེད་པའི་ར་མ་ཚོས
ཤ་ལ་འཁོར་བའི་ཁྱི་སྤྱང་གི་ཚོགས་ལྟར
རྨ་ཁར་འཐམས་པའི་འབུ་སྲིན་གྱི་རིགས་བཞིན
སེར་སྣ་དང་ཕང་སེམས་མེད་པར
ཤུགས་ཀྱིས་ཟ་ལ
ཧུབ་ཀྱིས་འཐུང༌།
དེན་དུ་ཁྱོད་ར་རྫི་ཙམ་མ་ཡིན་པར
ར་མ་ཚོ་དང་ལྷན་དུ་འཇིག་རྟེན་ལ་ཡོང་བའི
མི་སྲོག་གི་རྔོན་པ་རེད།
ཁ་བ་དང་བུ་ཡུག་གི་ཁྲོད་ན
ཁྱོད་ཀྱིས་རང་གི་ར་མ་ཚོ་དེད་དེ
མེ་མདའ་བཟུང་ནས་ས་ཆེན་པོར་བཙན་འཛུལ་བྱེད་དུས
ཁྱོད་ཀྱི་རྡོག་འོག་ན་ཉུལ་བཞིན་པའི
ངའི་ཕ་ཡུལ་གྱི་རི་ཆུ
ར་མ་དེ་ཚོའི་དགུན་ཟས་སུ་འདོད་པ
ཧམ་སེམས་ཀྱི་གད་རྒྱངས
ངོ་མ
གཉིད་མ་སད་ཀྱི་ངའི་ཕ་ཡུལ་གྱི་སྙིང་ཁ་ན
ཁྱོད་ནམ་ཡང་མིག་རྩ་དམར་བའི
རྔོན་པ་མེ་མདའ་ཅན་ཞིག་ཡིན།
དེ་བས
ཁྱོད་ཀྱི་འབུ་སྲིན་ལྟ་བུའི
རང་གི་ར་ཁྱུ་དེད་ནས
རི་བོ་དེའི་ཕར་ཕྱོགས་ན་ཡོད་པའི
རང་གི་ཕ་ཡུལ་དེར་འགྲོ་རོགས
ངའི་ཕ་ཡུལ་ཀྱིས་ཁྱོད་ལ་དགའ་བསུ་མི་བྱེད།

རྩོམ་ཁུངས། ངེད་དྲ་བ།