འཕན་མང་དུག་འཚེར་འཛིངས་པ་དྲ་མའི་ཤིང་།།ཡོན་ཏན་ས་བརྟོལ་ལྗོན་པར་བསྙད་བཏགས་ནས།།གཞན་ནོར་ཐབས་ཀྱིས་ལེན་པའི་གཡོ་ཅན་རྣམས།།དགེ་སློང་གསེར་ལེན་སྤུ་སྐྱེལ་ངང་ཚུལ་བཞིན།།སྔོན་ཚེ་བསོད་ནམས་བྱེ་བའི་སྟོབས་ཀྱིས་ནི།།འཛམ་གླིང་སུམ་ཉིས་ཁྱོན་ལ་དབང་མཛད་དེ།།ས་སྐྱོང་ནོར་བའི་ཁྲི་འཕང་ལྷུན་པོའི་སྤོར།།ཞབས་སེན་ཟླ་ཚེས་རི་མོས་མཛེས་པ་ཡོད།།དེ་ཡི་སྟོབས་དང་འབྱོར་བའི་རྐང་སེན་གྱིས།།དྲེགས་ལྡན་རྣམས་ཀྱི་སྤྱི་བོ་ལ་རེག་པས།།མ་རུངས་མི་བསྲུན་སྐྱེ་བོའི་སྙིང་ཁམས་རྩ།།ཤིང་ལོ་རླུང་གིས་གཡོ་བའི་ངང་ཚུལ་བཞིན།།རེ་ཞིག་གང་ཐུགས་འོ་མའི་ཆུ་གཏེར་ཆེ།།སྔོན་གོམས་ལེགས་བྱས་སྟོབས་ཀྱིས་བསྲུབས་པ་ལས།།རྣམ་དཀར་མཛད་པའི་ཕྱོགས་དང་རྗེས་མཐུན་པར།།དགེ་འདུན་ཁྱིམ་དུ་བསུ་པའི་དྲན་རྟོག་འཆར།།དེ་བཞིན་ནངས་པའི་དུས་སུ་ནི།།དགེ་སློང་ངུར་སྨྲིག་འཛིན་པ་ཅན།།ཤ་ལ་སྲེད་པའི་སྦྲང་བུ་བཞིན།།རྒྱལ་བོའི་ཁབ་ཏུ་འོང་བར་གྱུར།།དམ་པའི་ཞིང་ལ་དངོས་པོ་ཆུང་ངུས་ཀྱང་།།མཆོད་པའི་འབྲས་བུ་བདེ་བ་རྒྱ་ཆེན་འགྱུར།།ཐེག་གསུམ་དགེ་འདུན་ཁ་ལག་ཙམ་ཞིག་གིས།།མཆོད་པ་དགེ་བའི་ལས་ལ་སུ་ཞིག་ཚོམ།།འོན་ཏང་ཉོན་མོངས་བྲོ་ནད་ཀྱིས་གཙེས་པའི།།ཆོས་གོས་ཟླུམ་པོར་བགོས་པའི་དགེ་སློང་ནི།།ནགས་ཀྱི་ཤྭ་ནའི་པགས་པས་བཀླུབས་པ་ཡི།།ཞིང་གྲོང་འཁྱམ་པའི་བཟོད་པའི་མུ་ཁྱུད་ཉིད།།ལྟོ་པས་ཞུ་ཚད་ཟོས་པའི་དགེ་སློང་དེས།།གཡོ་ཅན་སྙན་པར་སྨྲ་བའི་ངང་ཚུལ་གྱིས།།གང་སར་བསྔགས་བརྗོད་མེ་ཏོག་གཏོར་པའི་མཐར།།རང་གནས་ས་ལ་བཞུད་པའི་སྟ་གོན་ བྱེད།།དེ་ཚེ་དེ་ཡི་འདྲེན་བྱེད་ནི།།རི་མོར་བྲིས་པའི་གཟུགས་བརྙན་བཞིན།།ནོར་གྱིས་ཡོངས་གཏམས་གན་མཛོད་དུ།།བརྣབ་སེམས་ཀྱོ་བས་དྲངས་པར་གྱུར།།སྐྱེ་བ་སྐྱེས་བའི་ཕྲེང་བ་རུ།།གཞན་ནོར་ལེན་ལ་གོམས་པ་ཡི།།ཚུལ་ཆོས་དགེ་སློང་དེ་ཡིས་ནི།།འཆལ་མར་བརྡལ་པའི་གསེར་ཊམ་མཐོང་།།ཕྱི་ཡི་གཟུགས་པོའི་བརྙན་རིས་ཙམ།།རྒྱལ་བོའི་ཁབ་ལས་འོངས་ནཡང་།།ནང་གི་སེམས་ཀྱི་གླང་བོ་དེ།།ཊམ་ཀའི་ཕུར་བས་བཏགས་པར་གྱུར།།འཕྲལ་གྱི་བདེ་བ་སྦྲང་རྩིའི་རོ།།སྡུག་བསྔལ་སྤུ་གྲིའི་སོར་ཆགས་པ།།སྲེད་ལྡན་དེ་ཡིས་མ་ཤེས་པས།།གཡོ་སྒྱུའི་ལས་ཀྱིས་ཀུན་ནས་བྲེལ།།དེ་ཡིས་རང་གི་འཁར་སིལ་མཐིལ་དུ་སྤྲ་ཚིལ་སྦྱར་བས་མཛེས་བྱས་ཤིང་།།ལག་པར་སྤུ་ཡི་ཉག་མ་ཐོགས་ཏེ་སླར་ཡང་སྔར་གྱི་གནས་སུ་བྱིན།།ད་གིན་རྒྱལ་བོའི་བང་མཛོད་ནང་དུ་ཁོ་བོའི་ལུས་ལ་སྤུ་འདི་འབྱར།།སྔར་གྱི་གནས་སུ་མ་བསྐྱལ་མ་བྱིན་ལེན་གྱི་ཉེས་ལྟུང་འབྱུང་ཞེས་ཟེར།།སྤུ་ཉག་གཅིག་ཀྱང་རང་དགར་མི་ལེན་པའི།།མགོན་ཁྱོད་འཕགས་པའི་དགེ་སློང་ཤ་སྟག་ཅེས།།ས་སྐྱོང་དྲེགས་ལྡན་དེ་ཡི་ཡན་ལག་མཆོག།ས་གཞིའི་རྔ་བོ་རྡུང་བའི་དབྱུ་གུར་བྱས།།འོན་ཏང་དར་གྱིས་ལྕིབས་པའི་དུག་སྦྲུལ་ནི།།འགྲོ་མང་འཚེ་བའི་གཞི་རུ་མི་སེམས་ཏེ།།དེ་ཡི་གཡོ་དང་སྒྱུ་ཡི་ཐབས་ཀྱིས་ནི།།གཞན་ནོར་བརྐུ་བའི་ལས་དེ་སུ་ཞིག་མཁྱེན།།ས་གཞི་སྐྱོང་བ་མདུན་ན་འདོན་དང་བཅས།།སླར་ཡང་གན་མཛོད་ནོར་བུའི་སྒོ་འཕར་ཕྱེ།།ཆགས་ལྡན་དེ་ཡང་ཞི་དུལ་བག་ཡོད་ཀྱི།།རྣམ་པས་རྒྱལ་བོའི་མཛོད་ཀྱི་ཕུགས་དེར་ཕྱིན།།གསེར་ཊམ་གཅིག་གི་ཁ་ལ་ནི།།ལག་གི་འཁར་སིལ་མཐིལ་སྦྱར་བས།།ཊམ་ཀ་སྤྲ་ཚིལ་ལ་འབྱར་བ།།ཁབ་ལེན་རྡོ་ཡི་ངང་ཚུལ་ལོ།།ལག་ཏུ་ཐོགས་པའི་སྤུ་རྐང་དེ།།དར་ཟབ་ཕུང་བོའི་ཐོག་ཏུ་བཞག། སྤྲ་ཚིལ་འབྱར་བའི་གསེར་ཊམ་དེ།།གཏན་དུ་རང་གི་ནོར་དུ་གྱུར།།སྤུ་ཉག་གཅིག་གི་ཉེས་བར་ཁ་གཡར་ཏེ།།རིན་ཆེན་དང་པོའི་ཊམ་ཀ་ལེན་ཕོད་པའི།།སྲེད་ལྡན་དེ་ཚོ་མནར་མེད་དམྱལ་བའི་གྲོང༌།།ཡང་ཡང་འཚེད་པའི་ལས་ལ་མི་འཇིགས་སམ།།འདི་ལྟའི་ངོ་མཚར་གཏམ་གྱི་རི་མོ་ནི།།གོ་བདེའི་ལམ་གྱི་ཚུལ་དུ་དཀྲོལ་བའི་དགེས།།ཀུན་ཉོན་འདམ་དུ་བྱིངས་པའི་སྙིགས་མའི་འགྲོ།།ཐར་བའི་ལམ་སྣེ་ཟིན་པའི་རྒྱུར་འགྱུར་ཤོག།

རྩོམ་ཁུངས། ངེད་དྲ་བ།