དེ་རིང་      ལམ་འགྲམ་གྱི་ལྗོན་གསེབ་དེ་རུ

ངོ་མི་ཤེས་པའི་སྤྲེའུ་ཞིག་གིས་སྙན་ངག་གྱེར་གྱིན་འདུག

སྙན་ངག་ཏུ་སྤྱི་ཚོགས་ཤིག་གི་སྣང་ཚུལ་གླེང་གི་འདུག

ངའི་སྔུན་གྱི་ཕྱི་གླིང་ལམ་འགྲོ་བ་དེས

གོམ་ཁ་ཕྱིར་ལ་ནུར་ཙམ་གྱིས་

རྒྱབ་ཁུག་ཏུ་བཅུག་པའི་པར་ཆས་མཆུ་རིང་དེ་ཕྱིར་ལ་བཏོན་ཞིང་

ཡ་མཚར་མདོག་གིས་སྤྲེའུ་དེའི་ཉམས་སྣང་མཐའ་དག་སྒྲོན་པར་བརྩམས།

མ་ཎིའི་དབྱངས་རྟ་ལ་བྱང་བའི་རྨོ་མོ་དེས་ཀྱང་

མིག་ཆུའི་ཐིགས་པ་འགའ་མཁུར་འགོར་དཔྱངས་ཏེ

སྤྲེའུས་གྱེར་བའི་སྙན་ངག་ལ་རྣ་བ་བླགས་ཤིང་།

ཕྱི་གླིང་བའི་པར་ཆས་ཀྱི་ནང་དུ་

རང་ཉིད་ཐེ་བའི་རེ་བ་ཡང་ཡང་བཏོན།

ལྟག་རྒྱབ་ན   གསར་བུ་རྐྱལ་སྟོང་ཁག་ཅིག་གིས

མིག་ཆུ་བཏུང་བའི་རྨོ་མོ་དེ་དང་

པར་ཆས་བསྲིངས་པའི་ཕྱི་གླིང་བ་གཉིས་ལ་

འཕྱ་དགོད་བྱེད་ཀྱིན་འདུག

ངས་སྤྲེའུའི་སྙན་ངག་གི་བརྗོད་དོན་ལ་ཉན་ཞོར

སྐབས་དེའི་མཐོང་སྣང་གི་རྨོ་མོ་དང་ཕྱི་གླིང་བ

ད་དུང་།  ཁྲེལ་དགོད་དང་ཧབ་ཆས་བཟི་བའི་རྐྱལ་སྟོང་དེ་ཚོ་

རེ་རེ་བཞིན་ཟིན་ཐོར་བཏབ་སྟེ་

དེ་རིང་གི་ཉིན་ཐོའི་ལྟེབས་བར་དུ་བཅུག་པ་ཡིན།

                      ༢༠༠༨།༡༢།༡༤ཉིན་དྲ་ཐོག་ནས།

རྩོམ་ཁུངས། ངེད་དྲ་བ།